1 Yaqeyna dix eyxhene Aguree xət qı'iynbı hixhar ha'a. İne insanee uvhuyn:

«Allah, zı orzulyna, zı k'yart'una.

2 Zı insanaaşina inekke ək'el deşda vor,

zaqa insanna ək'el deşda.

3 K'orana ək'el deş zas xəp quvxha,

Muq'addasne Allahıkeb zas xabar deşda.

4 Vuşune xəəqə ılqeç'u-giç'u?

Şavaane mıts xhaxheeqa sav'u?

Şavaane deryah p'laşil alipk'ır?

Şavaane ç'iyeyn aq'va ç'əvexhen sarhadbı gixhxhı?

Mang'un do hucoona? Mang'une dixen do hucoona?

Vak'le ats'axhee, zak'le eyhe.

5 Allahee eyhen gırgın kar məttın k'ınəəğə vodun,

Culqa yı'q' qizzıriynbışda Mana suva vobna.

6 Mang'une cuvabıs vuççud hexxı hıma'a.

Deşxheene, Mang'vee yiğna bınah haagvasda,

horud aq'valqa qığahasın.

7 Allah, Vake q'ölle kar heqqa,

zı qik'asmee, zake manbı qımiykkan:

8 q'əraniy horan karbı zake əq'əna qe'e,

zı kar deşdayiy geer karnana hıma'a.

Zas zalqa gexhan yiğısiysın gıney hele.

9 Kar geed ixhee, zı Valqa yı'q' sak'al hı'ı, „Rəbb vuşuneva?" eyhes.

Kar deşda ixhee, zı kar qöqü, yizde Allahın do qəla qa'as.

10 Həmbalne hək'ee mang'une iyesiysne pisın cuvab immeyhe.

Deşxhee, həmbalee vas g'arğış ha'as, bınahıb val aaxvas.

11 Məxbınbı vobunbı dekkıs g'arğış ha'a,

yedis xayir-düə haa'a deş.

12 Məxbınbı vobunbı cocab-co cone ulesqa məttıba qöö,

come mı'q'ı'ke mətteepxha vooxhe deş.

13 Məxbınbı vobunbı ooğançe avqa ilyaaka,

cocab-co ç'ak'ıba haagvasdemee, uleppı ooqa qa'a.

14 Məxbınbı vobunbı silibı gılıncık akar,

itteyhesğu ghale ç'ikabı gitk'ın,

ç'iyene aq'valin kar deşinbı k'ööğə,

insanaaşine yı'q'neene fağıraaşikın ha'a.

15 Zeleyqa q'öyre yiş vor,

ts'erriyng'un do „Zas-hele",

q'ör'esıng'ı'nıd do „Zas-heleva" vod.

Xhebılle kar vodun, mısacad ayts'e deş,

yoq'ullevad eyhes eyxhe,

mançin „ç'əvva" eyhe deş:

16 ahalıy, vuxhne eexvas deyxiy,

xhineka idyayts'en ç'iye, „ç'əvva" itteyhen ts'a.

17 Dek demalqa giyxheng'un mayit

q'aaciraaşe oxhanas.

Yedine terbiyeyqa ooğançe avqa ilyaakana ul

derabışeene qənaaşe alqaahas.

18 Yizde ək'len g'ıts'dyayk'vanan xhebılle kar vod,

zalqa hidiyxharanıd yoq'ulle kar vodva eyhes eyxhe:

19 xəəb q'aacirna yəq, ganzıl xoçeyna yəq,

deryahee gamıyna yəq, gadeyna içiyne yik'eeqana yəq.

20 Yəqqı'le qığeyç'uyne xhunaşşeyna yəq inəxüb vob:

otxhun, ghal məttı'ı, eyhen: „Zı pisın vuççud hı'ı deş".

21 Xhebne karak avud ç'iye ı'ğiykar,

yoq'ullevad eyhes eyxhe, mançis öödəxə deş:

22 həmbalıke paççah ıxhay,

beynyavee ats'esınmeen gıney otxhuniy,

23 deykanna zəiyfa hey'iy,

həmbal zəiyfayn iyesiy zəiyfayne cigeeqa ılğeyç'uy.

24 Ç'iyeyne aq'val yoq'uble həyvan vob,

xuruda ixheeyid, mançiqa ək'el geeb vob:

25 nətsxürer gucuka dexheeyid,

çisın otxhuniy mançin g'ı'lı'na sa'a;

26 damanbıva* eyhen həyvanar geed gucuka dexheeyid,

xaybı ganzbışde yı'q'nee alya'a;

27 ts'irtyaaşiqa paççah dexheeyir,

manbı ı'ğiykarmee, gırgınbı sacigee g'oşun xhinne ı'ğiykar;

28 bənük' xıleka aqqas ıxheeyid,

man paççahaaşine xan-saraybışilqa ı'lqəə.

29 Xheyible həyvan vob,

yoq'ublevad eyhes eyxhe,

mançin iykıriy micagda vod,

g'el g'aççuyid uftanda vod:

30 həyvanaaşina inekke gucnana,

nişinecab ögil çina yəq badal hidya'an şir vod,

31 q'ına, vuk'ul axtıba avquna dadal,

g'oşunne vuk'lel ulyorzulyna paççah.

32,33 Nyak geeb ı'ğviykar hav'iyng'a, xhınyaal qı'ğəən xhinne,

quşes ı'xiyng'a, eb qı'ğəən xhinne,

qəl geeb quvxhayng'ab, aldatxhuniy qı'ğəə.

Mançil-allar ğucar-ğu xərra hagvasva, beynyavavalla hav'uxhee,

fıkreençe pisın karbı ı'lğəəxhee, ghal xıleka aqqe».