1 Na Pol, Jisas dedugwa yagl ta moglka i, yoba swara kaima ta na dedidre, kogon i ero, ta di narekrikwa ba Neno Kade God Jisas ere i kor edugwa i ya, Jisas Krais yene kogon i naribrika.

2 Ene provins Galesia bage bage makai si moglsre, Jisas kamo pre meglkwa i we, God yobama na moglmara meglkwa i akie pepa i bogl tomga. 3 No ene wakai we di tedre, Neno Kade God ya Yaglno Kade Jisas Krais ene yoko kaima ere wakai ere tedre, deno muduno wida di padigl tenabredi prumga.

4 Nono tadaglme yugobuno mina atne mogl dinaiglmedi Jisas tadaglmeno pre goglkwa. Te, Neno Kade God ye gorabedi prumere goglkwa. 5 Neno Kade aimadi kamin kagie kade te pai moramga. Ka kaima.

6 Na nagna kogl, kide kaima ta prika i, ka mabuno kibi ta erme yudre, Jisas kamo wakai yome digo, ene prisre, tabre kaima God mokono teigwa. Krais ene yoko kaima ere inagledi goglmara i mina God agle dugo, ene ede suna wigwa ba tabre kaima ye kamo kide kodigwa. 7 Krais kamo wakai swara kaima yogwa ba yoba tau ene kinano sinamnedi Jisas kamo wakai pamara i, ka kibi tau mere i suna edidre, ene beke teigwa i pre diga.

8 Ene prio! No okna ene meglmara udre, Jisas kamo wakai pamere beke tomga ba yoba ta okuo udre, ka pere ta yu ene di tenan, God yoba i ere kide ere tenabedi prika. Yoba yoko mo, nono Jisas dedugwa yoba munga i mo, angelo ta heven ibo mogl, atne u dinabuka i, pra, God ye ere kide ere tenabedi prika. 9 Ka i okna dumgo, pre kodigwa ba na aglke kor dinaglka. Yoba ka pere ta ene okna pre mediglmere mere yu ene di tedre, ka i Jisas kamo wakai yome ta dinan, God ye ka tage tenabuka.

10 Na ka gigledi diga i, yoba na wakai kanaiglmedi dikrika ba God swara na wakai kanabedi diga. Te, yoba na debina sinaiglmedi dikrika. Yoba na wakai kanaiglmedi dibo, na Krais niglmo kogonmo eribo, kuno erekrabuka.

11 Agrama abarama wagle, na ene pre pogl sinaiglmedi prika i, na Jisas kamo wakai yoba di te wan moglka i, yoba kano ta manugwa. 12 Te, na yoba ta digo, narekruko, yoba swara kaima ta ka i ama beke narekrukwa ba Jisas Krais yene di pogl narukwa.

13 Ana na okna siragl mere moglka i, enene pre kan erikwa. Na Juda ka mabunono primara i prisre, God yobama Jisas pre mediglkwa i, ere kide kaima ere tedre, si dudu kodinagledi erika. 14 Na yegl ersre, te, no kowano awano lono ama duglo boragledi kogon podo kaima erika pre na yagl kunanama egre atne ede tedre, Juda ka mabuno primara i, na ede okna eiga.

15,16 Ba God yene ege wakai ta paduglkwa i plau dugo, ye Wam na moglmara dedugo, ye udre, Na kana i pi Jentail yoba di to dugwa. Na mana na kuglkrukwa igne, God na kogon yegl eratnedi kere i pere ede kodugwa. Te, ye dem muduo yoko kaima narsre, na agle dugwa.

Ana Jisas na moglmara plau dugo, ye kan pogl siga igne, na yoba swara ta moglmara pidre, Jisas kamo kuno ere prio mo di, pi kira pogl prikrika. 17 Te, Jisas yagl tau komono kana dedugo, Jerusalem meglmara i, na pi kira pogl prikrika. Na pre kodiedi prisre, nana ede kantri Arebia we dimara i, pi wan mogl, okuo ede ikne dumo Damaskus eiga.

18 Ba okuo, bugla yugu suota ede ogo, na Pita kanagledi ede dumo Jerusalem eiga. Eigo, Pita bogl ege 15-pela de akie muglka 19 ba Jisas dedugwa yoba ta meglko, kankrika. Swara ta moglko, kaniga i, nono Yaglno Kade Jisas agigle okuo Jems moglkwa i keme kaniga. 20 Ka magigl boglka i, na God gumuglo mina ka kaima diga.

21 Na ye meglmara 15-pela de moglsre, ede eglke provins Siria ya Silisia eiga 22 pre Krais yobama distrik Judia meglkwa i, na gumana drana ta kankrikwa. 23 Na kankrikwa ba yoba na kana di eigo, prikwa i, Pol nono ere kide ere noro, Jisas kamo si dudinagledi erukwa yagl ikra, erme Jisas kamo i di wan moglmiwe digo, ye prisre, 24 Pol moglmara God kogon podo erumedi ye kagie kade teigwa.