भजन संहिता 50

परमेशर धर्मी न्याय केरनेबालोए

आसापेरू भजन

1 सर्वशक्तिमान परमेशर यहोवाए ज़ोवरूए,

ते दिहाड़ो निसनेरे पासे करां दिहाड़ो डुबनेरे पासे तगर दुनियारे

लोक कुजेवरेन।

2 सिय्योने मरां, ज़ैन बड़ू खूबसूरते,

परमेशरे अपनि महिमा हिराई।

3 इश्शो परमेशर एज्जेलो ते च़ुप न रालो;

अग तैस अग्री-अग्री सब किछ भस्म केरती गाली;

तैसेरे च़ेवरे पासन बड़ी आँधी च़लेली।

4 परमेशर अपने लोकां केरो न्याय केरनेरे लेई

अम्बरे जो ते ज़मीनी जो भी आवाज़ देलो,

5 "मेरे भक्त मीं कां अकोट्ठे केरा,

ज़ैनेईं बलिदान देइतां मीं सेइं करार कियोरोए!"

6 ते अम्बर तैसेरू धर्मी भोनेरू बियान केरेलू

किजोकि परमेशर एप्पु न्याय केरनेबालोए।✝50:6 भज. 97:6;इब्रा. 12:23. (सेला)

7 "हे मेरे लोकव, शुना, अवं गल केरताईं,

ते हे इस्राएल, अवं तेरे खलाफ गवाही देताईं।

परमेशर तेरो परमेशर अव्वें आईं।

8 अवं तीं पुड़ तेरी बेलि केरे बारे मां दोष न लेईं,

तेरी होमबेलि त रोज़ मेरे लेई च़ेढ़तिन।

9 न अवं तेरे गेवड़े मरां दांत,

न तेरे बाड़े मरां थाव्वे बलिदानेरे लेई नेइलो।

10 किजोकि जंगलेरो हर अक-अक जानबर,

ते हज़ारेईं पहाड़ां केरे जानबर मेरेन।

11 अवं पहाड़ां केरे सारे च़ुड़ोलन ज़ानताईं,

ते ज़ैना भी मैइदाने मां च़लने फिरने बाले जानबरन सब मेरेन।

12 अगर अवं नियन्नो भोथो त तीं सेइं ज़ोथो;

किजोकि दुनिया ते ज़ैन किछ भी तैस मांए तैन सब किछ मेरूए।✝50:12 प्रेरित. 17:25;1 कुरि. 10:26.

13 कुन अवं दांतेरू मास खेइं,

या थाव्वां केरो खून पीं?

14 परमेशरे जो शुक्रेरी बलि च़ाढ़ा,

ते परमप्रधान परमेशरेरे लेई अपनि मिन्नतां पूरी केर;✝50:14 इब्रा. 13:15;सभ. 5:4-5.

15 मुसीबतरे दिहाड़े मीं पुकार;

ते अवं तीं छुटेलो, ते तू मेरी महिमा केरि सकेलो।"

16 पन दुष्टे जो परमेशर ज़ोते:

"मेरो कानून शुनाने सेइं तीं कुन कम?

तू मेरे करारेरी चर्चा किजो केरतस?

17 तू त शिक्षाई सेइं नफरत केरतस,

ते मेरे गल्‍लन घटिया समझ़तस।

18 ज़ैखन तीं कोई च़ोर लाव, त तू तैसेरी सेंगती मां गेइतां खुशी भोव;

ते व्यभिचार केरनेबालन सेइं साथी हिस्सेदार भोव।

19 तीं अपनु आशी बुराई केरनेरे लेई खोल्‍लू,

ते तेरी ज़िभ धोखेरी गल्‍लां बनातीए।

20 तू होरन कां बिशतां अपने ढ्लाएरे खलाफ ज़ोतो रहतस;

ते अपने सक्‍के ढ्लाएरी चोगली केरतस।

21 इन कम तीं कियूं, ते अवं च़ुप राव;

एल्हेरेलेइ तीं समझ़ू कि परमेशर बिलकुल मेरो ज़ेरोए।

पन अवं तीं समझ़ालो, ते तेरी एछ़्छ़ी केरे

सामने सब किछ अलग-अलग हरेइलो।

22 हे परमेशरे बिसरने बालाव, ई गल रोड़ेच़ारे समझ़ा,

कोन्च एरू न भोए कि अवं तुसन छ़िन्दी,*50:22 छ़िन्दी नाश केरि

ते कोई छुटानेबालो न भोए।

23 शुक्रेरी बलि च़ाढ़ने बालो मेरी महिमा केरते;

ते ज़ै अपनो चाल चलन ठीक रखते

तैस अवं परमेशरेरी मुक्ति हरेइलो!✝50:23 इब्रा. 13:15."