1 G'ı'liys yiz, qiyşalne gahısıb gyoğiy idyvaak'an xhinne,

beynyavaysıb hı'rmat avaak'a deş.

2 Maççareriy bebeçuler ileedaxvan xhinne,

hexxan g'arğışıd vak set'as deş, alixı əlyhəəsın.

3 Balkanıs çümq, əməleysıb g'antarağa avaak'an xhinne,

beynyavayne yı'q'əsıd həməxüd t'at'aa avaak'a.

4 Beynyavaysıd beynyavays sik'ı cuvab qımele.

Deşxhee, mang'uk akara qixhes.

5 Beynyavays beynyavays sik'ı cuvab qele.

Deşxhee, mang'usqa vuc k'orana ək'elynana xhinne qales.

6 Şavaayiy beynyavayka xabar g'axuvu,

cun g'elybı g'ats'atk'un, zulum ts'ıts'aa'ang'uk akar.

7 K'aang'vee g'el giyxhen xhinne,

beynyaveeyib misaala həməxüb ts'ıts'aa'a.

8 Beynyavays hı'rmat gyuvxhiy

sapandeena g'aye avt'ulıyk akar.

9 Ulyodğuyng'vee zazaakan bıtağ xıle aqqıyn xhinne,

beynyaveeyib misaala həməxüb ts'ıts'aa'a.

10 Vuk ayheng'vee, vukuka nena qariy ı'xı'yxən xhinne,

həməxürur beynyavayiy ögilqa qarına işilqa alyarat'ana vor.

11 Hali'iynçilqa siviyk'alna xvaa xhinne,

beynyaveeyib vucee hav'una beynyavavalla meeb haa'ana.

12 Cunecar ulesqa vuc k'orana ək'elikana xhinne qööna g'acunane?

Beynyavalqa mang'ule geeb umud vob.

13 Tanbalee eyhen: «Yəqqə aslan vod,

şahrabışee şir ı'ğiykar!»

14 Akka çine oxul nəxüdiy iliyk'ar,

tanbalır həməxür vuc g'alirxhuyne cigee iliyk'ar.

15 Tanbalee xıl g'abeedınçeeqa k'yoq'u,

man ghalyaqa ıkkeesse oyzarna.

16 Tanbalne ulesqa vuc,

yighne ək'elikan cuvab quvuynbışile ooqana xhinne qöö.

17 Merıng'une palğatuneeqa ilekkang'vee,

itteyhesğu şahreena xvaa k'ırıbışike avqaaqqa.

18 Ts'ayikan, gyabat'an vukbı ayhena bəç'ər nəxüriy,

19 merıng'us horbı hı'ı, «Zarafatniy hı'ıva» uvhunar həməxür vor.

20 Osbı ç'əveedaxhemee, ts'a k'ədəqqən.

İng'ulena-şeng'ulena haa'ana deşde cigee, saç'ivkuyid ç'əvexhen.

21 Nəxüdiy osakeyiy ghadırıke ts'a eyxhe,

sıç'ekvang'ukeb aldatxhuniy vooxhe.

22 İng'una-şeng'una haa'ang'un cuvab ittune xüvəyk akar,

man yik'ene k'oralybışeeqa g'e'exhxha.

23 İttuna miznana, pisınçika gyatsts'ıyn yik'nana insan,

ooğançe nuk'ra qadğuyne g'ı'bı'ne nyuq'vneke hı'iyne g'abık akar.

24 Duşmanee ittuna miz haa'a,

yik'eeme bicvalla avqaaqqa.

25 Mana g'üvənara yuşan ha'axhee, man k'anyaqa qıma'a,

mang'un yik' kara ı'dəəne karaka gyatsts'ı vod.

26 Mang'vee g'ımece ıxhay horaka dyugul he'eeyid,

mang'una qəl milletne ögee aq'valqa qığevç'es.

27 G'uyu ilyviyk'arang'usser caqa g'a'ayxhas əxə.

G'ayeb vuc qavaak'an hav'uyng'ulqa g'a'avxhas vəəxə.

28 Hor ha'ane mizek'le, şavukuniy vucee ha'a, mana g'ımece eyxhe.

Miz haa'ang'veeyib ver abaççe.