1 यहोवारी तारीफ़ केरा!

यहोवारे तारीफ़रे लेई नंव्वू गीत ज़ोथ,

भक्तां केरि मेण्डली मां तैसेरी तारीफ़ केरा!

2 इस्राएल अपने बनानेबाले परमेशरेरी वजाई सेइं खुशी भोए,

सिय्योनेरे रानेबाले अपने राज़ेरे वजाई सेइं खुशी मनान!

3 तैना लोक नेच़तां तैसेरे नव्वेंरी तारीफ़ केरन,

खेन्जरी ते सैन्गी बज़ेइतां तैसेरू भजन ज़ोन!

4 किजोकि यहोवा अपने लोकन सेइं खुशी रहते,

तै हलीम लोकन मुक्ति देइतां तैन शोभने बाले बनालो।

5 परमेशरेरे लोक ज़ींतनेरे वजाई सेइं खुशी भोन,

तैना अपने बिछ़ाने पुड़ भी तैसेरी जयजयकार केरन।

6 तैन केरि ज़बाना परमेशरेरी बड़ी तारीफ़ भोए,

ते तैन केरे हथ्थन मां दूई धारण बाली तलवारां रान,

7 कि तैना राष्ट्रन करां बदलो घिन्नी सखन;

ते रियासतां-रियासतां केरे लोकन सज़ाह देन,

8 ते तैन केरे राज़ां केरि शंगलन सेइं,

ते तैन केरे इज़्ज़तदारन बेड़न सेइं बेन्धतां रखन।

9 ते तैन्न ठहरावरेरी सज़ाह देले,

तैसेरे सब भक्तां केरि एरी इज़्ज़त भोल्ही।

यहोवारी तारीफ़ केरा।