1 G'iyqiyn yiğ k'imaqqa,

g'iyqa hucooyiy ixhesva vak'le ats'a deş.

2 Hasre ğu yugnava, ğu deş, mebınbışe eyhecen,

ğu yugnava yiğne ghalen deş, merıng'vee eyhecen.

3 G'ayeb, g'umıb yı'q'ba vob,

beynyavayke vuxhana qəlme, mançine q'önçulesana yı'q'ba vob.

4 Qəlnana insan q'ıfrımık akar vor, mana şavussecar aqqas-dissara'as əxə deş.

Gısganmışexhena mang'ule pisra vor, mang'une ögil şavusse ulyozaras əxəyiy?

5 Aq'veeqa eyhena,

yiğın bınahbı vak'le itteyhene hambazıle yugna vor.

6 Hambazee aq'val uvhiyne cuvabın ık'ar qe'eeyid,

man duşmanne geedne ubbabışile yugun vodun.

7 Q'at xhinne qıxhayng'vee itvud k'öq'ən,

mısıng'usqa qap'ınıd ittuda qadayle.

8 Xaake əq'əna girxhuna insanır,

akvaake əq'ənaqa gipxhına şit' xhinne vor.

9 Ətiriniy zeytunne xhınyaalin micagın eva insanne yik'esqa yugda qöön xhinne,

hambazna mısləhətıb insanısqa yugba qavayle.

10 Yiğnar, dekkınar hambaz g'ılymaraççe.

Dağamiyvaleeqa girxhumee, k'ane hambaz vorxhee,

çocune xaaqa ı'qqəs gixhas deş.

K'anena insan əq'ənane xınıyle yugra vor.

11 Dix, ək'elika ixhe, yizın yik' şade'e.

Manke zas naş qa'ang'us zasse alidghıniy qeles əxəsın.

12 Ək'elynang'uk'le dağamiyvalla g'avcu, mançile hexvana,

caahilyme ögeeqa qığeç'e, mançike uts'ur iveyke.

13 Dyats'ang'us zaaminra ulyorzulyung'un tanalin aleet'e,

mebınbışil-alla cuvab huvuyng'unud kar aqqe.

14 Şavaayiy miç'eeb çakba axtıba ul idyaaqiyng'us salam hoole,

məxbına salam hokiy xhinne vooxhe.

15 Aldeexhvanna xhunaşşe,

gyoğiynane yiğıl ç'əvcab dyooxhene gyobatstsene gyoğiyne t'yank'ık akar.

16 Mana mıts xhinne ulyoozar haa'as vooxhe deş,

zeytunun q'ış xhinne xuda aqqas eyxhe deş.

17 Yivan yiva ek' ha'an xhinne,

həməxübıb insanee insanna ək'el ek' haa'a.

18 İnciliys g'ullux ha'ang'vee, inciliyxhee ooxhanna,

cune xərıng'us yugba g'ullux haa'anar, hı'rmatnana ixhes.

19 Xhinee aq'va g'ecen xhinne,

insanne yik'ınır vuc həməxür hagva.

20 Ahalıy nyaq'vbı gidyayts'en xhinne,

həməxübıb insanna ul idyaats'e.

21 K'ınəəğəynayiy nuk'rayna yugvalla ts'ayika vaats'a vooxhe,

insanır, mang'une hək'ee yugda yuşan haa'amee, ats'a eyxhe.

22 Suk t'at'aaka gyootee, kapak qığeç'es,

beynyavame nimee getvee, mang'una beynyavavalla qığevç'es deş.

23,24 Kar gırgıne gahıs deş vod,

tacıd nasılıle-nasılıqa ılğeç'e deş,

mançil-alla syurunuqa yugra ilekke,

çavrad uleke g'ımekka.

25 Ok' sav'u quvkiyle qiyğa, medın ok'bı alyadıyng'a,

suvabışee ok'bı qiyşalang'a,

26 yiğne urgbışe tanalqan kar heles,

q'ınabıd massa huvu, çol vasse alişşes əxə.

27 Vaqa ts'e'bışda nyak geeb vuxhes,

vasda, yiğne xizanısda, yiğne həmbalaaşisda.