1 Pisde insanaaşiqa vodunçilqa ul givmiyxhe,

manbışika hambaziyvalla hıma'a.

2 Manbışde yik'eençe zaalımiyvalla ı'lğəə,

manbışde mizen ver ablyaa'a.

3 K'orana ək'el dena xav alya'as ixhes deş,

ək'el devxhee, man hiqiy-allançed it'uma'as ixhes deş.

4 Ats'aalin mane xaan goozyar,

gırgıne gıranne, yugne karbışika gyatsts'a'as.

5 K'orana ək'elikana insan gucuka eyxhe,

ats'aalikane insanee cuna guc hexxaa'a.

6 Qopkune mısləhətın dəv'ee vak'le yəq' haagvas,

yugun mısləhətbı helenbı geebxhee, ğu ğamxhesda.

7 Beynyava k'orane ək'elilqa hiyxhar deş,

iclasee ghal aaqı eyhesın cuvab mang'uqa eyxhe deş.

8 Yik'eençe pisın kar ı'lğəəng'uk'le

«yik' aliq'ala'anava» eyhe.

9 Beynyavayn fıkırbı bınahcab vob,

matsxara karbı ha'ang'uleb həlyvəyq'ənanbı.

10 Dağamne yiğıl rı'hı'le g'a'arxhuxhee,

vaqa nimeecab k'ınna guciy!

11 Gyapt'as quvkekkanbı g'attivxhan hee'e,

gyapxas quvkekkanbışiler simiyk'al.

12 Ğu «mançike zas xabar deşdava» uvheene,

yik'bı Gyoodakkeng'uk'le nya'a man ats'axhxhes dişde?

Nya'a yiğın can Havaceng'ulqa man hixharas dişde?

Nya'a Mang'vee gırgıng'us cune işbışil-alla hək' qevles dişde?

13 Dix, itv otxhuniy vasqa yugda qöö dişee?

Man yiğne ghalesqa ittuda qöö dişee?

14 Ats'axhxhe, k'orana ək'elib yik'enemee məxüb vob,

vak'le mana aveykee, vaqa yugun yiğbı ixhes,

yiğna umudub əəs deş.

15 Pisıng'vee xhinne qorkung'une cigaysne gugu givmiyxhe,

mang'un xav q'əra qıma'a.

16 Qorkuna yighne yəqqeesır qukkyork'ulee, meer oza qixhesda,

pisıng'ulqame ver ables, mana hı'ğəkkarasda.

17 Duşman qukkyork'ulyva şadmexhe,

mana qaçarxılirva yiğın yik' şadmexhecen.

18 Deşxheene, Rəbbik'le g'acesın, Mang'us man ıkkiykanas deş,

yiğne duşmanıle Cuna qəl alyapt'asda.

19 Pisınbışil-alla qəl hımaa'a,

karaı'dəəng'uqa ilyakkı, ghalen xhyan gimekka.

20 Pisıng'ulqa yugun yiğbı qales deş,

karaı'dəəng'un işixıd k'ətqəsın.

21 Dix, Rəbbileyiy paççahıle qəq'ne,

g'elil qeebaxhenbışikar hambaz mexhe.

22 Manbışilqa ver sayangaba abayle.

Rəbbeeyiy paççahee manbışis nəxbına cazaayiy hevlesva şavuk'lecad ats'a deş.

23 İn uvhiybıd k'orane ək'elynanbışe uvhu:

Məhkamee sang'un sura aqqiy yugda deşin.

24 Pisıng'uk'le «ğu qorkuna vor» uvhuyng'uk'le

milletbışecad cuvabbı eyhes, xalq'bışe bed-düəbı ha'as.

25 Pisıng'us cazaa hoolenbışemee yugun alyaat'asın,

vuk'lelqa barakat gyooğas.

26 İnsanıs qotkuyn cuvab quvuyng'vee,

itteyhesğu mang'une aq'vays ubba hı'ı.

27 Ts'eppee g'abna iş ç'əvee'e, çol se'e-qe'e,

qiyğa xav ale'e.

28 Merıng'une aq'val horbışika ulymoyzar,

ghalençe horakan cuvab qığmayhe.

29 İmmeyhe: «Zı mang'uk vucee hı'iyn ha'as,

vucee hı'iyn, cus sak'al ha'as».

30 Tanbalne ezane cigabışeençe,

ine ək'el hivdiyxharang'une t'ımıllığeençe ılğeç'u.

31 G'acuyn gırgın surabı zazaanıd alyaat'u,

mağaanıd aqqı, cabırbıd hı'ğətkırıd.

32 Mançiqa ilyakkı, zı fıkır opxhun,

mançike ı'brat alyaat'u:

33 ğu sık'ırra qorku mırg he'ee,

g'el-xıl hotku g'alirxhvee,

34 kasibiyvalla soyğunçiy xhinne,

kar g'idiyxhıriyvallab valqa g'uldur xhinne k'yophur ables.