10 Milagres de Jesus na Bíblia: Lista com versículos e explicação

I’see xhyan çaxırelqa sak’al ha’a

1 Mançine xhebıd’esde yiğıl Galileyayne Kana eyhene şaharee davatbı eyxhe. I’sayna yedir maa yeexhe. 2 I’sayka sacigee Cun telebabıb davatbışeeqa qopt’ul vooxhe. 3 Məxüd eyxhe otxhan-ulyoğane gahıl çaxır g’aat’an. I’sayne yedee Mang’uk’le eyhen:

– Manbışiqa çaxır axu deş.

4 I’see eyhen:

– Yed, mançike şas hucoone? Yizda gah qabı deş.

5 I’sayne yedee nukaraaşik’le eyhen:

– Mang’vee şok’le hucooyiy uvhu, şu man he’e.

6 K’anya’ad Yahudeeşe gicəpxı’ybı alyaat’an g’ayeyke hı’iyn yixhılle xədın g’ab eyxhe. Mane g’abbışde sançeeqa molyts’al-vəşşe g’alle (80-120) litra xhyanın əə eyxhe. 7 I’see nukaraaşik’le eyhen:

– Man g’abbı xhinen gyatsts’e’e.

Manbışe g’abbı ghalelqamee gyatsts’a’anbı. 8 Mang’vee nukaraaşik’le meed eyhen:

– Həşdiyle sık’ınin alyaat’u, tamadaysqa ıkkee.

Manbışed ıkkekkan. 9 Tamadar çaxırelqa sak’al hı’iyne xhinene dadıqa ilyakkana. Mang’uk’le man nençe adıvacad ats’a deşdiy. Man saccu xhyan alyaat’uyne nukaraaşik’leniy ats’a. Tamadee tsuma qort’ul eyhen:

10 – Gırgıng’vee ts’etta yugun çaxırxhe helen. Qiyğa mihmanar yugba qeepxhamee, pisınxhe çaxır qadayle. Ğumee yugun çaxır həşdilqamee havacıyn.

11 I’see Galileyayne Kana şaharee man ts’ettiyn əlaamat hagu, Cuna axtıvalla haagva. Telebabışed Mang’ulqa inyam ha’a.

I’see bı’rq’ı’na yug qa’a

1 I’sa yəqqı’lek’ena əlyhəəmee, bı’rq’ı’ra yedike ıxhana insan qızaxxa. 2 Telebabışe Mang’uke qiyghanan:

– Mə’əllim, şavaane bınah hav’u, insan bı’rq’ı’ra yedike ıxha, vuceene, deşxhee dekkeeyiy yedeene?

3 I’see alidghıniy qele:

– Man, mang’uneyiy mang’une dekkıneyiy yedine bınahıl-alla deş məxüd ıxha. Allahın işbı mang’une ı’mree g’acecenva məxüd ıxha. 4 Yiğne yiğın şi, Zı G’axuvuyng’un işbı ha’as ıkkan. Xəm qooxhe, manke şavussecad vuççud ha’as əxə deş. 5 Zı dyunyel ıxhaylette, Zı dyunyeyn Nur vodun.

6 Manva uvhuyle qiyğa, I’see ç’iyelqa tyu g’a’adaççe, tyuyuke battağ hı’ı, bı’rq’ı’ne insanne ulelqa qadağva. 7 Qiyğa mang’uk’le eyhen:

– Hark’ın, Şiloah eyhene hovuzee əyxre.

(Şiloah «g’axuvuna» eyhen vodun.) Bı’rq’ı’nar hark’ın əyxərna. Ules işix qadı, mana yı’q’əlqa siyk’al. 8 Delesınbışeyiy, mana kar sa’ana xhinne ats’anbışe eyhen:

– Mana şenke gyu’ur kar sa’ana dişee?

9 Sabaranbışe «Mana vor», mansanbışe «De’eş, mang’uk akarırva» eyhe. Vuceeme «Zı vornava» eyhe.

10 Manbışee qiyghan:

– Nəxüdne yiğne ules işix qadı?

