1 हे यहोवा मेरे सतानेबाले केत्रे बेधी जेवरेन!

तैना ज़ैना मेरे खलाफ खड़े भोतन तैना हछ्छे आन।

2 बड़े ज़ने मेरे बारे मां ज़ोतन,

कि तैसेरी रक्षा परमेशरेरी तरफां न भोइ सके। (सेला*)

3 पन हे यहोवा, तू त मेरे च़ेवरे पासन मेरी ढाल आस,

मेरी महिमा ते मेरी क्रोड़ी उच्‍ची केरने बालोस।

4 अवं बड़े ज़ोरे सेइं यहोवा कां बिनती केरताईं,

ते तै मीं अपने पवित्र पहाड़े* पुड़ेरां जुवाब देते। (सेला)

5 अवं राती लेटतां झ़ुल्‍ली जेव;

ते फिरी झ़ेझ़ां बींझ़ी जेव, किजोकि यहोवा मीं सम्भालते।

6 अवं तैन हज़ारेईं दुश्मन्न करां न डेरि,

ज़ैना च़ेवरे पासना मेरे खलाफ खड़े भोतन।

7 उठ, हे यहोवा! हे मेरे परमेशर मीं बच़ा!

किजोकि तीं मेरे सब दुश्मना केरे ज़ैमोड़ी पुड़ बावरीए।

ते तीं दुष्टां केरे दंत ट्लोड़ोरेन।

8 मुक्ति* यहोवारी तरफां भोचे;

हे यहोवा तेरे लोकन पुड़ तेरी बरकत बनोरी राए!