Salmos 36

परमेशरेरो प्यार ते मैन्हु केरि बुराई

साज़ बज़ानेबालां केरे प्रधानेरे लेई यहोवारे दास दाऊदेरू भजन

1 दुष्टी मैन्हेरो पाप तैसेरे दिले मां ज़ोते;

परमेशरेरो डर तैसेरे नज़री मां नईं।*36:1 रोम. 3:18.

2 तै अपने अधर्मे बांदे भोने

ते भिट्टो ठहरनेरे बारे मां

ते मने मां धोखो देनेरी गल्‍लां सोचते।

3 तैसेरी गल्‍लां अनर्थ ते धोखेरी आन;

तैनी अक्ल ते भलां कम्मां केरने करां

हथ खड़े किये।

4 अपने बिछ़ाने पुड़ तै

अनर्थ कम केरनेरे बारे मां सोचते;

तै अपने बुरे बत्ती पुड़ मज़बूती सेइं बनोरो रहते;

तै बुरैई सेइं नफरत न केरे।

5 हे यहोवा तेरी दया सुर्गे मांए,

तेरी सच़्च़ाई अम्बरे तगर पुज़ोरीए।

6 तेरो धर्म उच्‍चे पहाड़ां केरो ज़ेरोए,

ते तेरो न्याय समुद्रेरे डुग्घारेरो ज़ेरोए;

हे यहोवा, तू इन्सान ते हैवान दूईयां केरि

रक्षा केरतस।

7 हे परमेशर, तेरी दया केत्री कीमतीए!

मैन्हु तेरे फंघां केरे छावी हैठ छ़पतन।

8 तैना तेरे घरेरी*36:8 घरेरी मन्दर रोट्टरे,

बड़े जादे भोने सेइं रज़्ज़ेले।

ते तू अपने सुखेरे दरियाए

मरां तैन पियालो

9 किजोकि ज़िन्दगरो नाग तींए कांए;

ते असन तेरे लोई सेइं लौ मैल्हेली।✝36:9 यूह. 4:10,14;प्रका. 21:6.

10 अपने ज़ान्ने बालन पुड़ दया केरतो रा,

ते अपना धार्मिकतारां कम्मां

सिद्धे मने बालन मां केरतो रा!

11 घमण्डी मीं पुड़ लत खड़ी न केरि बटन,

ते दुष्ट अपने हथ्थेरे

ताकती सेइं मीं निशैनी न बटे।

12 हेरा, अनर्थ केरनेबाले बिछ़ड़ी जेवरेन;

तैन ढ्लैक दित्ती जेई, ते फिरी उठी न सकेले।