1 Yugun do yugne ətriyatıle,

qek’an yiğıd, yedike ıxhayne yiğıle yugda vod.

2 Ak’nane xaaqa hark’ıniy,

otxhun-ulyodğuynane xaaqa hark’ıniyle yugda vod.

Qik’uy gırgıng’une vuk’lel vodun,

hasre üç’ürung’vee man yik’el aqqecen.

3 Aq’va qı’iy, əqəna hı’iyle yugda vod.

Aq’va qı’iy insanne yik’enemee yugda vod.

4 K’orane ək’elynang’un yik' ak’nane xaa axva.

Beynyavaynme yik' otxhan-ulyoğane xaa.

5 K’orane ək’elynang’une cuvabıl k’ırı alixhxhiy,

beynyavayn ğu yug hı’iyle yugda vod.

6 Beynyavayn əqəna,

k’umk’umuk avud gyotxhanne zazane sesık akar.

Manıd q’əran vuççud deşin kar vodun.

7 K’orane ək’elynang’vee insanaaşike gucuka kar alyaat’axhee,

manar beynyavalqa siyk’al.

Rüşvatınır insan yəqqı’le qığayhe.

8 Sa karan ç’əvxhay, mançine gidğılıyle yugda vod.

Sabırıkana insan vuceecar-vuc hagvang’ule yugna vor.

9 Zaraba qəl hımaa’a,

qəl beynyavabışde yik’eexhe vooxhena.

10 «Nya’a ılğeeç’uyn yiğbı inçile yugda ıxhava?» qimiyghan.

K’orana ək’el vuxhayke məxdın kar qiyghan deş.

11 K’orane ək’elynane insanıqa

kar geednang’a sık’ıldad yugda eyxhe.

Mançin q’öyüd sana ıxhay

verığ g’oocene gırgıng’uneme yugda vod.

12 K’orane ək’elinır,

pılın xhinne insan havacena.

Ats’aalike insanıs in hiyxhar:

k’orane ək’elin çine iyesiyna ı’mı’r havaace.

13 Allahne işiqa ilyakke:

Mang’vee k’yoç’an hı’iyn

şavusse qotku qa’as əxəyee?

14 Yugne yiğbışee şadra ixhe,

pisde yiğbışilid in ats’axhxhe:

inıd, şenıd Allahee itxhın,

insanık’le cule qiyğa ixhesınbı mats’axhxhecenva.

15 Yizde q’ərane ı’mree zak’le geed kar g’acu:

qorkuna insan,

cune qorkuvaliqa ilydyakkı, qek’ana,

pisde insannab,

cune pisvaliqa ilydyakkı, ı’mı’r xıliy qooxhe.

16 Geerır qorkura mexhe,

ğucar ğu geerır k’orane ək’elika hımagva.

Nişil-allane ğucad vakın ha’as?

17 Geerır pisra mexhe,

bəç’ərra mexhe.

Nişil-allane ğu gah qidyabıcar qik’as?

18 İna mısləhət yik’el avqee yugba vob,

manasab yik’el hivxan hımaa’a.

Allahıle qəyq’ənang’vee q’önçulysana k’ırı iliyxhen.

19 K’orane ək’elin, ək’elynane insanıs,

şaharee vooxhene yits’ne xərıng’ule geeb gucxhe hoolena.

20 Məxrına qorkuna insan deşda,

mang’vee saccu yugvallacab hee’ecen,

bınah hımaa’acen.

21 İnsanaaşe eyhene gırgınçilqa fıkır hımoole.

Manke vak’le yiğne nukaree vaqa hokanıd g’ayxhes deş.

22 Vak’le yugda ats’a vod,

ğunad menne insanaaşiqa geed hoku.

23 Man gırgın zı k’orane ək’elika siliys ı’xı'.

«Zı k’orane ək’elikana ixhesva» uvhu.

K’orana ək’elyme zake əq’əna vuxha.

24 Ixha atk’ıniyn karbı şake əq’əna,

geed k’orada vod.

Manbı şavuk’le iveekeyiy?

25 Zas k’orana ək’eliy ats’al

t’abal ha’as, xət qixhes, ats’axhxhes ıkkan.

Zas pisde insanaaşina beynyavallayiy

ək’el deşinbışda bəç’əriyvalla vaats’a vuxhes vukkan.

26 Zak’le ats’axhxhayn,

merıng’us gugu hav’una zəiyfa

qik’uyle q’ap’ıra vor.

Məng’ı’n yik' torak,

xıleppıd zincirık akar.

Allahne ulesqa yugra qarına insan

məng’ı’le hexvana.

Bınahnaname insan

məng’ı’sqa gixhasda.

27 Mə’əllimee eyhen: zı gırgınçiqa sassadna ilyakkımee, manke ats’axhxha.

28 Zı t’abal he’eeyid, aveykı deş:

aazır adamiyne yı’q’nee

sa qorkuna aveykı,

manimeene zəiyfayne yı’q’neeme –

sa qorkuna aveykı deş.

29 Zalqa saccu sa kar hitxhır:

Allahee insanar qopkuba ipxhın,

manbımee alytipk’ılıynbı.