1 Yizda dix, vak'le zı uvhiyn g'ayxhe,

yizın əmrbı, gıranın kar xhinne havace.

2 K'ırıbıd k'orane ək'elyne suralqa aqqe,

mana yugba vaats'a vuxha, yik'eeqa vukkee.

3 Ək'el qoot'le,

axtıba mana hevqe.

4 Mana nuk'ra xhinne,

dyugulenna xaziyna xhinne t'abal hee'e.

5 Manke Rəbbile qəpq'ı'niy valqa hixharasın,

Allahne hək'eedın ats'aalid alyaat'asın.

6 K'orana ək'el hoolena Rəbb vor,

Mang'vee ats'aaliy ı'mı'r vaats'a vuxhay hele.

7 Mang'vee qopkuynbışis ğameepxhay hele,

məttına ı'mı'r haa'nbışdar g'alxan vor Mana.

8 Mang'vee qopkuynbışin,

mu'munaaşin yəqbı havace.

9 Manke valqa qopkuvallab, ədaalatıb hivxharasda,

gırgın məttın, yugun yəqbıd vak'le ats'axhxhesınbı.

10 K'orana ək'elib yiğne yik'eeqa gyavts'es,

ats'aalid yiğnemee ittu qixhes.

11 Darrakayn ğu havacesda,

ək'elinır ğu aqqasda.

12 K'orane ək'elin ğu pisınbışde yəqqı'leyiy

hor ha'ane insanaaşile havacesda.

13 Manbışe qotkuyn yəqbı g'ali'ı,

miç'axne yəqbışil alycaaxva,

14 pisda iş g'ooceme şadeebaxhenbı,

horbışikeyiy pisvalike kef qığayhe.

15 Mane insanaaşin yəqbı quç'otkur vod,

manbı alikkı-gikkiyne yəqbışin əlyhəə.

16 K'orane ək'elin ğu abır deşde,

ittune miznane zəiyfayle g'attixhan ha'as.

17 Mane zəiyfee mek'vranang'a hark'ınna adamiy g'alerçu,

Allahıs huvuyn cuvab yik'el hixan hı'iyn.

18 Mane zəiyfayne xaan insan qik'as hoyt'al,

məng'ı'ne yəqbışinır nyaq'vbışeeqa qıkkekka.

19 Məng'ı'sqa arına vuşucar yı'q'əlqa siyk'al deş,

məxrına üç'ürra axvas deş.

20 Mançil-alla ğu yugunbışde yəqqı'n hoora,

qopkuynbışda yəq avqe.

21 Qopkuynbışe ç'iyene aq'val ı'mı'r haa'as,

məttın yik'nanbı inyaa aaxvas.

22 Pisın insanar ç'iyene aq'vale dağaa'asınbı,

cuvab ıqdyaqqanbışikınıd ha'asın.