1 Na agrama abarama wagle, ene dumo Efesus mogl, God Kere Yugwa Yagl Jisas pre medigl, God yobama meglkwa i, na Pol ene pepa i bogl teiga. Na moglka i, God yene wakai prumere ere mogl, na Jisas dedugwa yobamo ta moratnedi na kere i pere edugo, na ye kogonmo ere moglka. 2 Te, ene we, Neno Kade God ya Yaglno Kade Jisas Krais ene mudu ere wakai ere tedre, deno muduno wida di, ene mudu meglmara padigl tebredi prika.

3 Ana nono Yaglno Kade Jisas Krais Nem, Godmo i, kagie kade tenamga paugwa. Ye Kere Yugwa Yagl kogon erumara i mina nono kiano mina wakai moraiglmedi heven taragl mudu noro kodugwa.

4 God dem muduo norsre, dumo makan ere yeikrukwa igne, ye gumuglo mina du mogl, tadaglmeno ta paikrabedi nono kere i pere ede kodugwa. Krais kogon erabara mina nono kersre, 5 te, okna ibo ye yene wakai prumere di padigl, Krais Jisas kogon erabara i mina nono ere i, ye gagiglma edenagledi paduglkwa.

6 God kogon podo kide ersre, nono yoko kaima ere wakai ere norukwa pre nono ye kagie kade tenamga paugwa. God ye Wam Jisas dem muduo podo kide tomara i mina nono Jisas yugobunomo mina atne munga i ama ye yene wakai kanumere ere, nono ere wakai ere noro kodugwa. 7 God ye dem muduo podo norsre, ye yoko kaima nono ere inagledi prukwa pre ye Wam Jisas u bormaimo suru edidre, goglmara i God nono topo si ikne edidre, nono tadeglmeno gugl ede noro kodugwa. 8 God nono dem muduo podo kide noro, nono yoko kaima ere wakai ere norsre, ama taragl kane kane pre kan eraiglmedi nomane wakai noro kodugwa.

9 Ana God ere mogl, yene pre kan erumere yoba okna ka ta di tekrumere nono erme obuno di norukwa. Ka i, ye Jisas mina kogon siragl mere eragledi prukwa i pre diga. 10 God Jisas mina kogon ta eragledi prukwa i, yegl paugwa, God ye ege ta padigl kodugwa i unan, Jisas yene taragl mudu heven ibo meglkwa, ya te dumo makan mina meglkwa i, i swara ede bitno morabedi di paduglkwa i pre diga.

11 Ana God siragl ta eragledi prukwa i, yene prumere keme ege ege erukwa. Yegl pre okna kaima ibo yene prumere Jisas kogon erabara i mina nono ye gagiglma moraiglmedi kere i pere edugo, erme ye gagiglma munga. 12 God nono mudu kere i pere edugwa ba no Juda yoba, God Kere Yugwa Yagl komono kana pre medunga. No Juda yoba komono kana pre medunara mina God ye swara wakai kaima moglmedi kagie kade inabuka. 13 Te, ene Efesus yoba, yugubono pere meda meglkwa i, God kamo kaima i ene ama prikwa. God kamo kaima we diga i, God kamo wakai, ye ene ere inabuka pre dugwa i, pre diga. Ana ene ka i prisre, pre mediglkwa igne, ene ama ede u God Kere Yugwa Yagl yugobunomo mina suna wigwa. Ene pre mediglsre, ede u Jisas yugobunomo suna wigwa i, nogugl panabedi God ene muno gane mere yegl padigl togwa. Muno gane i, ye Mudu Murubuglo togwa i pre diga. Ye okna ka kaima di te padiglsre, yoba Mudu Murubuglo tenagle dugwa i, ene pre mediglkwa igne te kodugwa.

14 Ana God Mudu Murubuglo nono norukwa i, taragl kane kane okuo inaiglmedi konbauna mere yegl yauro norukwa. Nono sugl mun, God nono ye bogl akie moramnedi nono agre i ede heven ibo enabuka igne, nono God yobama munga i, taragl mudu i inamga. Yegl pre nono ye swara wakai kaima moglmedi kagie kade tenamga paugwa.

15,16 Na ene Efesus yoba kano digo, prika i, ene Yaglno Kade Jisas pre medigl pai moglsre, God yobama mudu deno muduno tedre, erimiwe digo, prika. Yegl pre na ege ege God di wakai yei tedre, ene pre ege ege kamage ere moglka. 17 Na ene pre ege ege Neno Kade God, ye wakai kaima moglsre, nono Yaglno Kade, ye Kere Yugwa Yagl Jisas Godmo moglkwa i, agle di prika. Na ege ege agle di prika i, God ene nomane tedre, ene ye kamo pre pogl sinaiglmedi eran, ene ye siragl mere moglkwa i pre kan eraiglkwa pre kamage erika. 18 Te, na ama ene pre kamage ere moglka i, God ene nomano mina pre pogl sinaiglmedi eran, ye taragl wakai kaima nono noragledi agle didre, te nono ye yobama munga pre nono taragl kane kane inaiglmedi di padigl kodugwa i, ene pre pogl sinaiglkwa pre na kamage ere moglka. 19 Na yegl kamage ersre, ama ene pre ege ege kamage ere moglka i, God ye ene nomane podo tenan, ye yobuglomo podo kide paugo, ye nono pre medunga yoba munga i ake ple di noragledi kogon giglede ere moglkwa i, ene pre pogl sinaiglmedi na God agle di prika.

20 God ye ama yobuglomo podo pamara i mina, ye Kere Yugwa Yagl Jisas ere i kor ede, agre i ede heven ibo ogwa. Agre i ede heven ibo pidre, ye kagie kade tedre, ogo wo kra ame dinabedi ere edugo, ame dugwa. 21 Jisas ye God ogo wo kra ame di moglkwa i, kagie podo kide paugwa. Angelo mo murubuglo mo yoba ta ye kade mogl, yobuglno podo paugo, yoba ta suglno meglkwa i mudu Jisas moglmara atne kra meglko, Jisas swara mogl mitna kaima ede moglkwa. Ege erme munga i ya te, okuo moramga i, yoba swara ta mogl mitna ede, Jisas ta egre atne edekrabuka. Jisas swara kagie kade aimadi kamun panabuka. 22 God ye Jisas kagie kade togwa i, yoba ya taragl mudu atne kra meglbi, Jisas swara mogl mina ede morabedi ersre, nono ye yugobunomo munga i, ama Jisas swara nono bitno morabedi norukwa. 23 Nono Jisas yugobunomo mina munga i, ye nono bitno moglko, nono ye moglmara atne kra munga. Jisas ye dumo uglo koglo koglo mogl kuno erse, nono munara mogl noro, murubuglono mina ama nono si kau si norukwa.