1 हे यहोवा, तू किजो दूर खड़ो रहतस?

मेरे मुसीबतरे दिहाड़े तू किजो छ़ेप्पी गातस?

2 दुष्टां केरे ते घमण्डेरे वजाई सेइं हलीम मैन्हु पुड़ ज़ुलम भोतन;

तैना अपने बनेवरे योजनान मां फेसी गान।

3 किजोकि दुष्ट एपनी इच्छाई पुड़ घमण्ड केरते,

ते लालच़ी मैन्हु यहोवा शैरी देते ते तैसेरी निन्दा केरते।

4 दुष्ट अपने घमण्डे मां परमेशरे न तोप्पे;

तैसेरो पूरो खियाल ईए आहे कि कोई परमेशर अथ्थी नईं।

5 तै दुष्ट एपनी बत्ती पुड़ पक्‍को टिकोरो रहते;

तेरे धार्मिकतारे नियम तैसेरी नज़री करां बड़े दूर उच्‍चे पुड़न,

ज़ेत्रे तैसेरी बगावत केरनेबालेन तैन पुड़ तै हसते।

6 दुष्ट अपने दिले मां ज़ोते कि "अवं कधे न हेटी;

पीढ़ी करां पीढ़ी तगर कधे दुख मीं पुड़ न एज्जेलो।"

7 तैसेरू आशी लानती ते दगे बैज़ी ते ज़ुलमे सेइं भेरतांए;

शरारत ते बुराई तैसेरे ज़बानी पुड़े।✝

8 तै ड्लाव्वन मां छ़ेपतां मारनेरे लेई बिशते,

ते छ़ेपोरी ठारन मां बेकसूरन मारते,

तैसेरी एछ़्छ़ी मजबूर मैन्हु मारनेरे लेई लेगोरी रैतिन।

9 तै शेरेरो ज़ेरो झ़ैल्‍ले मां छ़ेपतां मारनेरे लेई बिशते;

तै गरीबे ट्लानेरे लेई मारनेरे लेई बिशते,

तै गरीबे जाले मां फसेइतां ट्लाते।

10 तै लाचार लोकन ढ्लन्च़ते ते झ़ुसतो गाते।

तै तैसेरे मज़बूत जाले मां बिछ़ड़तो गाते।

11 तै अपने मने मां सोचते, "परमेशरे बिसरोरूए,

तै अपनु तुत्तर छ़ुपाते; तै कधी न लाहेलो।"

12 उठ, हे यहोवा; हे परमेशर, अपनो हथ खड़ो केर ते न्याय केर;

ते ढ्लेन्च़ोरे लोकन न बिस्सर।

13 परमेशरे दुष्ट किजो घटिया समझ़ते,

ते अपने दिले मां ज़ोते, "तू हिसाब न नेलो?"

14 तीं हेरोरूए, ज़रूर तीं दुखन ते तकलीफन पुड़ ध्यान दित्तोरूए, ताके अपने हथेइं सेइं बदलो देस;

बे सहारो अपने आपे तेरे सुपुर्द केरते;

अनाथां केरो तूए मद्दत केरनेबालो आस।

15 बुरे ते दुष्टेरी पाखड़ ट्लोड़ी छ़ड;

तैन केरे बुरैइयरो लेखो ने, ज़ैखन तगर कि सब बुराई तैस मरां दूर न भोइ गाए।

16 यहोवा हमेशारे लेई महाराज़ोए;

यहोवारे मुल्खे मां दुष्ट लोक नाश भोतन।✝

17 हे यहोवा, तीं हलीम लोकां केरि इच्छा* शुनोरीए

तू तैन केरो दिल तियार केरेलो, ते तू ध्याने सेइं शुनेलो।

18 कि अनाथ ते ढ्लन्च़ोरां केरो न्याय केरस,

ताके मैन्हु ज़ै मित्ती सेइं बनोरोए फिरी होरन न डरेई बटे।