1 Dixbı, dekkee helene terbiyel k'ırı alixhxhe,

man şolqa hixhrecenva fıkır hevle.

2 Zı şos yugun ats'al hele,

zı xət qı'iyn g'ılymadaççe.

3 Zı yizde dekkıne xaa uşaxranang'a,

yedis geer ıkkanna sa uşaxnang'a,

4 dekkee zas xət qa'a-qa'a uvhiyn:

«Hasre yiğne yik'en zı eyhenbı yik'el aqqecen,

zı eyhenbı he'e, ı'mı'r xıliyba vuxhecen.

5 K'orane ək'elynayiy ats'alyna ixhe,

zı eyhenbı yik'el hixan hıma'a, yizde cuvabeençe qığmeç'e.

6 Ğu k'orana ək'el g'ılydepçee, mançin ğu havacesda,

mana vukkiykınee, mançin ğu aqqasda.

7 K'orana ək'el gırgıne karale ooqa vob, ğu ts'eppa mana t'abal hee'e.

Vaqa vodun gırgın kar heles girxhveeyir, hele, k'orana ək'el alept'e.

8 Mana yiğnemee inekke gıranna vuxhee, mançin ğu axtı qa'as,

ğu mançik at'irq'ınee, mançin ğu qıvaats'a'asda.

9 Mana yiğne vuk'lelyne t'et'-t'elelqa savk'alas,

mançin yiğne vuk'lelqa micagın tac gixhxhes».

10 Yizda dix, zal k'ırı alixhxhe,

ğu zı eyhenbı he'eene, yiğna ı'mı'r xıliy quvxhes.

11 Zı ğu k'orane ək'elin haagvane yəqqı'lqa gyayhe,

qorkune yəqqə iykar ha'a.

12 İykarmee yiğın g'elybı qaçaxaras deş,

g'adayxhvanmeeyir hittighanas deş.

13 Alyaat'uyn terbiye aqqe, curmexhe,

man aqqe, mançee yiğna ı'mı'r vob.

14 Pisınbışde yəqqı'lqa g'el gimiyxhe,

qəlnanbışde yəqqı'n imiykar.

15 Ts'ıts'xhe, mane yəqqı'sqa k'anecar qımexhe,

əq'əna ulyozre, menne cigeençe hoora.

16 Mane insanaaşe pisın hide'ee, g'alyapk'as deş.

Şavukunmecad hide'eened, manbışin nyak'bı hixvas.

17 Manbışe pisvalla gıney xhinne opxhan,

yiğbı alli'iyid manbışe çaxır xhinne ulyoğa.

18 Qopkuynbışda yəqmee miç'eediyn işix xhinne vob.

Atk'ıniylette, işix geed qexhe-qexhe, yiğ eyxhe.

19 Pisınbışda yəqmee miç'axiyvalla vob,

manbışik'le co nişil-alla qaçapxıriy ats'a deş.

20 Yizda dix, yizde cuvabılqa fıkır hevle,

eyhençil k'ırı alixhxhe.

21 Manbı uleke ak'an hıma'a,

yik'ee aqqe.

22 Man eyhenbı yiğnemee ı'mı'riy

yug qıxhay ixhes.

23 Yik'en vas ı'mı'r hoole,

mançil-alla ts'etta man havace.

24 Horbı ghalençe ak'an he'e,

qopkuvalla deşin cuvab yuşan hıma'a.

25 Uleppı hiqa ilyakkecen,

qorkura yiğne hiqa ilekke.

26 Ğu əlyhəəna yəq qopku qee'e,

yiğne g'elik avudun cigad it'umda ixhecen.

27 Sağılqa, solulqa simiyk'al,

g'el pisvaleeqa humoodakke.