Agradecimento a Deus
Agradecer a Deus é louvor, adoração e reconhecimento da sua soberania. Dai graças ao Senhor porque Ele é bom — a sua misericórdia dura para sempre!
दिला का शूकर करी टेक्का तेऊ सेटा माथअ,
गिहा बोल्दी-बोल्दी करा तेऊए ज़ै-ज़ैकार।
तेऊए प्रऊल़ी भितरी डेओआ शूकर करदी,
अर तेऊए खोल़ै डेओआ ज़ै-ज़ैकार करदी।
तेऊओ करा शूकर अर ज़ै-ज़ैकार।
बिधाते ज़ै-ज़ैकार, तेऊओ करा शूकर,
किल्हैकि सह आसा भलअ अर सह झ़ूरा हाम्हां लै सदा।
हे बिधाता, तूह आसा मेरअ परमेशर, मुंह करनअ तेरअ शूकर।
मुंह करनी तेरी बड़ैई सारै दी।
तेऊओ शूकर करदी बोला तेऊए गिह,
तारा आल़ै बाज़ै बाज़दी करा तेऊओ भज़न।
मुंह करनी गिह गांठी ज़ै-ज़ैकार,
अर तेरअ शूकर करी करनी मुंह तेरी बड़ैई।
तूह बिधाता मुंह बच़ाऊंणै आल़अ अर
मुंह करनअ ताह ई प्रैंदै भरोस्सअ।
तंऐं किई मेरी मज़त, मुंह मनाऊंणी खुशी अर
गिहा बोली करनअ मुंह तेरअ शूकर।
ऐबै हे परमेशर बिधाता, हाम्हैं करा तेरअ शूकर अर हाम्हां करनीं तेरै महान नाओंए ज़ै-ज़ैकार।
किछ़ू गल्लो फिकर निं करी, पर हर गल्ला लै करनी परमेशरा का प्राथणां। ज़ुंण थारी ज़रुरत आसा सह खोज़णीं परमेशरा का, अर ज़ुंण बी तेऊ तम्हां लै किअ करनअ तेऊओ शूकर।
ज़ेभै-ज़ेभै मुंह थारी आद एछा, तेभै-तेभै करा हुंह तम्हां लै परमेशरो शूकर।
बैणा करै या कामां करै ज़ुंण बी तम्हैं करा, सोभै करा प्रभू ईशूए नाओंए, अर प्रभू ईशू करै करा परमेशरो शूकर।
हाम्हैं करा तम्हां आपणीं प्राथणां दी कबल्लै आद अर हाम्हैं करा तम्हां सोभिए बारै परमेशरो शूकर। हाम्हैं करा हर बगत आपणैं बाब परमेशरा सेटा थारै विश्वासे काम, झ़ूरी लै मैन्थ, अर म्हारै प्रभू ईशू मसीहा दी पाक्की आशा अर परमेशरा लै काम करनअ आद।
हुंह करा थारै बारै कबल्लअ आपणैं परमेशरो शूकर, किल्हैकि परमेशरै दैनअ मसीहा ईशू करै तम्हां लै जश।
पर परमेशरो आसा शूकर कि तेऊ दैनी म्हारै प्रभू ईशू करै हाम्हां लै म्हारै पाप अर मौता का ज़ीत।
पर हुंह करा परमेशरो शूकर! कि सह दैआ मसीहा दी सदा ई ज़ीत। हाम्हैं ज़िधी बी डेओआ तिधी खोज़ा हाम्हैं खुशीओ समाद ताकि सोभी का परमेशरो थोघ लागे।
ज़ुंण परमेशर बऊंणैं आल़ै लै बेज़अ अर खाणां लै रोटी दैआ, तेऊ दैणअ तम्हां लै बी तिंयां सोभै गल्ला ज़ेते तम्हां ज़रुरत आसा। तेऊ बढाऊंणीं थारी तिंयां गल्ला ज़ुंण तम्हैं बागै होरी लै दैणैं जोगी होए।
परमेशरा बणाणैं तम्हैं कई गल्ला दी सेठ ताकि तम्हैं झणैल़ू बणें। हाम्हां करै किऐ दै एऊ कामां करै करनअ कई लोगा परमेशरो शूकर।
ज़ै तम्हैं पबित्र आत्में बशै होए, तै करनअ आप्पू मांझ़ै भज़न अर परमेशरे स्तोती करना लै गिहा बोली अर होरी गिहा बोल्दै लागी ज़ुंण पबित्र आत्मां खोज़ा, अर आपणैं-आपणैं मन्नैं रहणअ प्रभू सम्हनै गिहा बोल्दै अर स्तोती करदै लागी।
सदा करनअ सोभी गल्ला लै म्हारै प्रभू ईशू मसीहे नाओंऐं बाब परमेशरो शूकर। एकी दुजे डरा हेठै रहअ मानदारी संघै किल्हैकि हाम्हैं करा मसीहो अदर।
ईशू ढाकी तिंयां पांज़ रोटी अर दूई म्हाछ़ली हाथै अर सरगा बाखा लै भाल़ी किअ परमेशरो शूकर। तेखअ लागअ रोटी चोल़ी-चोल़ी करै च़ेल्लै का दैंदअ अर तिंयां लागै लोगा लै बांडदै, अर तिंयां दूई म्हाछ़ली बी दैनी सोभी लै बांडी करै।
इहअ करै खैऊई सोभी लोगा का रोटी अर तिंयां सोभ लोग रज्ज़ै। बारा च़ठै भर्हुऐ तिन्नां रोटीए ज़ुंण पिछ़ू बच़ी अर म्हाछ़लीए बी बच़ै कई च़ठै।