Agradecimento pela vida
Agradecer pela vida é reconhecer que cada respiração é dom de Deus. Toda criatura que tem fôlego louve ao Senhor — porque Ele nos formou e nos sustenta com amor.
ज़ेत्रे ज़ींते प्राणी आन
सब यहोवारी तारीफ़ केरन!
यहोवारी तारीफ़ केरा!
मुक्ति देनेबाले परमेशरेरी तारीफ़
यहोवारी तारीफ़ भोए।
हे मेरी जान यहोवारी तारीफ़ केर।
अवं ज़िन्दगी भर यहोवारी तारीफ़ केरतो रेइलो;
ज़ांतगर अवं बनोरो रेइलो, तैखन तगर अवं अपने परमेशरेरू भजन ज़ोतो रेइलो।
किजोकि तीं मेरे एंत्रीं अंग बनेवरेन;
तीं अवं अम्मरे पेटे मां बनाव।
अवं तेरू शुक्र केरेलो, एल्हेरेलेइ कि अवं भयानक ते अद्भुत तरीके सेइं बनाव जेवरोईं,
तेरां कम्मां त हैरान केरनेबालन,
ते अवं एन रोड़ेच़ारे ज़ानताईं।
मेरो ढांचो तीं करां छ़पोरो न थियो,
ज़ैखन अवं खुफिया ठैरी बनेवरो थियो,
तैखन मेरी हेड्डी तीं करां छ़ेपोरी न थी।
तेरी एछ़्छ़ेईं अवं तैखने लाहोरो थियो,
ते मेरे सब अंग ज़ैना रोज़ बनते गाते थिये तैना बन्ने करां पेइले
तेरी किताबी मां लिखोरे थिये।
अवं सैरी उमरी यहोवारू गीत ज़ोतो रेइलो,
ज़ांतगर अवं ज़ींतोईं अपने परमेशरेरी शुक्रगुज़ारी केरतो रालो।
मेरू ध्यान केरनू तैस खुशी एज्जे,
किजोकि अवं त यहोवारे वजाई सेइं खुशी भोल्हो।
ई गल पक्की ज़ाना कि यहोवा ही परमेशरे,
तैन्नी असां बनेवरेम, ते असां तैसेरे अहम;
अस तैसेरे लोक, ते तैसेरे ड्लबड़ां केरि भैड्डां अहम।
शुक्र केरते तैसेरे फाटकन मां दाखल भोथ,
ते तैसेरे अंगन्न मां तारीफ़ केरते दाखल भोथ,
तैसेरू शुक्र केरा, ते तैसेरे नंव्वे जो धन ज़ोथ!
हे परमेशर, तेरी दया केत्री कीमतीए!
मैन्हु तेरे फंघां केरे छावी हैठ छ़पतन।
तैना तेरे घरेरी रोट्टरे,
बड़े जादे भोने सेइं रज़्ज़ेले।
ते तू अपने सुखेरे दरियाए
मरां तैन पियालो
किजोकि ज़िन्दगरो नाग तींए कांए;
ते असन तेरे लोई सेइं लौ मैल्हेली।
शुक्रगुज़ेरारी प्राथना
हे यहोवा, अवं तेरी तारीफ़ केरेलो
किजोकि तीं अवं गढे मरां खिचतां कढोरोईं,
ते तीं मेरे दुश्मन मीं पुड़,
खुश भोने नईं दित्तोरोए।
हे मेरे परमेशर यहोवा,
मीं तीं कां मद्दतरे लेई बिनती की ते तीं मीं चंगाई दित्तोरिए।
हे यहोवा तीं मेरे प्राण अधलोके मरां कढोरेन,
ते तीं अवं ज़ींतो रखोरोइं,
ते कब्री मां दबने करां बच़वरोईं।
ज़ींत देनेरे लेई शुक्र
हे यहोवा अवं पूरे दिले सेइं तेरू शुक्र केरेलो;
ते अवं तेरे सब चमत्कारेरे कम्मां केरे बारे मां ज़ोइलो।
अवं तेरे वजाई सेइं खुश ते मघन भोल्हो,
हे परमप्रधान परमेशर, अवं तेरे नंव्वेरू भजन ज़ोइलो।
ते सदा सेब्भी गल्लां केरे लेई प्रभु यीशु मसीहेरे नंव्वे सेइं बाजी परमेशरेरू शुक्र केरते राथ।
मसीह मां आत्मिक उमीद
इश्शे प्रभु यीशु मसीहेरे परमेशर ते कने बाजी केरि बडीयाई भोए, इश्शो रिश्तो मसीह सेइं भोनेरे वजाई सेइं तैने असन हर लिहाज़े सेइं तैना आत्मिक बरकतां दित्तोरिन, ज़ैना बरकतां सुर्गेरां एइतिन।
परमेशरे तैसेरे तैस दानेरे लेई ज़ैन समझ़ी करां बेइर शुक्र भोए।
बाजी परमेशरेरू शुक्र केरते राथ, ज़ैने अस इस काबल बनाए कि सुर्गेरे राज़्ज़े मां तैसेरे अपने लोकन सेइं साथी विरासती मां हिसेदार भोम। किजोकि तैने अस शैतानेरे अधिकारे मरां छुटेइतां अपने ट्लारे मट्ठेरे राज़्ज़े मां आने परमेशरेरे अपने मट्ठेरे बलिदाने सेइं असन पापां केरि माफ़ी दित्ती (यानी शैतानेरे राज़्ज़े करां आज़ाद किये)।
मसीह महान आए ते तैसेरां कम्मां
परमेशरे त कोई न लेही बटे, पन ज़ैखन तैसेरू मट्ठू मैन्हु बनू त तैनी परमेशर लोकन पुड़ बांदो कियो, ज़ैन किछ परमेशरे बनाव तैस पुड़ तैस कां सेब्भना जादे अधिकारे। किजोकि ई तै (मसीह) थियो ज़ैने सब किछ बनानेरे वक्ते परमेशरे सेइं कम कियूं, चाए अम्बरे पुड़ भोन या धेरती पुड़ भोन, लेवहरी भोन या आलेई, कुन तखत भोन, या रियासतां, कुन हुकूमतां भोन या अधिकार, सैरी चीज़ां तैस्से सेइं ते तैसेरेलेइ बनेइ। ते मसीह सेब्भी चीज़ां बनाने करां पेइलो थियो, ते सब चीज़ां तैस मां बनोरी रैतिन।
ते तू पेट भेरतां खाएलो, ते तैस रोड़े मुल्खेरे वजाई सेइं ज़ै तेरो परमेशर यहोवा तीं देलो तैस धन मन्नेलो।"
हे यहोवा, तीं मेरो मुकदमो लेड़तां मेरे प्राण बच़ाए।
अवं पहाड़ां केरे ज़ीलन तगर पुज़ोरो थियो;
अवं हमेशारे लेई ज़मीनी मां बन्द भोइ जेवरो थियो;
फिरी भी हे मेरे परमेशर यहोवा तीं मेरे प्राण गढे मरां बेइर कढे।
ज़ैखन मेरे प्राण निसने लगे, तैखन मीं यहोवा याद कियो;
ते मेरी प्राथना तीं कां बल्के पवित्र भवने मां पुज़्ज़ी जेई।