1 Cus irxhınna insan cus ıkkanançiqa qihna gexhana,

məxrıng'vee ək'elikane cuvabısıd ghalybı qa'a.

2 Beynyavays fıkır ooxhanas vukkiykan deş,

mang'vee yik'eedıncad eyhe.

3 Pisde insanıka sacigee hı'rmat deşiyvalla,

naş qıxhayka sacigeeyid k'ap'ik'ıle avqa qıxhay qadayle.

4 Mizelin cuvab k'oran xhyan xhinne vod.

K'orana ək'el xhyan ı'lqəən, xhyan qoyxharan ciga xhinne vod.

5 Məhkamee qorkung'ulqa bınah qa'asva,

pisıng'un sura aqqiy yugda deş vod.

6 Beynyavayne mizen aldatxhuniy ha'a,

ghalinır vuc geta'a.

7 Beynyavayne mizen mang'ukun ha'an,

mang'une ghalinıb cus gugu haa'a.

8 İng'una-şeng'una haa'ang'un cuvab ittune xüvəyk akar,

man yik'ene k'oralybışeeqa g'e'exhxha.

9 Tanbalba iş g'oocena

hı'ğəkkar ha'ang'uk akar.

10 Rəbbin do it'umna g'ala vob,

qorkuna maqa hixu, g'ittiyxhanna.

11 Karnang'usqa həməxüd qöö,

con kar axtıne barugbışika alyav'una g'alaniyxan.

12 Yik'ee insanee vuceecar-vuc axtıra ıkkekaxhee, mang'ukun ixhesın.

Vuceecar-vuc xərra ıkdekkanar hı'rmatıka eyxhe.

13 K'ırı ilydiyxhı cuvab quvuy

man naş qixhesın kar vod, beynyavavalla vob.

14 İnsanın yik' gırgıne ık'arbışis öödəxən,

yik' hatq'urxhee, şavusse mançis öörxəs əxəyiy?

15 Ək'elikang'vee ats'al alyaat'a,

k'orane ək'elikang'une k'ırıynıd man t'abal ha'a.

16 Payın insanıs yəq aaqa,

ç'ak'ıne insanaaşisqa hixhar ha'a.

17 Merna arı, qidghınbı ha'asmee,

ts'erra yuşan hı'ına qorkura eyxhe.

18 Çöp k'eççuyn saç'uvkiy ulyozar ha'a,

it'umba aldaaxhvananbıb curaa'a.

19 Tsimisna çoc alyapt'as dyooxhene g'alayk akar,

aldapxhıniybıd akkalyne rızayk.

20 İttune mizeka insanee cuna vuxhun avts'yaa'a,

cune cuvabıka ı'mresın kar ha'a.

21 Qik'uyir, axuyir mizene xıle vod,

mana vukkananbışe mançin şagav oxhanas.

22 Xhunaşşe hey'ing'uk'le yugun iveeke.

Mana Rəbbine ulen aqqıva eyhen vodun.

23 Kar deşing'vee rəhı'm hee'eva miz k'yaa'a,

karnang'veeme mang'us yı'q'ı'n alidghıniy qele.

24 Hambazar geeb qaa'ang'vee, cukun ha'a.

Hək'ena hambazme çocule k'ane eyxhe.