1 Aq'veeqa uvhiyne cuvabıke vuşuyiy hı't'iy qexhe,

məxrına sayangara haq'varasda, mısacarır yug qixhes deş.

2 Qopkuynbı geeb qeebaxhemee, millet şadexhen,

pisda xərna qarımeeme, millet heghan.

3 K'orana ək'el vukkanang'vee dek şada'a,

yəqqı'le qığeepç'iyne zəiyfabışika hambaziyvalla haa'ana vuççud dena axvas.

4 Paççahee ölka qopkuvalika it'umaa'a,

geed ruşvat alyaat'ang'veeme ölka q'əra qaa'a.

5 Şavaayiy merıng'us ittune mizeka hor ha'a,

mang'une g'elybışeeqa tor ayhe.

6 Pisıng'una bınah cusdacab gugu vobna,

qorkung'vee şadvalin ts'ir haa'a.

7 Qorkuna məhkamee kar deşing'une sural ulyoyzar,

pisıng'ulqa man hiyxhar deş.

8 Matsxarabışe şahar alivku-givkaa'ana,

k'orane ək'elynanbışeme qəl avaak'an haa'a.

9 K'orane ək'elynang'vee beynyava məhkameeqa huvee,

beynyaveeme qəlın mana demalqa gixhxhes, ghal sa'as deş.

10 Eb k'yaa'ang'uk'le məttın yik'nanbı g'umooce vooxhe,

mang'us qopkuynbıb gyapt'as vukkiykan.

11 Beynyavayn qəlın nen-qadiy ha'an,

k'orane ək'elynang'veeme, vuceecar-vuc aqqaqqana.

12 Xərıng'vee horal k'ırı iliyxhexhee,

mang'un gırgın insanar pisınbı vuxhes.

13 Kar deşdayiy mebınbı hooç'an-g'ooç'anna sa karee akar –

Rəbbee q'öng'unesana ules işix huvu.

14 Paççahee kar deşinbışis qotkuyn məhkama huveene,

mang'una taxt gırgıne gahbışil it'umba vuxhes.

15 Çümqı'niy aq'veeqa uvhiyne cuvabın k'orana ək'el hoole,

yik'es ıkkanan ha'as hassırne uşaxee yed k'ap'ik'ıle avqa qee'es.

16 Pisınbı geeb qeepxhamee, bınahbıd geed qeedaxhe,

qopkuynbışik'leme manbışin hapt'ıy g'acesın.

17 Dixes terbiye hele, vas vaxxariyda ixhecen,

mançin yiğın yik' şada'as.

18 Xəənçen cuvab deşdang'a, millet yəqqı'le qığeç'en.

Q'aanunul k'ırı iliyxhena nimee baxtivariy!

19 Həmbalıs saccu cuvabıka terbiye heles eyxhe deş,

mang'ulqa man hitxhıreeyid, k'ırı alixhxhes deş.

20 Ghalyaqa qadıyn eyhena insan vak'le g'acunane?

Beynyavalqa mang'ule geeb umud vob.

21 K'ırranançile otçu həmbalıs ıkkanan-ıkkanan huveene,

qiyğa man yugdacad ixhes deş.

22 Qəlnang'vee saç'ivkuy adaççe,

zara qoyxharang'veeyib geeb bınah haa'a.

23 Vuceecar-vuc xərra ıkkiyn avqana qa'a,

vuk'ul avqa avquynme hı'rmatnana ha'a.

24 Sixnariyka sarçuna cunacar duşman vorna,

məhkamee k'ın g'aysıreeyid, qotkuyn eyhe deş.

25 İnsanaaşile qəyq'ənang'vee cusdacab gugu haa'a,

Rəbbilqa yı'q' qizzırname xıl hidiyxharne suvaylin xhinne ixhes.

26 Geebınbışis paççahısqa gyapk'as vukkiykan,

qotkuyn məhkamame insanık'le saccu Rəbbisnee iveeke.

27 Qopkuynbı quç'opkurne yəqqı'nbışile həlyvəəq'ən,

pisınbıb – qopkuyne yəqqı'nbışile.