1 हे मुल्ख-मुल्खेरे सब लोकव इन शुना!

हे दुनियाई मां सब रानेबालव, ध्याने सेइं शुना!

2 कुन आम, कुन खास

कुन अमीर, कुन गरीब, सब ध्यान देथ!

3 मेरू आशी अक्ल बियान केरेलू;

ते मेरे दिलेरी गल्‍लां समझ़री भोल्ही।

4 अवं अपनो कन्न कहावतां केरे पासे लेइलो,

अवं सारंगी बज़ेइतां अपनि छ़पोरी गल

बांदी केरेलो।

5 अवं तैखन किजो डेरि, ज़ेइस मुसीबतरे दिहाड़े एज्जन, ज़ैखन बुराई मीं घेरे?

6 ज़ै अपने जाईदाती पुड़ भरोसो रखते,

ते एपनी बड़े दौलती पुड़ घमण्ड केरते।

7 तैन मरां कोई भी अपने ढ्लाए कोन्ची भी

तरीके छुटेई न सके;

ते न परमेशरे तैसेरे बदले छुटानेरे लेई

किछ देइ सके।

8 किजोकि तैन केरे जानरी छुड़ौती बड़ी जादे

तैना आखरी तगर कधी न भेरि सकेले।

9 कोई एरहो नईं ज़ै हमेशा ज़ींतो राए,

ते कब्री न हेरे।

10 किजोकि सब लेइहोते, कि अक्लमन्द भी मरतन,

ते बेवकूफ ते मैन्हु ज़ै हैवानेरो ज़ेरोए, नाश भोते,

ते अपनि जाईदात होरि केरे लेई छ़डते।

11 तैना मने-मने मां इन सोचतन, कि तैन केरू घर

हमेशा बनोरू रालू,

ते तैन केरू घर पीढ़ी करां पीढ़ी तगर बनोरू रालू;

एल्हेरेलेइ तैना अपनि-अपनि ज़मीनरू नवं अपने-अपने नंव्वे पुड़ रखतन।

12 पन इज़्ज़त हासिल केरतां भी इन्सान कायम न राए,

तै जानबरां केरो ज़ेरो भोते, ज़ै मेरि गाते।

13 तैन केरि ऐह चाल तैन केरि बेवकूफीए,

फिरी भी तैन केरे बाद लोक तैन केरि गल्‍लन सेइं

खुश भोतन। (सेला)

14 तैना ज़ेन्च़रे पातालेरी भैड्डां केरे झुण्ड भोइ जे;

मौत तैन केरि पुहाल ठहरेली;

ते झ़ेझ़ां सच़्च़े लोक तैन पुड़ राज़ केरेले;

ते तैन केरि खूबसूरत शकल पातालेरो ड्लाछ़ोड़ो भोल्हो ते तैन केरो कोई आधार न भोल्हो।

15 पन परमेशर मेरे प्राण पातालेरे

कब्ज़े करां छुटालो;

तै मीं कबूल केरतां अपनो बनालो।

16 ज़ैखन कोई अमीर भोइ गाए, ते ज़ैखन तैसेरे घरेरी

शान-ओ-शोकत बेधी गाए।

तैखन तू डेरां न।

17 किजोकि मरते बार त तैनी एप्पु सेइं साथी किछ भी नईं नेनू;

ते न तैसेरी महिमा* तैस सेइं साथी कब्री मां गाली।

18 चाए तै ज़ींते वक्ते अपने आपे जो धन ज़ोतो राए।

ज़ैखन तू भलियाई केरतस, तैखन तैना लोक

तेरी तारीफ़ केरतन।

19 फिरी भी तै अपने बुज़ुर्गां केरे समाजे मां मिलाव गालो,

ज़ै कधे लौ न हेरेलो।

20 इन्सान चाए इज़्ज़त भी हासिल केरे पन अगर तैना

समझ़ न रखते भोन त

तैना जानबरां केरे ज़ेरेन, ज़ैना मेरि गातन।