11 Mang’vee eyhen:

– I’sava eyhene sang’vee battağ hı’ı, yizde ulelqa qadğu, qiyğar zak’le «Şiloah eyhene hovuzeeqa hak’ne, əyxreva» uvhu. Zınar hark’ın əyxı’rna, ulesıd işix qadı.

12 Manke manbışe «I’sa nyaane vorva?» qiyghan. Mang’veeme «Ats’a deşva» eyhe.

I’see xhod aazır adamiy ats’ya’a

13 Man g’ayxhı, I’sa lotk’eeqa gyu’ur vuşucar deşde sa cigeeqa ayk’an. Şaharbışeene insanaaşik’le Mana nyaqa ark’ıniy ats’axhxha, Mang’uqab qihna iviykar avayk’an. 14 I’sa lotk’eençe giç’uyng’a, Mang’uk’le maqa sadıynmeen millet g’acu, manbışis rəhı’m qavayle. Mang’vee maabın vuk’aranbı yug qaa’anbı.

15 Exha qexhemee, I’sayn telebabı Mang’usqa qeepxha eyhen:

– İnyaa hiqiy-alla vuççud deşin. Gecdad vod. Millet g’aykke hapk’ın hiqiy-allane xivaaşeençe cosun oxhanasın kar alişşecen.

16 I’seeme manbışik’le eyhen:

– Imaak’ancen manbı. Manbışisın otxhuniy şu hele.

17 Telebabışe I’sayk’le eyhen:

– İnyaa şaqa xhone gıneyleyiy q’öne baluğule ğayrı vuççud deşin.

18 I’see «Şoqa vodun Zasqa qaleva» eyhe. 19 Milletık’led «Şunab ok’ul gyuv’reva» eyhe. I’see Vuce xhoble gıneyiy q’ölle baluğ aqqı, xəəqə ilyakkı, Allahıs şukur haa’a. Qiyğad man gıney hatq’ur telebabışisqa qele, telebabışed man milletıs bit’al ha’a. 20 Gırgınbı otxhun avts’uyle qiyğa, yits’ıq’vəbleb (12) xəbna gyavts’una ç’emç’e hexxada axuyne gıneyna saa’a. 21 Uşaxariy yedar qı’dəbəqəxhee, man otxhuniy xhone aazırılqa ılqəəne insanee otxhun.

I’sa xhinel iykar

22 I’see mankecab Cun telebabı ulyookanbı lotk’eeqa gyuv’ur şene aq’valqa ılğeepç’es. Vucur, insanar mançe əlyhəəsmee maa axva. 23 I’sa cəmə’ət atk’ıniyle qiyğa, Vuccar axumee, exheeqana düə haa’asva suvalqa ılqeç’e. 24 Mane gahılqasse lotk’a mane cigayke əq’əna qıxha eyxhe. Manbışde suralqa mıts aa’ava, lotk’aylek’enad mırtar qiyxhar ıxha. 25 Miç’eed qixhesse, I’sa goleene xhinel iykar, manbışisqa qarayle. 26 Telebabışik’le Mana xhinel oo iykar g’acu, qəvəyq’ənanbı. Manbı qəpq’ı’n ts’irbı ha’a:

– Man rı’hı’d!

27 Mankecar I’sa manbışika yuşan ha’a giyğal. Mang’vee manbışik’le: «Qı’məəq’ən, Zı vorva» eyhe. 28 Pyoturee Mang’us inəxdun cuvab qele:

– Yizda Xərna, Mana Ğuxheene, zak’le xhinel oo iykar Vasqa «Qorava» eyhe.

29 I’see «Qorava» eyhe. Pyoturur lotk’eençe qığeç’u xhinel oo iykar I’saysqana ayk’an. 30 Mıts it’umba aa’a g’avcu, mana qərq’ı’niyvalin xhinek avqa əə giyğal. Manke «Yizda Xərna, zı g’attixhan he’eva!» mang’vee ts’ir haa’a. 31 I’see mankecad xıl hotku mana aqqaqqana. I’see mang’uk’le eyhen:

– K’ılda inyamnana, nya’a ğu ək’leeqa əxəsee-dəxəseeva qali’ı?

