1 Agrama abarama wagle, agro mo abaro ta tadaglme mina yage sinan, ene tau Mudu Murubuglo duglo bogl moraiglkwa i, kiede moglsre, ye morabara pi aglke kor adrabedi erio. Ba ye tadaglmemo i mina ama yage si dinamnedi kan kun erio.

2 Ene agitn ta yubun inan, ye yubunmo ake ple di teo. Ene yegl eribi, Krais lomo duglo beglkwa mere yegl panabuka. 3 Ba ene, mogl mitna ediwa. Ye mogl atne edumiwe di, pribi, enene bakaiglkwa. Nono mudu kuno keme munga.

4 Enene kogon etnga i, wakai etno mo kide etno mo i, kanatnga. Kogon wakai ta etnga panan, gun yei moratnga. Ba ene agitn ta ido kogonmo i, kan yubu sikro. 5 Nono swarade kogono panabere i, no nono eramga paugwa.

6 Yoba ta God kamo ene beke te moraiglkwa i, makandigle taragl kane kane mina ye ake ple di teo.

7 Enene nomane kibi idre, no God bakagl tomun, kuno erabiwe di, yegl ta prikrio. Yoba kaya mokna mogo siragl mere ede makan mina edigwa i, i keme okuo sinaiglkwa.Kaya mokna mogo siragl mere yaiglmere yegl keme okuo boran, si nenaiglkwa 8 Yoba ta ye deno muduno goglo duglo bogl meglbi, ye deno muduno goglo i mina taragl kide ye meglmara plau dinan, ye u kide enaiglkwa. Ba yoba ta God Murubuglomo duglo bogl meglbi, God Murubuglomo taragl wakai i nogugl ede tenan, ye aimadi wakai kaima moraiglkwa.

9 Yegl pre nono mabuno wakai oglka erekre, ere pai moramga paugwa. Mabuno wakai ere pai mun, kaya mokna borabuka igne, mogo wakai koran, si yunamga. 10 Yegl pre konbauna ta yenabuka igne, yoba mudu ere wakai ere tenamga paugwa ba nono ka swara pre medigl, yugobuno swara munga i, ye ka kaima ere wakai ere tenamga paugwa.

11 ANA KA MAGIGL I NANA OGONA MINA BOGLKA PRE MUNO GANE PODO PAMA, KANIO.

12 Yoba tau ene gagno bolo digwa i, ye Krais ede prak mina goglkwa swara pre medilo dinaiglkwa ba ye Juda yoba kuduglno goglsre, ye wakai kanaiglmedi gagno bolo digwa. 13 Yegl digwa ba yene ama God lomo mudu duglo boglkrikwa. Ba ene nagino beglbi, ye kagno kade inaiglkwa pre digwa.

14 Na nomane kade ta iga i, nono Yaglno Kade Jisas Krais ede prak mina goglkwa ka i swara didre, na nana kana ege swara kaima ta dikraglka. Ye ede prak mina goglmara i, na ama goglka pre erme makadigle taragl ta na kane sikruko, eglke moglka.

15 Nono nagino bunga mo boglkunga i taragl yoko kaima yogwa ba God nono ere i kor edugwa swara i taragl podo paugwa. 16 Yoba ira ta ka i kaima pamedi prisre, duglo borabuka i, God ye mirie goglsre, dem muduo wida di padigl tenabedi prika. Te, Israel yoba tau God yobama kaima ta moraiglkwa i, ye ama yegl ere tenabedi prika.

17 Te, ege mere na sigo, nagna bro paugwa i, na Jisas kogonmo yoba moglmedi i nogugl edugwa pre na ibun i wiga i, erme swara ta i tebe ede narekrio.

18 Agrama abarama wagle, nono Yaglno Kade Jisas Krais ene kiano mina yobuglo bogl te pai morabedi prika. Kaima.