1 अवं हर वक्त यहोवारू शुक्र केरेलो;

ते तैसेरी तारीफ़ लगातार मेरी ज़बानी पुड़ राहेली।

2 अवं यहोवा पुड़ घमण्ड केरेलो;

हलीम लोक एन शुन्तां खुशी भोल्हे।

3 मीं सेइं साथी यहोवारी तारीफ़ केरा,

ते एज्जा अस मिलतां तैसेरे नंव्वेरी तारीफ़ केरम;

4 मीं यहोवा कां प्राथना की,

तैखन तैनी मेरी बिनती शुनी,

ते तैने अवं मेरे सारे डरे करां छुटाव।

5 ज़ैन केरि एछ़्छ़ी तैसेरे पासे लेगोरी रेइ,

तैन लौ मैल्ही;

ते तैन केरे तुत्तरे पुड़ कधे शर्मिन्दगी न एज्जेली।

6 इनी गरीब मैन्हे प्राथना की तैखन यहोवा शुनू,

तैनी तैस तैसेरी सारे दुखन करां छुटकारो दित्तो।

7 यहोवारो डर मन्नेबालां केरे च़ेवरे पासन तैसेरो दूत

डेरे लेइतां तैस खतरे करां बच़ाते।✝

8 अज़मेइतां हेरा कि यहोवा केत्रो भलोए!

केत्रो धने तै मैन्हु ज़ै तैस पुड़ भरोसो रखते।✝

9 यहोवा करां डरा, हे तैसेरे पवित्र लोकव!

किजोकि ज़ैना तैसेरो डर मनतन, तैन कोन्ची गल्‍लरो घाटो न भोए!

10 जुवान शेरन त कमी भोतीए

ते तैना ढ्लुखोरे भी रहतन;

पन यहोवारे तोप्पने बालन कोन्ची रोड़ी

चीज़रे घटी न भोल्ही।

11 हे बच्‍चव, एज्जा मेरी गल्‍लां शुना;

अवं तुसन यहोवारो डर मन्नो शिखालेलो।

12 कौन मैन्हु आहे ज़ै ज़िन्दगरी इच्छा रखते,

ते कने लम्मी उमर चाते कि भलियाई हेरे,

13 त तै अपनि ज़बान बुरी गल्‍लां केरने करां बाज़ रख्खे

ते अपने ऐशेरी खबरदारी केरे कि

तैस करां कोई धोखेरी गल न निस्से।✝

14 बुराई शैरतां भलियाई केर;

मेल मिलापे तोप ते तैसेरो पीछो केर।✝

15 यहोवारी एछ़्छ़ी धेर्मी लोकन पुड़ लेगोरी रेइचन,

ते तैसेरे कन तैन केरि बिनती पुड़

लग्गोरे रहतन।✝

16 यहोवा बुराई केरनेबालां केरे खलाफ भोते,

ताके तैन केरि याद धेरती पुड़ां मिटेई छ़डे।✝

17 धर्मी लोक बिनती केरतन ते यहोवा शुनते,

ते तै तैन सैरी मुसीबतन करां छुटकारो देते।

18 यहोवा ट्लुटोरे दिलां केरे नेड़े रहते,

ज़ैन उमीद नईं तैन्न छुटकारो देते।

19 धेर्मी पुड़ बेड़ी मुसीबतां त एइतन,

पन यहोवा तैस तैन सेभन करां

छुटकारो देते।✝

20 तै तैसेरी सेभी हेड्डी केरि हिफाज़त केरते;

ते तैन मरां अक भी ट्लोड़ी न गाए।✝

21 बुरो मैन्हु बुरैइयरे कम्मन सेइं मारो गालो,

ते धेर्मी सेइं बैर रखनेबाले दोषी भोल्हे।

22 यहोवा अपने दासां केरि जान कीमत देइतां बच़ाते;

ते ज़ेत्रे तैस पुड़ भरोसो रखतन

तैन मरां कोई भी दोषी न ठहरेलो।