भजन संहिता 60

छुटकारेरे लेई प्राथना

बज़ानेबालां केरे प्रधानेरे लेई दाऊदेरो मिक्ताम शूशनेदूत रागे मां। शिक्षा देनेबालो। ज़ैखन तै अरम्नहरैम ते अरमसोबा सेइं लड़ोरो थियो। ते योआबे वापस लूनेरे वैदी मां एदोमी लोकन मरां बारहे हज़ार मड़द मारे

1 हे परमेशर, तीं अस शैरी छ़डे,

ते अस ट्लोड़ी छ़डोरेम;

तू सेरकोव; फिरी असां ज़ेरे थिये तेरहे बनाए।

2 तीं ज़मीन एरी हिलाई; कि ज़मीनी दरज़ां जेई,

तैस ज़मीनरी दरज़न भेरि दे, किजोकि तै हेजू कम्बने लगोरीए।

3 तीं अपने लोकन मुश्किल वक्त हिराव;

तीं असन थरकानेबालो दाछ़रो रस पियावरोए।

4 ज़ैना तीं करां डरतन तीं तैन झण्डो दित्तोरोए,

कि तै सच़्च़ेरे वजाई सेइं खड़ो कियो गाए। (सेला)

5 अपने देइने हथ्थे सेइं बच़ा, ते इश्शी शुन,

ताके तेरे ट्लारे छुटाए गान।

6 परमेशर पवित्रतैई सेइं ज़ोते, "अवं खुशी मनेइलो;

अवं शेकेमेरे नगरे बेन्टेलो, ते सुक्‍कोतेरे वैदी नापेइलो।

7 गिलाद मेरोए; ते मनश्शे भी मेरोए;

ते एप्रैम मुल्ख मेरे क्रोड़रो टोपे,

ते यहूदा मेरो शाही सोटोए।

8 मोआबेरो मुल्ख मेरे धोनेरू भांडे;

ते एदोमेरे मुल्खे पुड़ अवं अपनि जुट्टी शैरेलो,

हे पलिश्तीन मुल्ख, मेरे वजाई सेइं जयजयकार केर।"

9 मीं क़िले बाले नगरे मां कौन पुज़ालो?

एदोम मुल्खे तगर मेरी अगवाई केने कियोरीए?

10 हे परमेशर, कुन तीं असां न शारे?

हे परमेशर, तू इश्शी सेनाई सेइं साथी जंगी मां न गास।

11 दुश्मनेरे खलाफ इश्शी मद्दत केर,

किजोकि इन्सानां केरि मद्दत बेकारे।

12 परमेशरेरी मद्दती सेइं अस ज़बरदस्त कम केरमेले;

किजोकि इश्शे दुश्मन्न तैए ढ्लन्च़ी देलो।