1 Ene Galesia yoba du erimo? Ira ene kinano sume? Jisas Krais ede prak mina goglmere i, na nogugl kaima beke teigo, ene mudu pre poria sigwa. 2 Na ka kira ta poraglka. Ene Mudu Murubuglo igwa i, ene God lomo duglo boglsre, imo mo Jisas kamo di teigo, pre mediglsre, ime? I ta dio!

3 Ene komono kana God Murubuglomo swara yobuglo bogl norumedi prisre, wan meglkwa ba erme enene yobuglno mina wanaiglmo? Ene du erima!

4 Ene ka wakai i kide kodibi, okna ene yubun mere igwa i, siragl mere erabe? Mem wakai ta paikrabuka. 5 Na ka kira ama ta poraglka. God Murubuglomo ene tedre, meglmara kimagl erukwa i, Ene God lomo duglo beglko, erumo mo Jisas kamo dumgo, pre mediglkwa pre kimagl erume? I ta dio!

6 God kamo Abraham pre dugwa i, prio,

God ka kaima dumedi Abraham pre meduglko, God ye pre meduglkwa i kandre, yoba du moglmedi kanume*

dugwa. 7 Yegl dugwa pre yoba ta pre medraiglkwa i keme ye Abraham gawama kaima moraiglkwa.

8 Okna ibo God pre kan ere kodo, Jentail yoba pre mediglbi, ye ama yoba du meglmedi kanaluwe di prukwa. Prisre, ye kamo mina Abraham ka wakai yegl di togwa,

Yugobuno pere pere uglo koglo koglo meglkwa i, na ene mina ere wakai ere tenaluwe*

dugwa. 9 God okna ibo yegl dugwa pre nono pre pogl sinamga. Abraham ye God kamo pre meduglko, God ye ere wakai ere tomere yegl, yoba ira ta God kamo pre medraiglkwa i, God ye ama ere wakai ere tenabedi pramga.

10 Ba yoba God lomo duglo boglsre, God gumuglo mina yoba du moramnedi erikwa i we, God ye ere kide ere tenabuka. I siragl pre ye kamo mina okna ibo yegl beglkwa paugwa,

God lomo, yoba bogl atne edigwa i, yoba ta lo mudu ege ege duglo boglkran, God ye ere kide ere tenabiwe*

dugwa. 11 God kamo nogugl kaima yegl dugwa pre yoba ta lo duglo boglsre, God gumuglo mina yoba du morabuka swara kaima ta moglkrukwa. Mabuno i pre God kamo bage ta ama yegl dugwa,

Yoba pre mediglsre keme, du mogl, kor aimadi moraiglmiwe*

dugwa. 12 Te, nono pramga, yoba lo duglo boraiglkwa mabuno i ya God kamo pre medraiglkwa mabuno i, pai pere pere edibrika. God kamo bage ta yoba lo duglo boraiglkwa pre dugwa i, yegl dugwa,

Yoba ta lo duglo borabuka i, ye lo mudu duglo boglsre, keme kor morabiwe*

di, yegl dugwa.

13 Lo mudu duglo boglkrumga pre God nono ere kide ere norabuka keme paugwa ba nono ere norabere Krais ere togo, Krais u ede prak mina goglsre, nono topo si ikne edugwa. I pre God kamo mina yegl beglkwa,

Yoba ta ede mina si padiglbi, yoba kandre, God ye yoba i ere kide ere tomedi kanaiglmiwe*

dugwa.

14 Krais nono topo si ikne edumara i, God Abraham di wakai yei togwa ikra, Jentail yoba ama igwa. Te, nono Mudu Murubuglo inaiglme dugwa i, pre mediglsre, inaiglmedi nono topo si ikne edugwa.

15 Agrama abarama wagle, nono mabunono pamere i pre dinaglka. Yoba suo mogl, ka ta di padigl, kagno bogl kodibr, ka i gigle di kodugwa pre u ta enabedi pribi, kuno ta erekrabuka. Ka i gogl kodugwa. 16 Te, God okna kibo Abraham promis ta ere tedre, ye Gawamo pre dugwa i, ka i ama gogl kodugwa. Ba ka i, Abraham gawama mudu pre dikre, Gawamo swara pre dugwa. Te, Gawamo swara i, Krais pre dugwa.

17 Ka i gogl kodume diga i, God Abraham promis ere togwa i, bugla yugu 430 ede ogo, Lo okuo ugwa pre promis i ta si atne edekrabuka. God promismo i, pai morabuka.

18 Abraham Gawamo nono pre ugwa i, God promis yoko kaima ta Abraham ere tomara i mina ugwa. Ba ene lo duglo beglbi, unabe duma, ye kaima lo bogl akie ubriko.

19 Ana God lomo togwa i, mem wakai ta pamo? Owo, yoba tadaglme erumnedi praiglkwa pre togwa ba God Abraham Gawamo ta unabe di paduglkwa ikra, unan, lo kogonmo dudunabuka.

Ana God lo togwa igne, ye angelo dedugo, ye ka kep ere, i pi Moses di teigwa. 20 Ba God Abraham promis togwa igne, angelo dedekrukwa. Yene pi di togwa pre ka kep yoba mere yegl ta suna morabuka i, ta paikrukwa.

21 Ana God lomo kide paugo, God promismo wakai pamo? Ka kaima ta manugwa. I siragl pre God kamo mina, Ene lo duglo bogl moglsre, aimadi kamin kor moraiglme ta duma, ka kaima God lomo duglo bogl mogl, God gumuglo mina du mungo. 22 Ba God kamo dugwa i, yoba mudu tadaglme mina kane paime dugwa pre Jisas Krais pre mediglsre, keme God promismo inaiglkwa paugwa.

23 Okna ibo Jisas kamo ede nogugl ukrukwa igne, God lomo yoba si kane sidre, bitno moglkwa. Jisas pre medraiglkwa nomane i okuo unabuka pre bitno moglkwa.

24 Krais okuo unan, ye pre medigl God gumuglo mina du moramga pre okna Lo bitno moglkwa. 25 Ba Jisas pre medramga erme ede nogugl ugwa pre lo bitno moglkrukwa. 26 I siragl pre ene Krais Jisas pre mediglmara i mina ene God gagiglma mogl kodigwa.

27 Ene prio! Yoba ede nigl atne eimere mere ene Krais moglmara ede atne pi kodigwa. Te, yoba kugugl gagl edimere mere yegl, ene Krais kugugl gagl mere yegl edigwa. 28 Yegl pre God ene okna meglmere meglmedi kankrukwa. Okna ene tau Juda yoba meglko, tau Grik yoba meglkwa. Te, ene tau kane padre, yoba kogono eriko, tau yoko meglkwa. Te, yagl tau meglko, abu meglko, erukwa. Ba erme God ene yegl mere meglmedi kankrukwa. Ene u swara pi Krais Jisas yobama meglmedi kanugwa. 29 Te, ene Krais yobama meglkwa i pre ene Abraham gawama moglsre, God Abraham promis ere togwa i, ama inaiglkwa.