1 Yik'eedın fıkırbı insanıkenbı,

mizen qelen cuvabıd Rəbbiken vod.

2 İnsanın gırgın yəqbı cune ulesqa məttıda qöö,

Rəbbeeme yik'bı siliys ı'xiyxə.

3 Ğu ha'asın işbı Rəbbisqa qele,

manke yiğne yik'eedın ixhesın.

4 Rəbbee gırgın kar çine cigee itxhın,

Mang'vee pisda insanır dağamne yiğınemee iyxhan.

5 Cocab-co axtıba vukkekkanbı Rəbbik'le g'umooce vooxhe,

vak'le ats'axhxhe, manbı cazaa dena aaxvas deş.

6 Yugvaliniy qopkuvalin bınah hooğalna,

insanır Rəbbile qərq'ı'niyke bınahıle siyk'alna.

7 Rəbbis insanna ı'mı'r yugba qööxhee,

Mang'vee duşmanarıb hambazar haa'a.

8 Qopkuvalika hı'iyn k'ılda kar,

qopkuda hidi'iyne geedne karale yugda vod.

9 İnsanee yik'ee cunemee yəq haa'a,

Rəbbeeme mana Cus ıkkanne cigeeqa qıkkekka.

10 Paççahee xəənçe vuk'leeqa k'eççuyn eyhe,

mang'une mizen qotkuyn eyhes ıkkan.

11 Qotkuyn g'apan Rəbbina q'aanun vobna,

q'oç'eedın gırgın terezyugun g'ayebıd Cuke vodunbı.

12 Paççahaaşik'le pisın işbı g'ımece eyxhe,

qopkuvallanang'a manbışda taxt it'umba ulyoozar.

13 Paççahaaşis ıkkanan kar qopkuna miz vob,

manbışisqa qotkuyn eyhenbı yugba qavayle.

14 Paççahna qəl qik'uyva eyhen vodun,

k'orane ək'elikang'veeme mana dissara'ana.

15 Paççahne aq'vayn əqəna ha'axhee, mana ı'mı'r vobna,

mang'une ulen ğu aqqıxhee, man yuxhxhaniyne gyoğiyk akar.

16 K'orane ək'elyna ıxhay, k'ınəəğəyna ıxhayle yugda vod.

Nuk'ra sı'iyled ək'el sav'iy ooqa vod.

17 Qopkuynbışde yəqqı'n pisınçike aqqaqqa,

cuna yəq avquyng'vee, cuna ı'mı'r havaace.

18 Ğucar-ğu axtıra ıkkekaxhee, vakın ha'asın,

vuceecar-vuc axtı qı'ing'ulqab balyaaxhe abaylena.

19 Kar deşinbışde yı'q'nee vucecar-vuc xərra ıkdekkana ıxhay,

cocab-co axtıba vukkekanbışika mebınbışin kar g'ayşuyle yugda vod.

20 Cuvabıke ats'al alyaat'ang'uk'le yugun aveykesın,

Rəbbilqa yı'q' qizzırna nimee baxtivariy!

21 K'orane ək'elynang'uk'le ats'alynanava eyhe,

ittune miznang'ussed geed xət qa'as əxə.

22 Ək'el vobnang'unemee, ək'el ı'mı'r hoolene xhinek akar vob,

beynyavays terbiye huviy bəç'əriyvalla vob.

23 K'orana ək'elynang'une mizen ats'al hele,

mang'usse geed kar xət qa'as əxə.

24 Uftanın cuvab t'ap'aneedın itv xhinne vod,

canas yugda, rı'hı's ittuda.

25 Məxbına yəq vobna insanık'le qopkuba g'ooce,

mana ç'əvooxhen cigame qik'uy vod.

26 İnsanee cune vuxhnel-alla iş g'ooce,

mıssıvalin mana ilekka.

27 Karaı'dəəng'une fıkreençe pisın hı'iy ılğeç'e,

mang'une mizen ts'ayın xhinne gyooxhan haa'a.

28 Hor ha'ang'vee dəv'ə abaççe,

ing'una-şeng'una haa'ang'vee yugun hambazar curaa'a.

29 Pisın ha'ang'vee mernar yəqqı'le qığayhena,

mana karaı'dəəne yəqqı'lqa ts'ıts'aa'a.

30 Yik'eençe hor ı'lğəəng'vee ulyxhe giviyxəna,

pışnebı ats'ayk'van, pisınxhe ha'an.

31 Cagvaran ç'ərbı uftanın tac vod,

manab qopkune yəqqı'na hək' vob.

32 Gucnang'ule sabırnana yugra,

şaharbı alyaat'ang'uler vuc aqqaqqana yugra.

33 İnsanaaşe çöp k'eçveeyid,

mançin Rəbbis ıkkanan hagva.