Eclesiastes 6

I’mı’r vuççud deşin kar vodun

1 Zak’le xəək avud sa medınıd insanaaşilqa ı’qqən divan g’acuyn. Man insanaaşik qitxhuyn divan geed yı’q’ı’n vodun: 2 məxrına insan vorna Allahee mang’us kar, xəbvalla, ules ıkkanan gırgın helen. Saccu mane karake mang’us otxhun-ulyoğas haysar deş. Sa dyats’anecad insanee mang’un kar oyxhan. Manıd q’əran vuççud deşin kara idyalesın, vuk’lelqa adıyn divan vodun.

3 Sa insanıqa vəş uşax ıxha, mang’vee xıliyna ı’mı’rıb hav’una. Mang’vee nimeena ı’mı’r hav’eeyib, mang’uk’le mısacad yiğ g’acu deş, mana k’eyxhır deş. Məxrıng’une hək’ee zı invaniy eyhes: qik’u yedike ıxhayn uşax mang’ule yugda eyxheyiy.

4 Mang’un yedike ıxhay

ıxha-ayk’anne booğak akar vod.

Mana miç’axiyvalee agu ayk’anna,

mang’un doyud ağmiş ha’a deş.

5 Mang’uk’le verığın aq’vad g’ece deş, vuççudud ats’axhxhe deş. Məxdıne uşaxna vaxxariyvalla şene insanıle geeb vooxhe. 6 Mane insanee q’öne yəqqees aazır sennana ı’mı’r hav’eeyib, mang’uk’le yiğ g’ıdecuxheene, mang’us mançike hucoona? Nekke qiyğa manbışin gırgınbı sa cigeeqa əlyhəəs.

7 İnsan cune vuxhnenemee qoxa,

meeb mang’una ul aats’e deş.

8 K’orane ək’elynang’un,

bəç’ərıle ooqan ciga hucoone?

Kar deşing’usse vuceecar vuc

mebınbışde ögil ıkkees əxəxhee,

mang’us mançike hucoona hixharas?

9 Vodunçis şadxhay,

deşin t’abal hı’iyle yugda vod.

Manıd q’əran vuççud deşin kar vodun,

mıtsıqab qihna g’adapxhıniyk akar.

10 Vonne gırgınçis, doyud huvu vodun.

İnsanır hucoo ıxhay ögilycad ats’a.

İnsanısse cule Gucnang’uka

xıliyn ha’as əxə deş.

11 Nimee geer yuşan he’ee,

manimeeyid q’əran cuvab ixhes.

Mançike insanıs hucoona hixharas?

12 Şavuk’lene ats’a, əq' xhinne ı’lğəəne, cit’ane, q’ərane ı’mree insannemee yugun hucooniyxan? Şavusse insanık’le eyhes əxəyee, cule qiyğa xəək avud hucoobıniyxan ixhes?