1 Saç'uvkiy deşda qit'ipk'ınna xüvə,

aldapxhıniynane otxhun-ulyodğuyle ittuba vob.

2 Ək'elikane həmbalee, karaı'dəəne iyesiyne dixes xəbvalla haa'as,

iyesiyne uşaxaaşikab mang'vee mirasna pay alyapt'as.

3 K'ınəəğəynayiy nuk'rayna yugvalla ts'ayika vaats'a vooxhe,

Rəbbeeyid insanın yik' siliys ı'xiyxə.

4 Karaı'dəəna insan pisıng'une ghaliqa ilyakka,

horalayeeyid ver ablyaa'ane mizel k'ırı iliyxhe.

5 Kar deşing'ule əqəna ha'ana, mana İrxıning'uk'le cuvab eyhen xhinne eyxhe.

Merıng'une vuk'lelqa qadıynçile şadexhena, cazaa dena axva deş.

6 Nevabı q'əsınbışin tac vodun,

dixbışis hı'rmat cone dekkaaşil-alla giviyxhe.

7 Uftanna gaf beynyavayk idyvaak'an xhinne,

xərıng'ukıd horbı avaak'a deş.

8 Ruşvat heleng'une ulesqa man cadu xhinne qöö:

mana nyaqa ark'ınee, iş qooxhena.

9 Hambaz ıkkanang'vee bınah yik'el hivxan haa'a,

yik'el qavaalya'ang'vee hambaz agval ha'a.

10 Aq'veeqa uvhiyne cuvabın ək'elikane insanın aq'va-xhane,

beynyavays üvxüyne vəşne çümqüle geed gyoxhxhan ha'a.

11 Alikkı-gikkiy adaççene insanee pisın kar t'abal ha'a,

mang'ulqa it'umna cazaa g'axuvles*.

12 Balabı dena avxuna syo qızaaxiy,

beynyavavalika gyatsts'ıyne beynyava qızaxxiyle yugda vod.

13 Şavaayiy merıng'us yugun hı'inçil-alla pisın he'ee,

məxrıng'une xaançe pisvalla əlyhəəs deş.

14 Saç'uvkiyn gidğılıy bendık ciga hı'iyk akar.

Saç'uvkiy giğalasse, man ç'əv he'e.

15 Bınahnana, bınah deşda xhinne haguy,

bınah deşing'ulqab, bınah qav'uy –

man q'öyudsana kar Rəbbik'le g'ımece vod.

16 Beynyavayqa pıl ixheeyid,

mang'usse mançika k'orana ək'el alivşes vəəxəs deş.

17 Hambazıs hammaşe ıkkiykanna,

çocur dağamne yiğıs iyxhanna.

18 Saccu beynyavee, merıng'un şib

cune gardanaqa alyaat'a.

19 Aldatxhuniy ıkkanang'us, bınahıb vukkiykanna.

Şavaayiy cus ç'ak'ın, axtın akkabı giyxhe, mang'vee culqa balyaa hoot'al.

20 Yik'ee bicvallanag'uk'le xayir aveekes deş,

hor ha'ane miznang'vee culqa ver ablyaa'a.

21 Bəç'ərne dekkee cune vuk'lelqa ver ablyaa'a,

beynyavayna dek şadexhena deş.

22 Şadne yik'en darmanın xhinne yug qaa'a,

hatq'urne yik'enme bark'vbıd qı'ç'a'anbı.

23 Pisıng'vee qotkuyn məhkama alikka'asva,

ruşvat xhıtyxhalis ı'xiyxə.

24 Kar ats'ane insanın uleppı k'orane ək'eliqa ilyakka,

beynyavaynme uleppı, nyaqa qadiy ilyakka.

25 Beynyava dixee, dekkıs derd hoole,

yedilqad divan allya'a.

26 Qorkune insanıs cazaa huvuy yugun deş vod,

xərıng'usub qotkuda hı'iyne karal-alla çümq üvxiy yugun deş vod.

27 Geed ats'ana k'ırra yuşan ha'ana,

ək'elikang'usub zaraba qəl vooxhe deş.

28 Beynyava yuşan hidya'amee, ək'elynana xhinne g'ece,

mang'vee ghal idyaaqee, ats'alynana xhinne ixhes.