1 K'orana ək'elynane zəiyfee, ces xavxhe ha'an,

beynyava zəiyfeeme cen xav cene xıleka hı'ğəkkar ha'an.

2 Qopkuna yəq avquna Rəbbile qəyq'ən,

yəqqı'le qıtteç'uyng'veeme Mang'us hı'rmat giviyxhe deş.

3 Beynyavee, yuşan ha'amee, vucecar-vuc hagvava, çümqxhe qiviyxharna,

k'orana ək'elynang'une gafınme mana g'attixhan ha'ana.

4 Yats deşdang'a, axur məttıba vooxhe,

yugun g'ıkıd yatsbışde taq'atınxhe helen.

5 Ts'omnane şahadee hor ha'a deş,

hor ha'aneme şahadın nafasıd hor eyxhe.

6 Matsxara haa'ang'vee k'orana ək'el t'abal hav'eeyib, mana iveeke deş.

Ək'elikane insanısme ats'al alyaat'uy vaxxariyda vod.

7 Beynyavayne ögiyle agvle,

mang'une ghalençe ats'al qığeç'es deş.

8 K'orane ək'elikang'uk'le cuna yəq vaats'ana,

beynyaveeme cuscad hor ha'a.

9 Beynyavabışe bınahbışil-alla allya'an q'urbanbı matsxara ha'a,

Allahna ulyub qopkuynbışil vob.

10 Yik'ek'le çin uts'ur ats'an,

mançina şadvallab merıng'uka bit'al haa'as vooxhe deş.

11 Pisınbışin xav hı'ğəkkarasın,

qopkuynbışda çadırme t'et'-t'elee vuxhes.

12 Məxbına yəq vobna, insanık'le qopkuba g'ooce,

mana ç'əvooxhen cigame qik'uy vod.

13 Sassa yəqqees insanee əqəna ha'ameeyid, mang'une yik'ee derd vooxhe.

Sassa yəqqeesıb şadvallab derdıka ç'əvooxhe.

14 Yəqqı'le qığeç'uyng'veeyid, yugung'veeyid

co hı'iynçil-allana pay alyapt'asda.

15 Caahil uvhiyne gırgıne cuvabıl hayexhena,

ək'elynang'veeme vucee ha'ane gırgıne karana fıkır haa'ana.

16 K'orana ək'elikana pisvalike qərq'ı'n mançile siyk'alna,

beynyavayqame qərq'ı'niy deşin, mang'vee fıkır udyopxhun nen qadiy ha'an.

17 Zaraba qəl vooxheng'vee beynyavavalla haa'a.

Yik'eençe pisın fıkırbı ı'lğəənar insanaaşik'le g'ımece eyxhe.

18 Caahilyaaşina pay beynyavavalla vobna,

ək'elynanbışinıd tac ats'al vodun.

19 Pisınbı yugunbışde ögil,

bınahnanbıb qopkuynbışde akkayne ögil k'yoozaras.

20 Kar deşda cone delesınbışisır ıkkiykan deş,

karnane insanıqame geeb hambazar vooxhe.

21 Merıng'uqa ooğançe avqa ilyakkana bınaheeqa k'exha,

kar deşing'uka yugra eyxhena baxtivar vorna.

22 Yik'eençe pisın fıkırbı ı'lğəənbı yəqqı'le qıtteepç'ı dişee?

Ək'leençe yugun hı'iy ı'lğəənbışik'le yugvallayiy qopkuvalla iveeke.

23 Gırgıne dağamne işee xayir vod,

vuççud hidya'a yuşancar ha'axhee, q'ərar axvas.

24 K'orane ək'elynanbışin kar manbışin mukaafat vodun,

beynyavabıme cone ək'elydeşvalika qıvaats'a.

25 Ts'omnane şahadee canbı g'attixhan ha'a,

horalay şahadınme horxhe ha'an.

26 Rəbbile qəyq'ənna alyapt'as dəəxəne g'alee xhinne vor,

Rəbbee mang'un uşaxarıb g'attivxhan haa'asınbı.

27 Rəbbile qərq'ı'niy ı'mı'r hoolen xhyan xhinne vod,

mançin insan qik'uyne xhımıç'bışike sak'al ha'a.

28 Paççahna xəbvalla milletne geedvalika vaats'a vooxhe,

millet deşxhee, paççahıkınıd ixhesın.

29 Sabırnang'uqa xəbna ək'el vob,

sabır deşing'veeyib cuna beynyavavalla haagva.

30 Yik' adğançe otxhanan fıkırbı deşxhee, mançin canıs ı'mı'r hoole,

paxılıyvalinıd bark'vbı qı'ça'a.

31 Kar deşing'us əq'üba hooleng'vee, mana İrxıning'uk'le cuvab eyhen xhinne eyxhe.

Mang'us hı'rmat giviyxhenar kar deşing'uka yugra eyxhe.

32 Pisde insanıkın cune pisvalincad ha'a,

qorkung'uqa qek'ang'ar g'attixhanasın ciga vodun.

33 K'orana ək'el, ək'elynanbışde yik'ee aaxva,

beynyavabışik'leb çikana mana g'oocena.

34 Qopkuvalin millet axtı qa'a,

bınahınme milletıs naş qa'a.

35 Paççahne ulen ək'elynana həmbal aqqaqqana,

naş qixhesın karbı ha'ang'ulqame mang'una qəl avqaaqqa.