1 İnbıd Sıleymanee uvhiynbı vod. İn uvhiybı Yahudayne paççahne Xizqiyanne insanaaşe sı'ı.

2 Allahna xəbvalla Cun işbı dyuguli'iy vod,

paççahaaşina xəbvallab man işbı ats'axhxhay vod.

3 Xəəna axtıvalla, ç'iyena k'oraalla,

paççahaaşined yik'eençe ı'lğəənbı ats'axhxhes dexhe.

4 Nuk'rayke hexxan kar ts'ayika cure'eene,

mançike it'umun k'ola ixhes.

5 Məxürur, pisda paççahıke cure'eene,

mang'una taxt qopkuvalika it'umuvxhesda.

6 Paççahne ögee ğucar-ğu axtı qıma'a,

doyukanbışde yı'q'nee ciga uvqumaaqqa.

7 Hasre mang'vee vak'le eyhecen: «İnyaqa ılqeç'e»,

doyukanbışde ögee g'eliqqa helesse.

Vak'le g'acuyne karbışde hək'ee,

8 zaradacad məhkamee xıliynbı hıma'a.

Deşxheene, merıng'vee qiyğa vas naş qa'as.

9 Yiğın merıng'ukan məhkama ı'lğəəxhee,

merıng'un sir ımaaqa.

10 Deşxheene, g'ayxhing'vee vas naş qa'as,

mançin ğu gırgıne gahbışis hı'rmatıle g'a'arçes.

11 Cigal uvhiyn cuvab,

nuk'rayne g'abılyne k'ınəəğəyne eçeeşik akar.

12 K'orane ək'elikang'vee aq'val uvhiyne cuvabıl k'ırı iliyxheng'unemee,

man k'ınəəğəykena tene xhinne vob.

13 I'htibarıkana insan vuc g'axuvuyng'unemee

pırane gahılin mık'an xhyan xhinne vor.

Mang'vee cune xərıng'un yik' cigeeqa qalya'a.

14 Vuşuyiy vucee hidevuyne paybışil-alla, huvuyn xhinne xərra yuşan ha'a,

mana gyoğiy deşde bılıdbışik, mıtsık akar.

15 Paççahnab fıkır sabırnang'vee badal haa'a,

ittune mizen bark'ub g'üvəna qaa'a.

16 İtv aveykee, man hexxada umoyxhan,

deşxheene, halya'asda.

17 Hambazne xaaqa k'ırra hak'ne,

deşxheene, mana vale orzul, ğu g'ımece qixhes.

18 Merıng'une məhkamee aq'val horaka ulyorzulyna,

nizeyk, gılıncık, ek'ne vukuk akar.

19 Xaainılqa dağamne yiğıl yı'q' qizzıriy

qiçiyne siliyka kar otxhuniykiy k'aane g'elika iykıriyk akar.

20 Yik'ee derdnang'us mə'niy qəpqiy,

mık'adanang'a ts'eler g'alerçuyk,

soodalqa sirka k'i'iyk akar.

21 Duşman mıssıraxhee, oxhanasın hele,

xhyan ıkkanxhee, ulyoğasın hele.

22 Məxüd ğu mang'us naş qa'as*,

yiğna yugvallab Rəbbee savaak'al haa'as.

23 Şimalıle aa'ane mıtsın gyoğiy adayle,

ing'ulena-şeng'ulena haa'ane mizenıb qəl abayle.

24 Aldeexhvanne xhunaşşeyka sa xaa axvasse,

daxayne vuttul axuy çile yugda vod.

25 Xhyanıka gyorxhanang'us mık'an xhyan nəxüdiy,

əq'ənane cigeençena yugna gafıb həməxüb vob.

26 Qorkuna pisıng'vee eyhençilqa qööxhee,

mana alitq'ılıyn xhyan ı'lqəəne cigayk,

mı'q'ı'n gyavts'uyne kahrızık akar qexhe.

27 Hexxada itv otxhuniy yugda deşin xhinne,

cuna axtıvallacab t'abal hav'iyid yugda deş vod.

28 Cuna qəl avqas dəəxəna insan,

cabırbı hı'ğətkırne şaharık akar.