1 Terbiye ıkkanang'us ats'aalid ıkkiykananxhe,

aq'veeqa eyhen cuvab g'ayxhes dekkanname bıdaala vor.

2 Yugna insan Rəbbine ulen aqqaqqana,

yik'eençe pisın ı'lğəəname, Mang'vee muhaakima ha'as.

3 İnsan pisınçil it'umra ulyozaras deş,

qorkung'una kokub ı'ğviykarna deş.

4 Yugna xhunaşşe adamiyn tac vodun,

tesser ha'anar vuk'arne bark'uk akar.

5 Qopkuynbışde fıkree qotkuyn məhkama hı'iy vod,

pisınbışde fıkreeyid hor hı'iy vod.

6 Pisınbışin cuvab hapt'asda gugu vobna,

qopkuynbıme cone mizeka g'ittiviyxhan.

7 Pisınbı qukkyopk'ul cokun eyxhen,

qorkung'un xav hı'ğəykaran deş.

8 İnsanık'le cune ək'elis sik'ı vuc yugnava eyhe,

yik'ee hornanamee k'ap'ik'ıle avqa qa'a.

9 Qıvdyaats'ana, cuqa g'ulnana insan,

vuceecar-vuc xərra ıkkekkane, gıney dena axuyne insanıle yugra vor.

10 Qorkune insanıs cuna həyvanıb qiviykkanna,

pisde insanna yugvallab zaalımiyvalla vob.

11 Cun ciga ezu-qiyşalang'vee ats'esınmeen gıneyxhe oyxhanan,

bəç'ərme q'ərane karbışde qihnaxhe ayk'anna.

12 Pisıng'us menne pisınbışe g'ayşuyn kar ıkkiykan,

qorkung'une kokunub şagav heles.

13 Pisda insan cune bınahnane cuvabıl-alla gugeeqa gexha,

qorkuna dağamiyvalike hexvana.

14 Yugun cuvab uvhiyng'vee mançike yugun alyaat'as,

cune xıleka iş g'ooceng'veeyib çine cigeena hək' alyapt'asda.

15 Beynyavaysqa cuna yəq qopkuba qavayle,

k'orane ək'elikang'vee mısləhətıl k'ırı iliyxhen.

16 Beynyavee qəl zaraba haagva,

ək'elynang'veeme cuk'le uvhiyne pisde cuvabılqa fıkır hoole deş.

17 Qorkune şahadee hək'enxhe yuşan ha'an,

horalay şahadeeme mısacad qotkuyn eyhe deş.

18 Nəxüd qadiy uvhiynçin ç'ikayn xhinne g'ats'ayk'van,

k'orane ək'elika uvhiynçinıd yug qaa'a.

19 Hək'en cuvab gırgıne gahbışis axva,

horanab ı'mı'r cit'aba vooxhe.

20 Pisın fıkreençe ı'lğəəng'une yik'ee hor eyxhen,

aldapxhıniy ak'an ha'ang'uneme yik'ee şadvalla vooxhena.

21 Qorkung'une vuk'lelqa ver abaylena deş,

pisınbışde vuk'leleme balyaa avayk'anna deş.

22 Rəbbik'le hor ha'ana miz g'umooce vooxhe,

hək'en eyhenbıme Mang'une ulen avqaaqqanbı.

23 Ək'elynang'vee ats'al dyugulyxhe ha'an,

beynyaveeme cuna beynyavavalla hagvana.

24 İş g'avces vukkanna xərna ixhes,

tanbalır həmbal ixhes.

25 İnsan arğançe orxhanna fıkır mang'unemee yı'q'ı'n yuk vodun,

yugne cuvabın yik' şada'an.

26 Qorkune insanee hambazıs yəq haagva,

pisde insanname yəq alivku-givku vooxhe.

27 Tanbalne xılelqa k'on aypxheeyib, mang'vee mana ç'əra qaa'a deş,

iş g'avces vukkanname gıranne karalqa hiyxharna.

28 Qopkuvaline yəqbışee ı'mı'r vob,

vuşu mane yəqbışin ark'ınee qik'as deş.