1 G'üvənane alidghıniyn qəl avaak'an haa'a,

aq'veeqa sark'ıliynme qəl sık'ılbab geeb qaa'a.

2 K'orane ək'elynang'une mizen ats'al axtı qa'a,

beynyavayneme ghalençe beynyavavalla k'əə.

3 Rəbb gırgınəəng'ə ilyakkana,

pisdar, yugnar Mang'ule dyugulexhe deş.

4 G'üvənana miz ı'mrena yiv* vobna,

hor ha'ançinıd yik' haq'vara'an.

5 Beynyavee dekkın terbiye demalqa giyxhe,

aq'veeqa uvhiyne cuvabıl k'ırı iliyxhename ək'elikana vor.

6 Qorkung'une xaa xəbna xaziyna vob,

pisınbışde karanme manbışilqa yiğ allya'a.

7 K'orane ək'elikang'une mizen ats'al hixhar ha'a,

beynyavabışde yik'bışisse man ha'as əxə deş.

8 Rəbb pisde insanee ablyav'uyne q'urbanıle həlyvəyq'ənna,

qopkuynbışda düəme Mang'une yik'eençe vooxhe.

9 Rəbbik'le pisde insanna yəq g'umooce vooxhe,

qopkuvaliqab qihna əlyhəənbıme vukkiykananbı.

10 Qopkuna yəq g'alepçiyng'us it'umun dars heles,

aq'veeqa uvhiyn cuvab dekkanang'ukunud ixhesın.

11 Ahal Rəbbile dygulyda deş vod,

insanaaşin yik'bıd Mang'uk'le g'ecenbı.

12 Matsxara ha'ang'uk'le aq'veeqa cuvab uvhumee ıkkiykan deş,

k'orane ək'elynanbışde k'anyaqar araylena deş.

13 Yik' şaddanang'a aq'vad hits'aygharan,

yik' hatq'urme rı'h dena qexhe.

14 Ək'elikang'vee ats'al alyaat'a,

beynyavar beynyavavalin gyatsts'ı eyxhe.

15 Kar deşing'un gırgın yiğbı k'aarıda vod,

yik' şadnar itteyhesğu otxhan-ulyoğacar eyxhe.

16 Rəbbile qəyq'ənang'un k'ılda kar,

fıkren arğançe orxhanang'une geedne karale yugda vod.

17 Mühübbatıka xhınakın ala otxhuniy,

qəlıka geed boğayn çuru otxhuniyle yugda vod.

18 Qəlnang'vee aldapxhıniy ha'a,

sabırnang'veeyid ç'əv ha'a.

19 Tanbalne yəqqə ğı'ç'iy aleyle,

qopkuynbışda yəqme əq'ba vooxhe.

20 K'orane ək'elynane dixee dek şada'ana,

beynyaveeme yed k'ap'ik'ıle avqa qee'e.

21 Ək'el deşda beynyavavalile şadexhe,

ə'kelynaname qorkune yəqqı'n ayk'anna.

22 Mısləhət devxhee, ha'an kar ixhes deş,

mısləhət hoolenbı geebxheene, man kar ixhesın.

23 İnsanıs kara'əəda cuvab quvuna şadexhena,

cigee uvhiyn cuvab nimee yugdayiy!

24 Ək'elikana insan avqa ahaleeqa g'ı'mexhacenva,

ı'mrena yəq avqu, ooqa ts'ıts'exhe.

25 Cocab-co axtıba vukkekkanbışin xav Rəbbee hı'ğəkkar ha'asın,

sip'ıriy zəiyfayne cigayna sarhad havaacesda.

26 Rəbbik'le pisınbışin fıkırbı g'ımece eyxhe,

uftanın cuvabme Mang'usqa məttıda qadayle.

27 Mıssıne ulynang'vee xizanılqa əzaab ablyaa'a,

ruşvat g'ımece insanna ı'mı'r xıliyba vooxhe.

28 Qorkune insanee cuvab qelesse fıkır ooxhan,

pisde insanneme mizele pisvalla k'əə.

29 Rəbb pisde insanaaşile əq'əna eyxhena,

qopkune insanaaşineme düəl k'ırı iliyxhe.

30 Nurukane uleppışe yik' şada'a,

yugne xabarbışed bark'vbı yug qa'a.

31 Aq'veeqa uvhiyne cuvabıl k'ırı iliyxheng'vee xıliyna ı'mı'r ha'as,

k'orane ək'elynanbışde yı'q'nee axvas.

32 Terbiye əq'əna qa'ang'uk'le cuk'le-vuc g'ımece eyxhe,

aq'veeqa uvhiyne cuvabıl k'ırı iliyxheng'uname ək'el geeb qooxhe.

33 Rəbbile qəpq'ı'niyn k'orana ək'eliy terbiye hele.

Vuceecar-vuc xərra ıkdekkanar hı'rmatıka eyxhe.