1 केत्रो धने तै ज़ेसेरे जुर्म माफ़ किये जे,

ते ज़ेसेरे पाप माफ़ भोइ जे।

ते ज़ेसेरे पाप ढक्‍के जेवरे भोन।✝

2 केत्रो धने तै मैन्हु ज़ेसेरे बुरे कम्मां केरो

हिसाबे यहोवा न ने,

ते कने ज़ेसेरे दिले मां कपट नईं।✝

3 ज़ैखन अवं च़ुप राव

त सैरी दिहैड़ी करलाते-करलाते

मेरी हेड्डी गेली जेई।

4 किजोकि तेरो हथ रात दिहैड़ी मीं पुड़ भारी थियो,

ते मेरी ताकत गेर्मरे वजाई सेइं

शुक्‍की जेई। (सेला)

5 ज़ैखन मीं अपनो पाप तीं पुड़ बांदो कियो

ते अपनो अधर्म न छ़ुपाव,

ते ज़ोवं, "अवं यहोवारे सामने अपने पाप मन्नेलो,"

तैखन तीं मेरे अधर्म ते पाप माफ़ किये। (सेला)

6 एल्हेरेलेइ हर भक्त तीं करां एरे मौके पुड़

प्राथना केरे, ज़ैखन तू मैल्ही सकस।

सच़्च़े ज़ैखन सैलाब एज्जे,

त तैस मौके तैस भक्ते कां न पुज़ेलो।

7 तू मेरे छ़पनेरी ठारस;

तू मीं मुसीबती करां बच़ेइतां रखेलो;

तू मीं छुटकारेरे गीतन सेइं घेरतां

रखेलो। (सेला)

8 अवं तीं अक्ल देइलो, कने ज़ैस बत्तां तीं

च़लनू भोल्हु, तैस मां तेरी अगवाई केरेलो;

अवं तीं पुड़ सिद्धी नज़र रेखेलो

ते सलाह देतो रेइलो।

9 तुस घोड़े ते खचरां केरे ज़ेरे न बना ज़ैन समझ़ न भोए,

ज़ैना लगाम ते रेस्सी सेइं रोकने पेतन,

नईं त तैना तेरे कैबू मां नईं एजने बाले।

10 दुष्टे त बड़ी तकलीफ भोल्ही;

पन ज़ेसेरो भरोसो यहोवा पुड़े

तैसेरी करुणा तैस घेरतां रखेली।

11 हे धर्मी लोकव यहोवारे वजाई सेइं खुश,

ते मघन भोथ, ते हे सब सिद्धे मने बालव

आनन्दे सेइं जयजयकार केरा!