1 K'orane ək'elin çisın xav ali'ı,

yighıble çisda g'ayeyna dirak hoots'a.

2 Həyvanar gyat'u, çaxır qı'ı,

sufranılqad giyk'an.

3 K'orane ək'elin g'axuvuyne həmbalaaşe,

şaharne axtıne cigabışeençe ts'ir haa'a:

4 «İnyaqa qudoora, caahilyar!»

Mançin ək'el hivdiyxharanbışik'le inəxüdud eyhe:

5 «Qudoora, yizde gıneyke oxhne,

zı qı'iyne çaxırıke ulyoğe.

6 Xıliyna ı'mı'r haa'asva, ats'alydeşvalla g'alepçe,

ək'elyne yəqqı'ka qopkuba hudoora».

7 Matsxara haa'ang'uk'le aq'veeqa cuvab uvhuna k'ap'ik'ıle avqa qixhes,

pisde insanık'le vucee ha'an uvhunar bey'abırxhesda.

8 Matsxara haa'ang'uk'le aq'veeqa cuvab immeyhe.

Deşxhee, mang'uk'le ğu g'ımece qixhes.

K'orane ək'elynang'uk'le cuvab eyhe,

mang'us ğu ıkkiykanasda.

9 K'orane ək'elynang'us kar xət qe'eene,

mang'una k'orana ək'el sık'ılbab geeb quvxhes,

qorkung'us ats'al huveene,

mang'un ats'al sık'ıldad hexxaxhes.

10 Rəbbile qəpq'ı'niy ats'alyne q'oma ulyozzur,

Muq'addasna qıvaats'ıyid ək'elika ıxhay vodun.

11 K'orane ək'elika yiğna ı'mı'r hexxavxhes,

ı'mren yiğbı geed qixhes.

12 K'orane ək'elyna ixheene, ğu vas xayir ha'as.

De'eş, matsxara ha'ana ixheene, mançina əq'üba saccu ğu ooxhanas.

13 Beynyavavalla ts'ir-ts'yank' haa'ana zəiyfa xhinne vobna.

Mana caahilyra vorna, məng'ı'k'le vuççud ats'a deş.

14 Mana cene xaane akkayne ögiliy

şaharne axtıne cigabışee giy'ar.

15 Məng'ee yəqqı'le ı'lğəəmbışilqa,

qopkune yəqqı'nbışilqa ona'a:

16 «İnyaqa qudoora, caahilyar!»

Məng'ee ək'el hivdiyxharanbışik'le inəxüdud eyhe:

17 «Qöqüyn xhyan ittuda eyxhen,

dyugulenda otxhuniyn gıneyid, yugda qaylen».

18 Məng'ı'sqa abıynbışik'le ats'a deş, co hapt'ıynbı xhinne vob,

mane zəiyfee qopt'uluynbı ahalne k'oralybışee vobunbı.