1 सच़्च़े परमेशर इस्राएले पुड़ महरबाने, ते तैन पुड़ ज़ैन केरो दिल शुद्धे।

2 पन मेरे पव घिश्कने बाले थिये,

मेरे पव डिलक्ने लगोरे थिये।

3 किजोकि ज़ैखन अवं दुष्टां केरू सुख हेरतो थियो,

तैखन तैन घमण्ड केरनेबालां केरे बारे मां जलन केरतो थियो।

4 किजोकि मरते बार तैन कोई तकलीफ न भोए,

पन तैन केरि ताकत बनोरी रहतीए।

5 तैन होरि मैन्हु केरि ज़ेरि तकलीफ न भोए;

ते बाकी मैन्हु केरि ज़ेरि तैन पुड़ कोई आफत न एज्जे।

6 एल्हेरेलेइ घमण्ड तैन केरे गलेरो हार बनोरोए;

ते तैन केरू छ़ुंहूं ज़ुलमे।

7 तैन केरि एछ़्छ़न चेर्भी च़ड़ोरीए,

तैन केरे दिलेरे खियाल हद्दी करां बधोरेन।

8 तैना मज़ाक बनातन, ते दुष्टे सेइं ज़ुलमेरी गल ज़ोतन;

तैना बड़े घमण्डे सेइं दंगे केरनेरी धमकी देतन।

9 तैना सुर्गेरे खलाफ* ज़ोतन,

ते तैना धेरती पुड़ ज़ोते फिरतन।

10 एल्हेरेलेइ परमेशरेरे लोक इरां वापस एज्जेले,

ते तैना एपनी गल्‍लां एन्च़रे पीले ज़ेन्च़रे पानी।

11 फिरी दुष्ट लोक ज़ोतन, "परमेशरे केन्च़रे पतो?"

किजोकि परमप्रधाने कोई ज्ञान नईं।

12 हेरा, इना त दुष्ट लोकन;

फिरी भी हमेशा आरामे सेइं रेइतां, धन-दौलत अकोट्ठी केरतन।

13 सच़्च़े मीं बेफैइदो अपनो दिल शुद्ध कियो,

ते हमेशा अपने हथ गलत कम केरने करां रोकतां रख्खे;

14 किजोकि सैरी दिहैड़ी अवं दुख-तकलीफी मां रहताईं,

रोज़ झ़ेझ़ां मीं सज़ाह दित्ती गाचे।

15 अगर मीं ज़ोवरू भोथू, "अवं एरू केरेलो"

त तेरे मट्ठां केरि औलादी सेइं गद्दारी केरेथो।

16 ज़ैखन अवं सोचने लग्गो कि अवं केन्च़रे सेमझ़ी,

त ई मेरे नज़री मां बड़ी जादे मुश्किल थी,

17 ज़ैखन तगर कि मीं परमेशरेरे पवित्र ठारी मां गेइतां

तैन दुष्ट लोकां केरो नितीजो न सोचो।

18 सच़्च़े तू तैन घिश्कने बैली ठारी पुड़ रखतस;

ते बिछ़ड़तां नाश केरतस।

19 तैना एक्‍की पले मां केन्च़रे उज़ड़ी जेवरेन!

तैना मिटी जे, तैना घबरेई-घबरेई नाश भोइ जे।

20 ज़ेन्च़रे बींझ़ने बालो सुपने घटिया ज़ानते,

तेन्च़रे हे प्रभु ज़ैखन तू बींझ़ेलो, तैखन तैन छाव सेमझ़तां घटिया ज़ानेलो।

21 मेरो मन त परेशान भोइ जेवरो थियो,

ते मेरे दिले मां बड़ी तकलीफ थी।

22 अवं त बेअक्ल ते न समझ़ थियो,

अवं तेरे सामने बेवकूफ जानबरेरो ज़ेरो थियो।

23 फिरी भी अवं हमेशा तीं सेइं साथी थियो;

तीं मेरो देइनो हथ ठेमतां रख्खो।

24 तू सलाह देतो, मेरी अगवाई केरेलो,

ते सब मेरी महिमा केरतां मीं एप्पु कां रखेलो।

25 सुर्गे मां मेरो होरो कौने?

तीं साथी रेइतां अवं धेतरी पुड़ ते किछ न चैईं।

26 मेरो दिल ते मन दूईये हारोरेन,

पन परमेशर सदारे लेई मेरो हिस्सो

ते मेरे दिलेरी चट्टान बनोरोए।

27 ज़ैना तीं करां दूर रहतन तैना नाश भोल्हे;

ज़ै कोई वेश्यारो ज़ेरो बेवफाए, तैस तू नाश केरतस।

28 पन परमेशरेरे नेड़े रानू, इन्ने मेरे लेई रोड़ूए;

मीं प्रभु परमेशर यहोवा अपनि छ़पनेरी ठार मन्नोरीए,

ज़ैस सेइं अवं तेरां सब कम्मां बियान केरी।