1 Çaxıriy eraq'iy ulyodğu, insanaaşe mebınbı matsxar haa'a, aldaaxhvan haa'a.

P'iyanna insan k'orana ək'elyna eyxhe deş.

2 Paççahna qəl aslanne ts'irık akar,

mang'us qəl huvuna canıke eyxhe.

3 Aldapxhıniyke əq'əna qexhena axtı qexhe,

gırgın beynyavabıme saç'ivkuybışil ulyookka.

4 Tanbalee ezang'a ezu deş,

sa'anang'ad avaykı deş.

5 İnsanne yik'eedınbı k'orane xhyanbışik akar,

ək'elikane insanılqame merıng'une yik'eedın hiyxharan.

6 Geebınbışe manbışilqa yı'q' qizaras eyxheva eyhe,

ts'omnana insanme nençene aveykes?

7 Qorkung'vee məttına ı'mı'r haa'a,

mang'uke g'abıynbı baxtivarar vuxhes.

8 Mısayiy paççah məhkama ha'asva taxtılqa ılqeç'e,

mang'usse uleppışika gırgına pisvalla curaa'as vəəxə.

9 «Zı yik' məttı'iyn,

zal nişinacab bınah deşda!»

Şavusse məxüd eyhes əxəye?

10 Horbışikan ulyoopkiyiy gyoopkiy –

man q'öyudsana Rəbbik'le g'ımece vod.

11 Uşaxır cune işbışike qıvaats'a.

Vucee ha'ane işbışe hagvasın, mana məttırayee, qorkurayee.

12 G'iyxhen k'ırıbı, g'ecen uleppı –

mançin q'öyudsana Rəbbee itxhın.

13 Geer g'alirxhuy ıkkiykınee, kar dena axvas.

Muğurra ixhee, ats'esınmeen kar oxhanas.

14 Kar ileşşeng'vee eyhen: «Pisdavud, pisınıd kar!»

Alişşu, əlyhəəmeeme, vuceecar-vuc hagva.

15 K'ınəəğəyiy geed gıranın g'ayebı vod,

ək'elikan cuvab yuşan ha'an ghalyme çile gıranda vod.

16 Dyats'ang'us zaaminra ulyorzulyung'un tanalin aleet'e,

mebınbışil-alla cuvab huvuyng'unud kar aqqe.

17 Horbışika hı'iyn kar insanısqa ts'etta ittuda qadayle,

mançile qiyğa ghal k'ak'alıka gyatsts'es.

18 Cuvabıl k'ırı alixhxheene, vasse yik'eedın ha'as əxəsın.

Muhaariba vukkekaxhee, yugna mısləhət t'abal hee'e.

19 Miz ookang'vee dyugulenın cuvab yuşan ha'a.

Geer yuşan ha'ang'uke hixve.

20 Şavaayiy dekkıqayiy yediqa bed-düə haa'a,

mang'un işix k'ətqəsın, mana miç'axiyvaleeqa gixhas.

21 Q'omançe zarabacab alyapt'ıyne mirasın

qiyğa xayir heles deş.

22 «İnçina qəl zı qığaahasda!» immeyhe.

Rəbbilqa yı'q' qizre, Mang'vee ğu g'attixhan ha'asda.

23 Horbışikan terezyugun g'ayebı Rəbbik'le g'ımece vod.

Horbışikan g'apanıd yugun deş vod.

24 İnsanık'le əlyhəəsın ciga hagvana Rəbb vor.

İnsanık'le vucee avquna yəq' nəxübna vaats'a vuxhes?

25 Ts'etta Allahıs g'assır,

qiyğa mançina fıkır opxhanang'vee cuscab gugu giviyxhe.

26 K'orane ək'elynane paççahee pisınbı curaa'anbı,

qiyğab manbı yöxxəyne g'ayeyn xhinne giviyxəranbı.

27 İnsanın rı'h Rəbbina bazir vobna,

mançin yik'en k'oralybı hagva.

28 Yugvaliniy qopkuvalin paççah havace,

mang'una taxt yugvalin it'umba avqaaqqa.

29 Mek'vunbışda guc manbışda uftaniyvalla vob,

cagvaran ç'ərbı q'əsvalina micagiyvalla vobna.

30 Cigabı ha'ane ı'xiybışe insanar qaa'anbı,

getuyn yik'en k'oralybı pisvalike mətta'a.