भजन संहिता 54

मुक्तरे लेई प्राथना

साज़ बज़ानेबालां केरे प्रधानेरे लेई, तारीबाले बाज़न सेइं मश्कील ज़ैखन जीपी लोकेईं शाऊले सेइं ज़ोवं, "कुन दाऊद इश्शे दरमियाने मां छ़पोरो न राए?"

1 हे परमेशर अपने नंव्वेरे ज़िरिये सेइं मीं मुक्ति दे,

ते अपने शेक्ति सेइं मेरो न्याय केर।

2 हे परमेशर, मेरी बिनती शुन;

मेरे गल्‍लन पुड़ ध्यान दे।

3 किजोकि परदेशी मेरे खलाफ खड़े भेवरेन,

ते कुकर्म केरनेबाले मीं मारने चातन;

तैनेईं परमेशर अपने सामने न समझ़ो (सेला)

4 हेरा, परमेशर मेरो मद्दत केरनेबालोए;

प्रभु मेरे प्राणे सम्भालने बालोए।

5 परमेशर मेरे दुश्मना केरि बुराई वापस तैन पुड़ आनेलो;

हे परमेशर, अपने सच़्च़ैई सेइं तैन नाश केर।

6 अवं तीं अपने मेर्ज़ी सेइं बलि च़ाढ़ेलो;

हे यहोवा, अवं तेरे नंव्वेरी तारीफ़ केरेलो,

किजोकि इन भलू आहे।

7 किजोकि तीं मीं सैरी मुसीबतन करां छुटकारो दित्तोरोए,

ते हुनी अवं अपने दुश्मना केरि हारी हेरेलो।