1 Horbışikane g'apanıle Rəbb həlyvəyq'ənna,

Rəbbis qotkuyn terezyugun g'ayebı ıkkiykan.

2 Vuceecar-vuc axtıra ıkkekkana k'ap'ik'ıle avqa qexhena,

k'orana ək'elib vuceecar-vuc axtıra ıkdekkang'uqa vooxhena.

3 Məttıne yik'en qopkuynbışis yəq haagvas,

xayaanat ha'ang'uk cune quç'orkuyvalin ha'a.

4 Allahee cazaa hoolene yiğıl şavnecad karan mana g'attixhana'as deş,

qopkuvalinme insan qik'uyke g'attixhan ha'a.

5 Məttın yik'nane insanna yəq, cune qopkuvalin qopku qaa'a,

pisde insanıkınıd cune pisvalin ha'a.

6 Əməlybı qotkuna cune qorkuvalin g'attixhan ha'a,

xaainır cune mıssıne ulen toreeqa arçes.

7 Pisda insan qek'amee cuna umudub qook'ana,

cune karana gucub hexxavxhes deş.

8 Qorkung'ulqa ver abımee, mana g'ittiyxhanna,

mang'une cigee pisıng'ulqa ver abayle.

9 Allah deşing'une mizen merıng'ukınıd ha'an,

ats'aalinır qorkuna g'attixhan ha'a.

10 Qopkuynbışin xıl barakalqa hitxhırmee, şaharcab şadooxhe,

pisda insan qik'umee, şadvaline ts'irın şahar alyabat'a.

11 Qopkuynbışde xayir-düəyka şahar axtı qooxhe,

pisınbışde ghalybışeme şaharıkın ha'an.

12 Merna k'ap'ik'ıle avqa qa'ana beynyava vor,

ək'elynang'veeme ghal sa'a.

13 Miz iviykar haa'ang'vee, sirbı hixhar ha'a,

cuvab aqqaqqane insaneeme cuvab hixhar ha'a deş.

14 Qopkuna mısləhət g'udyoocexhee, milletıkın eyxhen,

qopkuba mısləhət g'oocenbı geebxheene, millet g'ıttiyxhanan.

15 Merıng'us zaaminna ulyorzulyung'vee culqa ver ablyaa'a,

zaaminiyvalla haa'as g'umooceng'ulqamee divan adayle deş.

16 Yik' yugne zəiyfayna hı'rmat geeb qooxhe.

Zulum hoolene adameeşe karcad sa'a.

17 Yugun ha'ang'vee cuscad xayir ha'a,

yiğbı allya'ang'veeme culqa yiğ ıkkekka.

18 Pisde insanee horana payxhe alyabat'ana,

qopkuvalla qeyheneme insanee hək'ena mukaafat alyapt'as.

19 Qopkuvalla avquyng'vee ı'mı'r haa'asda,

pisınçiqar qihna girxhuname qik'asda.

20 Yik'ee bicvallanana insan Rəbbik'le g'ımece eyxhe,

Mang'us yik' məttınbı vukkiykan.

21 Vak'le ats'axhxhe, pisda cazaa dena axvas deş,

qopkuynbışke g'abıynbıb g'attivxhanasınbı.

22 Ək'el deşde zəiyfayna micagiyvalla

vokkanee quşelyne k'ınəəğəyne ı'mık akar.

23 Qopkuynbışis ıkkanan yugun vodun,

pisde insanaaşilqab gyooxhana Allahna qəl vobna.

24 Sang'vee bit'al hı'iylette, hexxaxhen,

mansang'usme qiykkıniylette, ayk'anan.

25 Yik'eençe bit'al ha'ana gyatsts'ı-gixhxhı ixhes,

merna xhineka ats'yı'ına, vucur ayts'ena.

26 Suk dyugul haa'ang'us milletın bed-düə haa'a,

mana massa huvuyng'unemee vuk'lelqa xayir-düə gyooğa.

27 Yik'eençe yugvaliqar qihna əlyhəəng'uk'le yugun iveeke,

pisınçiqar qihna girxhung'ulqamee ver abaylena.

28 Var-devletılqa umudeepxhaynbı k'yooçesınbı,

qopkuynbıb t'et'-t'ele g'ayhene yivaaşik akaraba vuxhes.

29 Xizanılqa ver ablyav'ing'un kar mıtsıs ixhes,

beynyavar k'orane ək'elynang'us həmbal ixhes.

30 Qopkuyg'un şagav ı'mrena yiv* vobna,

k'orane ək'elynang'vee culqa ts'ıts'aa'a.

31 Qorkung'us dyunyel mukaafat qoolexheene,

pisıng'uk, bınahnang'uk ilekke ğu hucooyiy ixhes!