इस्राएलेरे छुटकारेरे लेई प्राथना
आसापेरू भजन
1 हे परमेशर, गैर कौमां79:1 गैर कौमां गैर यहूदी लोक ज़ैना परमेशरे न ज़ानन। तेरी विरासती मां एवरिन;
ते तैनेईं तेरू पवित्र मन्दर भी भिट्टू कियूं;
ते यरूशलेम भी मलबेरो ढेर बनेवरोए।
2 तैनेईं तेरे दासां केरि लाशां अम्बरेरे च़ुड़ोलन खाने जो दित्ती,
ते तेरे भक्तां केरू मास धेरतरे जंगली जानबरन खुवाव।
3 यरूशलेमेरे च़ेवरे पासन तैनेईं खूनेरी ज़ेरि गड्डां बगेवरिन,
तैड़ी कोई बाकी नईं राहोरो कि ज़ै तैन दब्बे।
4 पड़ोसी केरे दरमियान इश्शी बदनामी भोल्ही;
च़ेवरे पासां केरे रानेबाले असन पुड़ हसतन, ते मज़ाक बनातन।
5 हे यहोवा, केइस तगर? कुन तू हमेशा तगर क्रोधे मां रालो?
तीं मां किताली तगर अग्गरी ज़ेरि जलन भड़कती राली?
6 ज़ैना कौमां तीं न ज़ानन,
ते ज़ैन रियासतां केरे लोक तीं कां प्राथना न केरन,
तैन पुड़ अपनि सब सरक भड़का!
7 किजोकि तैनेईं याकूब निगलो,
ते तैसेरी रानेरी ठार बरबाद की।
8 इश्शे नुक्सानेरे लेई बुज़ुर्गां केरे अधर्मेरां कम्मन याद न केर;
तेरी दया असन पुड़ जल्दी भोए, किजोकि अस बड़े बुरे हाले मां पेवरेम।
9 हे इश्शे मुक्तरे परमेशर, अपने नंव्वेरे महिमारे खातर इश्शी मद्दत केर;
ते अपने नंव्वेरे खातर असन छुटेइतां इश्शे पापन माफ़ केर।
10 गैर कौमां किजो ज़ोन कि एन केरो परमेशर कोड़िए?
इश्शे हेरते-हेरते तेरे दासां केरे खूनेरो बदलो नेव गाए।
11 कैदी केरू करलानू, तीं तगर पुज़ते;
ज़ैना नाश भोने बालेन तैन एपनी बेड़ी कुदरती सेइं बच़ा।
12 हे प्रभु, ज़ै लान-तान इश्शे पड़ोसेईं तीं जेई दित्तोरीए,
तै सत गुणा तैन केरे दोग्गे पुड़ वापस तैन दे।
13 तैखन असां ज़ैना तेरे लोक ते चरागारी भैड्डां अहम,
तेरू शुक्र हमेशा केरते रामेले;
ते पीढ़ी करां पीढ़ी तगर तेरी तारीफ़ केरते रामेले।