1 Yizda dix, zı vas xət qı'iyn yik'elixan hıma'a,

yik'eeyid yizın əmrbı aqqe.

2 Mançin yiğna ı'mı'r xıliy qaa'as,

vas gyavts'u-gyuvxhuna ı'mı'r hevles.

3 Hasre vake yugvallayiy qopkuvalla ımaak'ancen,

manbı gardanançe givaxne, yik'eeqa ok'ne.

4 Manke Allahısır, insanaaşisır ğu ıkkiykanasda,

vaqad yugun do ixhes.

5 Yik'eençe Rəbbilqa yı'q' qizre,

yiğne ək'lelqa yı'q' qimiyzar.

6 Haa'ane gırgıne işee Rəbb qıvaats'e,

Mang'vee yiğın yəqbı qa'asınbı.

7 Yiğnecar ulesqa ğu k'orana ək'elynana xhinne qımayle,

Rəbbile qəq'ne, pisde karake əq'əna ixhe.

8 Mançin yiğın tan yug qa'as,

yiğın bark'vbıd it'uma'asınbı.

9 Rəbb yik'el qali'ı, yiğne karake,

şagavne ts'ettiynçike Mang'us hele.

10 Manke yiğın anbarbı karaka gyatsts'es,

çaxıren kuppıd qakkyak'anasınbı.

11 Yizda dix, Rəbbine terbiyeyka ooğançe avqa ilymakka,

Mang'vee cazaa hoolemee, yik' dena qımexhe.

12 Dekkee geer ıkkanne uşaxıs cazaa hoolen xhinne,

Rəbbeeyib ıkkanang'us cazaa hoole.

13 Hikmətılqa hirxhılyna,

k'orana ək'el avaykına insan nimee baxtivariy!

14 Mançiken xayir nuk'rayle geed vod,

in g'azanc məttıne k'ınəəğəyle q'iymatıka vod.

15 Mana gıranne ekebışileb gıranba vob,

mançika vas ıkkanan nencad kar sa aqqas dexhe.

16 Mançine sağne xılen xıliyna ı'mı'r,

solne xılenıd kariy axtıvalla hele ıxha.

17 Mançin yəqbı yik'es ıkkananbı vod,

gırgın yəqbı barakatnanbı vod.

18 Mançike alyt'ipq'ı'ninbışdemee mana ı'mrena yiv* vobna,

mançike it'umba alyt'ipq'ıninbı nimee baxtivarariy!

19 Rəbbee dyunye hikmətıka itxhın,

k'orane ək'elika xəybı hı'ı,

20 ats'aalika k'oralybışeençe xhyan alqavhu,

xəybışeençe çiy gyuarı'ı.

21 Yizda dix, yugne darrakayka, şu'urıka ixhe,

manbı uleke ak'an hıma'a.

22 Yiğnemee manbı yiğna ı'mı'r vuxhes,

micagın kar xhinne gardanaqa qa'as.

23 Manke yiğne yəqqı'n vaxxariyra ayk'an,

g'elybıd qıçdyayxar.

24 Qı'dərq'ı'n g'ılexha,

ittun nyak' hayle.

25 Sayangada vuk'lelqa qadıynçile,

pisınbışilqa vüqqəne verıle ğu qəq'ənas deş.

26 Ğu yı'q' qizzırna Rəbb ıxhayke,

Mang'vee ğu gugeeqa gixhas hassaras deş.

27 Xılençe yugvalla qööxhee,

mançis avaak'ıne insanaaşike mana qivmiykkan.

28 Vaqa vodxhee, merıng'uk'le immeyhe:

«Qiyğa ayre, g'iyqa heles».

29 Hexxan hidya'ang'us,

pisın hıma'a.

30 Vas pisın hidi'iyng'uka,

məxüdcad xıliyn hıma'a.

31 Xılençe g'eşşeng'us paxılıyvalla hımaa'a,

mang'une yəqbışda nenacab ımaak'an.

32 Rəbbik'le yəqqı'le qıtteepç'iynbı g'umooce vooxhe,

Mana qotkuyn ha'anbışda hambaz eyxhe.

33 Rəbbina bed-düə pisınbışde xaal vooxhe,

qopkuynbışde xaasme Mang'vee xayir-düə hoole.

34 Mang'vee matsxara haa'anbışile əqəna ha'a,

cocab-co ögilqa hudyoolenbıb Mang'une ulen avqaaqqanbı.

35 K'oran ək'elynanbı axtı qaa'as,

beynyavabıme k'ap'ik'ıle avqa qaa'as.