1 हे परमेशर अस तेरू शुक्र केरतम, अस तेरे नंव्वेरू शुक्र केरतम,

किजोकि तेरू नवं बांदू भोवरूए, तेरे हैरान केरनेबालां कम्मां केरू बियान भोइ राहोरूए।

2 ज़ैखन ठीक वक्त एज्जेलो,

तैखन अवं एप्पु ठीक-ठीक न्याय केरेलो।

3 ज़ैखन ज़मीन अपने सब रानेबालन समेत हिल्‍ली,

तैखन अव्वें तैसेरे खम्भे कायम केरताईं। (सेला)

4 मीं घमण्डी लोकन सेइं ज़ोवं, "घमण्ड न केरा,"

ते दुष्टन सेइं, "शिंग* उच्‍चु न केरा;

5 अपनु शिंग बड़ू उच्‍चु न केरा,

न क्रोड़ी खड़ी केरतां घमण्डेरी गल केरा।"

6 किजोकि बड़ोतरी न च़ढ़ते पासेरां, ते न डुबते पासेरां,

ते न सुनसान ठारारां एज्जे।

7 पन परमेशर न्याय केरनेबालोए,

तैए एक्‍की घटाते, ते होरि बद्धाते।

8 किजोकि यहोवारे हथ्थे मां अक कटोरोए,

ज़ैस मां दाछ़रो रस शैम्फी बालोए;

सच़्च़े दुनियारे सारे दुष्ट लोक आखरी तेप्पु तगर पीले।✝

9 पन अवं त हमेशा प्रचार केरतो रेइलो,

ते याकूबेरे परमेशरेरू भजन ज़ोइलो।

10 दुष्टां केरां अवं शिंगां केट्टी छ़डेलो,

पन धर्मी मैन्हु केरां शिंगां उच्‍चां कियां गालां।