1 परमेशर उठे, त तैसेरे दुश्मन तितर-बितर भोन;

तैस सेइं नफरत केरनेबाले तैसेरे सामनेरां नेश्शी गाले!

2 ज़ेन्च़रे तूं उडरते, तेन्च़रे तू तैन ऊडार;

ज़ेन्च़रे मोम अग्गी सेइं गलते,

तेन्च़रे बुरे लोक परमेशरेरी हज़ूरी मां नाश भोइ गाले।

3 पन धर्मी खुशी भोन; तैना परमेशरेरे सामने खुश भोन;

तैना आनन्दे मां मघन भोन!

4 परमेशरेरां गीतां ज़ोथ, तैसेरे नंव्वेरू भजन ज़ोथ;

ज़ैना बगैर पैनेरे मुल्खन मां सुवार भोइतां च़लतन,

तैसेरे लेई सड़क बनाथ;

तैसेरू नवं यहोवाए, एल्हेरेलेइ तुस तैसेरे सामने खुश भोथ!

5 परमेशर अपने रानेरे ठैरी* मां,

अनाथां केरो बाजी ते विधवां केरो न्याय केरनेबालोए।

6 परमेशर अनाथां केरू घर बसाते;

ते कैदन छुटेइतां आज़ाद केरते;

पन मुखालफन शुकोरी ज़मीनी पुड़ रानू पेते।

7 हे परमेशर, ज़ैखन तू अपने लोकन अग्री-अग्री च़लतो थियो,

ज़ैखन तू शुकोरी ज़मीनी मां सेनाई समेत च़लो, (सेला)

8 तैखन ज़मीन हिलने लगी

ते अम्बर भी परमेशरेरे सामने बिछ़ड़ने लगू,

सीनै पहाड़ परमेशर, हाँ इस्राएलेरे परमेशरेरे सामने हिल्‍ली जेवं।✝

9 हे परमेशर, तीं बेहिसाब झ़ड़ी दित्ती;

तेरो अपनो हिस्सो त बड़ो शुकोरो थियो, पन तीं तै हरो भरो कियो;

10 तेरे लोक तैस मां बस्सने लग्गे;

हे परमेशर तीं अपने भलियाई सेइं गरीब मैन्हेरे लेई तियारी कियोरीए।

11 प्रभु हुक्म देते,

तैखन खुशरी खबर शुन्नेबालां केरि बड़ी सेना भोइ गातीए।

12 अपने-अपने सेनाई समेत दुश्मन राज़े नशते गातन,

ते कौन्शां लूटी मां बेन्टी गैतिन।

13 कुन तुस गब्बां केरे बाड़े मां झ़ुल्‍ली गाले?

ते एरे कबूतरारे ज़ेरे भोल्हे ज़ैसेरां फंघां चैंदी सेइं

ते ज़ैसेरां फंघां हेइड्ले सोन्ने सेइं पलैटोरां भोन?

14 ज़ैखन सर्वशक्तिमान परमेशरे तैसेरे राज़े तितर-बितर किये,

तैखन मन्ना कि सल्मोन पहाड़े पुड़ हिवं पेव।

15 बाशानेरू पहाड़ परमेशरेरू पहाड़े;

बाशानेरू पहाड़ बड़ू उच्‍चु पहाड़े।

16 पन हे उच्‍चे पहाड़व, तुस किजो तैस पहाड़े घूरतथ,

ज़ैन परमेशरे अपने बासेरे लेई चावरू आहे,

ते ज़ैड़ी यहोवा हमेशा बास केरेलो?

17 परमेशरेरे रथ बीह हज़ार, बल्के हज़ारेईं-हज़ारेईं आन;

प्रभु तैन केरे दरमियाने,

ज़ेन्च़रे तै सीनै नंव्वेरे पवित्र ठैरी मांए।

18 तू उच्‍चे पुड़ च़ढ़, तू लोकन गुलैमी मां घिन्नी जेव;

तीं मैन्हन करां, बल्के ढीठ मैन्हन करां भी भेंट नेही,

ज़ैस सेइं यहोवा तैन मां बास केरे।✝

19 धने तै प्रभु, ज़ै रोज़ इश्शो भारो छ़ूते;

तैए इश्शो मुक्ति देनेबालो परमेशरे। (सेला)

20 तैए इश्शे लेई बच़ानेबालो परमेशर ठहरो;

यहोवा प्रभु मौती करां भी बच़ाते।

21 पक्‍को परमेशर अपने दुश्मना केरे क्रोड़ी पुड़;

ते ज़ै अधर्मेरे बत्ती पुड़ च़लतो रहते,

तैसेरे बालन समेत भेरतां खोपड़ी भेन्नी देलो।

22 प्रभुए ज़ोवं, "अवं तैस बाशाने मरां केढतां आनेलो,

समुन्दरेरे थलेरां भी अवं वापस एन्हेलो।

23 कि तू अपने पव्वन खूने मां डोबेलो,

ते तेरे दुश्मन तेरे कुतरां केरो हिस्सो भोल्हे।"

24 हे यहोवा परमेशर, तेरे जुल्‍लूस लेइहोने लगोरेन।

मेरे परमेशर, राज़ेरे जुल्‍लूस पवित्र ठैरी लेइहोने लगोरेन।

25 अग्री-अग्री गीतां ज़ोनेबाले ते पत्पती साज़ बज़ानेबाले च़ेली राहोरेन,

ते च़ेवरे पासन जुवान कुइयां डफली बज़ैती थी।

26 सभान मां यहोवारू

हे इस्राएलेरे चशमे मरां निस्सोरे लोकव,

प्रभुएरू शुक्र केरा।

27 पेइलो बिन्यामीन ज़ै सेभन करां निकड़ो गोत्रे,

फिरी यहूदारे हाकिम ते तैन केरि सभा

ते जबूलून ते नप्ताली एरे हाकिम आन।

28 तेरे परमेशरे तेरी शक्ति बनेवरीए,

हे परमेशर अपनि शक्ति असन पुड़ बांदी केर, ज़ेन्च़रे तीं पेइली बांदी कियोरीए।

29 तेरे भवनेरे वजाई सेइं ज़ैन यरूशलेमे मांए,

राज़ो तेरे लेई भेंट आनेलो।

30 निरैठन मां रानेबाले जंगली जानबरन,✝

संढां केरे झुण्ड ते मुल्खे-मुल्खेरे बछ़ड़न झ़िड़क दे,

तैना चैंदरे टुक्डां केरे लेई झुकेले;

ज़ैना लोक जंगी सेइं खुशी रहतन, तैना तैनी तितर-बितर कियोरेन।

31 मिस्रे मरां अधिकारी एज्जेले;

कूशी* अपने हथ प्राथनाई मां परमेशरेरे पासे बड़े लूशी खड़े केरेले।

32 हे ज़मीनरे रियासतां-रियासतां केरे लोकव परमेशरेरू गीत ज़ोथ;

प्रभुएरू भजन ज़ोथ, (सेला)

33 ज़ै सेभना उच्‍चे सनातन सुर्गे मां सुवार भोइतां च़लते;

हेरा तै अपनि आवाज़ शुन्ते, तै गम्भीर आवाज़ शेक्ति बालीए।

34 परमेशरेरी शेक्तरे बारे एलान केरा,

तैसेरी महिमा इस्राएले पुड़ पेवरीए,

ते तैसेरी शक्ति अम्बरे मांए।

35 हे परमेशर, तू अपने पवित्र ठारन मां डरेरे काबलस,

इस्राएलेरो परमेशरे अपने लोकन ताकत ते शक्ति देनेबालोए।

परमेशर धने।