32 Manbı lotk’eeqa ılqeepç’ımee mıts k’ıl qooxhe. 33 Lotk’eebınbışe «Ğu hək’erar Allahna Dixırva*» uvhu Mang’us k’yoozaranbı.

I’see qik’una Lazar üç’ür qa’a

1 Lazar donana sa insan ık’iyk’arna. Mana, Mayramiy cena yiçu Marta yeexhene Bet-Anya eyhene xiveençe ıxha. 2 Yişde Xərıng’ulqa yugun evanan q’ış qadğu, Mang’un g’elybı ç’ərbışika qeqqu’una, mana Mayram yic yixha. Məng’ı’na çoc Lazar ık’ar ıxha. 3 Mançil-alla q’öne yiçvee «Xərna, Vas ıkkanna insan ık’ar vorva» I’salqa xabar g’uxoole.

4 I’sayk’le man g’ayxhı, eyhen:

– Mane ık’arın hapt’ıy deş heles. Allahna axtıvallayiy Allahne Dixena axtıvalla mane ık’aarıleğana geeb qaa’as.

5 I’says Martar, cena yiçur Mayramır, Lazarır geeb vukkan vuxha. 6 Lazar ık’arva g’ayxhımee, Mana maqa hayk’an deş. I’sa Vuc arıyne cigee q’ölle yiğnar axvana. 7 Qiyğa Mang’vee Cune telebabışik’le eyhen:

– Meeb yı’q’əlqa Yahudeyayeeqa əlyhəəs.

8 Telebabışe Mang’uk’le eyhen:

– Mə’əllim, şaane Yahudeeşin ç’ak’ınbışis Ğu sık’ırra ögil g’ayeqqa helesiy ıkkan. Vas maqa sak’alasne ıkkan?

9 I’see alidghıniy qele:

– Yiğ yits’ıq’vəble (12) sə’ətna dişde eyxhe? Yiğniyiğın iykarna qaçayxar deş, mang’uk’le ine dyunyeyn işix g’ece. 10 Xəmde iykarname, miç’axdava qaçayxarna.

11 Man uvhu ç’əvxhayle qiyğa, I’see manbışik’le eyhen:

– Yişda hambaz Lazar nik’ee vor ark’ın. Zı mana oza qa’as ı’qqə.

12 Manke telebabışe Mang’uk’le eyhen:

– Xərna, mana nik’eexheene, yug qixhesda.

13 I’see mana qik’u ıxhay uvheeyid, manbışisqa həməxüd qayle, mana nik’eeqa ark’ınvaniyxan uvhu. 14 I’see manbışike vuççud dyugul hidi’ı eyhen:

– Lazar qik’una. 15 Vuşdemeeyiy, şu inyam hı’iynemee, Zı şadra vor, maa dexhava. Qudora, mang’usqa vüqqəs.

16 Q’ömkale donane Tomasee mansa telebabışik’le eyhen:

– Vüqqəs, şinab yişde Mə’əlimıka hapt’as.

17 Maqa arımee, I’sayk’le Lazar nyuq’vneerın yoq’ulle yiğva ats’axhxhe. 18 (Bet-Anya İyerusalimıs k’ane vuxha. Mane şaharbışde yı’q’nee xhebne kilometırılqa ələəna yəq vuxha.) 19 Geeb Yahuder Martaysiy Mayramıs çoc qik’uva baş-sağlığıyvalla hevles abayle. 20 Martayk’le I’sa arıva g’ayxhımee, Mang’une ögilqa qığeeç’e. Mayramme xaa eexva.

21 Martee I’sayk’le eyhen:

– Xərna, Ğu inyaa ıxhanaxhiy, yizda çoc qik’as deşdiy. 22 Zak’le həşded ats’an, Ğu Allahıke hucoo heqqiy, Mang’vee Vas helesın.

