1 Ulesqa yugra qariy nuk'rayleyiy k'ınəəğəyle yugda vob,

yugun doyud xənne var-devletıle yugda vod.

2 Karnanayiy kar deşda sana-sang'uk akar –

q'öyursanar Rəbbee ipxhın.

3 Ək'elynang'uk'le dağamiyvalla g'avcu, mançile hexvana,

caahilyme ögeeqa qığeç'e, mançike uts'ur iveyke.

4 Vuceecar-vuc xərra ıkdekkang'us, Rəbbile qəyq'ənang'us,

geed kar, hı'rmat, ı'mı'r hoole.

5 Quç'opkurne yəqqı'l əlyhəəng'us zazaabıyiy gugubı qızaxxa,

can havacenar mançile hexvana.

6 Ts'eppacab uşaxık'le qopkuna yəq haagve,

q'əsvaleeyir mana mançile sak'alas deş.

7 Karnana, kar deşing'una xərna vor.

Şib alyaat'una insanır, şib huvuyng'una həmbal eyxhe.

8 Qəlasın ha'ang'ulqa ver abayle,

zulum hooleng'una xəbvallab xılençe g'ooşena.

9 Cun gıney kar deşing'us qidiykkın helena

barakatnana ixhes.

10 Matsxara haa'ana g'e'eşvee, saç'ivkuyid əlyhəəsın,

aldapxhıniyid, k'ap'ik'ıle avqa qeepxhayid deşxhesın.

11 Yik' məttına, miz ittuna,

paççahna hambazxhe eyxhena.

12 Rəbb geed ats'ang'uqa ilyakkı, mana havacena.

Xainne cuvabıkeme Mang'vee q'əran kar ha'a.

13 Tanbalee eyhen: «G'ad şir vod,

şahreeqa qığeç'vee, mançin zı qodu-sodasda!»

14 Merıng'une xhunaşşeyn ghal hapt'asde guguyk akar,

Rəbbis qəl huvuna mançeeqa gixhas.

15 Bəç'əriyvalla uşaxne yik'ek atipq'ın vooxhe,

terbiye helene t'at'aakame mana avaak'an haa'as vooxhena.

16 Karnana ixhesdemee, kar deşda hoyç'an-g'oyç'annayiy

karnang'us paybı helena vuççud dena axvas.

17 K'orane ək'elynanbışe eyhençil yugda k'ırı alixhxhe,

yik' yizde ats'aalis hele.

18 Man eyhenbı ğu yik'el aqqee,

manbı mizel havacee, yugda eyxhe.

19 Ğu Rəbbilqa umud hee'ecenva,

g'iyna zı vak'le manbı eyhe.

20 Zı yiğnemee ats'aliy kar xət qa'an

xhebts'al (30) uvhiy otk'un.

21 Məxüd vas hək'en cuvab xət qixhes,

ğu zasqa g'axuvuynbışis qotkuyn cuvab qeles əxəs.

22 Kar kılydanang'uqa gucub k'ılybava g'ımeşşe,

kasibna məhkamee k'ümööq'ə.

23 Rəbb alikkas manbışil-alla,

manbı hivşuynbı Rəbbee ı'mreke haa'as.

24 Zaraba qəl avqaaqang'uka hambaz mexhe,

sabır k'ıldanang'uka yəqqı'lqa qığmeç'e.

25 Deşxheene, mang'une yəqqı'n hoharas,

ğucar-ğu gugeeqa arçes.

26 Merıng'une şibıs zaaminna ulyorzuliyke,

ğucar-ğu aqqe.

27 Qelesın pıl dexhee,

vak avudun tyulyu hadğu qıkkees.

28 Dekkaaşile avxuyne,

yisseyne sarhadne g'ayeyn ciga badal hıma'a.

29 İş yugba vəəxəna g'eceyee?

Mang'vee paççahaaşis iş haa'as,

məxbınecab insanaaşis deş.