1 Yizda dix, zı eyhençil yugda k'ırı alixhxhe,

yizın əmrbıd yik'el aqqe.

2 Yizın əmrbı ğu g'ılyde'eene, ı'mı'r haa'asda,

zı xət qı'iyn ulen işix xhinne havace.

3 Manbı ı'm xhinne t'ubeyk qe'e,

yik'ek ok'ne.

4 K'orane ək'elik'le: «Ğu yizda yiçuva»,

hikmətık'led «Ğu yizda k'anena hambazva» eyhe.

5 Mançin ğu yəqqı'le qığeyç'uyne zəiyfayle,

ittune miznane merıng'une xhunaşşeyle havacesda.

6,7 Zı yizde xaane g'ulele

g'aqa horzuling'a,

caahilyaaşineyiy mek'vunbışde yı'q'nee,

zak'le sa ək'el deşda g'acu.

8 Mana, mane zəiyfayne xaane vuttus k'anene yəqqı'leyiy ı'lğəə,

məng'ı'n xavnane yəqqı'sqanayiy qöö.

9 Exha qexhemee, verığ k'yooçemee,

ooğançe xəm qöömee, miç'ax qexhemee

mana maqa qöö eyxhe.

10 Pisın yik'nana, yəqqı'le qığeyç'uyne zəiyfee xhinne tanalinbı ali'ına zəiyfa

zaara mang'une ögilqa qığeeç'e.

11 Məng'ee ts'ir-ts'yank' haa'a,

məng'ee şavuscab hı'rmat giviyxhe deş,

mana xaa gidiy'arna vorna.

12 Yəqqı'lqa, maydamaqa mana qığeeç'e,

gırgıne xhoşşebışee gugu məng'ee giviyxhe.

13 Məng'ee mana gade aqqı, ubba hı'ı,

naş qıdexhad uvhiyn:

14 «Zı q'urban ablyav'u, zaqa həşde çuru vodun,

Allahıs huvuyn cuvab zı g'iyna hı'iyn.

15 Mançil-allar ğu g'acesva zı yiğne ögilqa qığeyç'u,

zı ğu t'abal hı'ı, həşde aveykı.

16 Zı yizde g'ıleexhane tyulyulqa

Misirğançe adıyn micagın parçebı atçu.

17 Zı yizde g'ıleexhane cigeeqa

mirrayn, aloeyn, darçının evabı hı'ı.

18 Qora, miç'eebilqamee avts'esınmee sanab vuxhes,

sana-sang'vee pet haa'as.

19 Yizda adamiy xaa deş vor,

əq'ənane cigeeqa ark'ın.

20 Pılnan yut'elid alyaat'u, mana ark'ın,

mana xaaqa vaz bıkıruvxhamee sak'alas».

21 Miz k'yav'u, məng'ee mana celqa sa'ana,

ittuna miz hav'u, yəqqı'le qığayhena.

22 Givk'as vukkekana conga xhinne,

mana gader mankecar məng'ı'ka qihna ayk'an.

Maral xhinneyir mana gugeeqa gexha.

23 Nekke qiyğad mang'une k'ılyk'ameeqa ox hiyxə.

Alivxu zarabacab toreeqa ooxhana şit' xhinne,

mane gadeyk'led vuc ı'mrıkena ixhesva ats'a deşdiy.

24 Dixbı, həşde zal k'ırı hele,

zı eyhençil yugda k'ırı alixhxhe.

25 Hımaysar ğu məng'ı'ne yəqqı'lqa gixhas,

məng'ı'ne yəqqı'n əlyhəəs.

26 Məxürne zəiyfee geebınbışikın hı'ı,

nimeen insanarne gyapt'ı.

27 Məng'ı'ne xaasqa əlyhəəne yəqbışe ahaleeqa quvkekka,

qik'as qıkkekka.