23 I’see məng’ı’k’le eyhen:

– Yiğna çoc üç’ür qixhesda.

24 Martee Mang’uk’le eyhen:

– Zak’le ats’an, üç’üb qeebaxhene gahıl, nekke qiyğiyne yiğıl manar üç’ür qixhesda.

25 I’see məng’ı’k’le eyhen:

– Üç’üb qeepxhayiy I’mı’r Zı vorna. Zalqa inyam hı’ına qik’veeyir, üç’ür qixhesda. 26 Gırgın üç’übınbı, Zalqa inyam ha’anbı mısacab hapt’as deş. Ğu mançilqa inyam ha’anne?

27 Martee Mang’us alidghıniy qele:

– Ho’o, Xərna, zı inyam ha’an, dyunyelqa qalesda Allahna Dix, Masih* Ğu vorna.

28 Martee manva uvhuyle qiyğa, ark’ın dyugulenra yiçu Mayram qort’ul, eyhen:

– Mə’əllim inyaa vor, ğu vor qeet’al.

29 Mayramık’le man g’ayxhımee, zaara oza qiyxha, I’sayne k’anyaqa qiyeele. 30 I’sa xiveeqa ikkideç’u, Marta Cune ögilqa arıyne cigee axva. 31 Mayramıka sacıgeene xaane məng’ı’s baş-sağlığıyvalla hoolene Yahudeeşik’le mana zaara g’aqa qı’ğəə g’aycumee, manbışik’le məxüd ats’axhxhe mana geeşesva nyuq’vnesqa yı’qqə yixhes. Mançil-allab manbı məng’ı’qab qihna avayk’an.

32 Mayram I’sanane cigeeqa qarı, Mana g’acu, g’elybışeeqa qık’york’ul, eyhen:

– Xərna, Ğu inyaa ıxhanaxhiy, yizda çoc qik’as deşdiy.

33 I’sayk’le manayiy məng’ı’ka abıyn Yahuder gyaaşe g’avcumee, Mang’vee it’umda aq’va qa’a. 34 I’see manbışike qiyghanan:

– Qik’una nyaqane gixhxhı?

Manbışe eyhen:

– Xərna, qora ilekke.

35 I’sa geşşena. 36 Manke Yahudeeşe eyhen:

– İlyaakende, Mang’us mana nimeeyiy ıkkan ıxha!

37 Manbışde sassang’vee eyhen:

– Mang’vee bı’rq’ı’ng’un uleppı qı’ı. Nya’a, Mang’usse mana insan qidek’asın kar ha’as dəxəyee?

38 Mane gahıl I’see meed aq’va qı’ı, nyuq’vnene k’anyaqa ayk’an. Lazarna nyaq’v mağaree vuxha. Mançine ghaleeqab g’aye gyuvxhu vuxha. 39 I’see eyhen:

– G’aye g’avşe.

Qik’uyng’une yiçvee Martee Mang’uk’le eyhen:

– Xərna, eva ıxha ixhes, mana qik’uyn yoq’ulle yiğ vod.

40 I’see eyhen:

– Nya’a Zı vak’le uvhu dişde, inyam he’ee, Allahna axtıvalla g’avcesda?

41 Məxüb g’aye g’ooşena. I’sa xəəqə ilyaakı, eyhen:

– Dek, Zı uvhiyn Vak’le g’ayxhıva, Zı Vas şukur haa’a. 42 Zak’le ats’an, Vak’le gırgıne gahbışilycad Zı uvhiyn g’iyxhen. Zı man uvhiyn, Yizde hiqiy-allane milletın Ğu Zı g’axuvuva inyam he’ecenva.

43 Manıd uvhu, I’see axtıda eyhen:

– Lazar, g’aqa qığeç’e!

44 Qik’unar g’aqa qığeç’ena. Mang’une g’elybışil xıleppışil kafan alipk’ır, aq’vad desmalee hitk’ır eyxhe.

I’see manbışik’le eyhen:

– Mang’un g’elybı-xıleppı eeqe, hooracen.