परमेशरेरे दयारे लेई तारीफ़रू गीत
दाऊदेरू भजन
1 हे मेरे मन यहोवारी तारीफ़ केर;
ते ज़ैन किछ मीं मांए, तैसेरे पवित्र नंव्वेरी तारीफ़ केर।
2 हे मेरे मन, यहोवारी तारीफ़ केर,
ते ज़ैन किछ तैने तेरे लेई कियूं तैस न बिस्सर।
3 किजोकि तैए तेरे सारे पाप माफ़ केरते,
तै तेरी सैरी बिमैरन बझ़ाते।
4 तैए तेरी जानी नाश भोने करां बच़ाते,
ते तेरे दोग्गे पुड़ प्यार ते दयारू ताज लाते।
5 तै तेरी ज़िन्दगी रोड़ी-रोड़ी चीज़ां देइतां भरपूर केरते,
ते ज़ैस सेइं तेरी जुवानी उकाबेरी ज़ेरि नंव्वी भोतीए।
6 यहोवा सेभी पस्त भोवरां केरे लेई
धर्म ते न्यायेरां कम्मां केरते।
7 तैनी अपनि बत मूसे,
ते इस्राएली लोकन पुड़ अपना कम्मां बांदां कियां।
8 यहोवा दया केरनेबालो, अनुग्रह केरनेबालो, क्रोधे केरने मां च़िर लानेबालो ते बड़ो प्यार केरनेबालोए।
9 न तै हमेशा कोन्ची हदैइत केरतो रालो,
ते न आखरी तगर नाराज़ रालो।
10 तैने असन सेइं इश्शे पापां केरे मुताबिक बर्ताव न कियो,
न इश्शे पापेरे कम्मां केरे मुताबिक असन बदलो दित्तोरोए।
11 ज़ेन्च़रे अम्बर धेरती करां उच्चु आहे,
तेन्च़रे तैसेरो प्यार तैन पुड़े, ज़ैना तैसेरो डर मनतन।
12 ज़ेत्रो दिहाड़ो निसनेरो पासो दिहाड़ो डुबनेरे पासेरे करां दूर आहे,
तैने इश्शे पाप असन करां तेत्रे दूर कियोरेन।
13 ज़ेन्च़रे बाजी अपने बच्चन पुड़ तरस खाते,
तेन्च़रे यहोवा तैन पुड़ तरस खाते, ज़ैना तैसेरो डर मनतन।
14 किजोकि तै इश्शी सृष्टि ज़ानते,
ते तै तैस याद रखते कि मैन्हु मित्तीए।
15 इन्सानेरी उमर घासेरे ज़ेरि भोतीए,
ते तै जंगली फूड़ोवेंरो ज़ेरो फुलते।
16 ज़ैखन तैस पुड़ हवा पेचे त तैन तैड़ी न राए,
न तैड़ी तैसेरी ठार पिशैनोए।
17 पन यहोवारो प्यार तैसेरो डर मन्ने बालन पुड़ जुगे-जुगे,
ते तैसेरी धार्मिकता पोट्लड़न धिहोड़न पुड़ भी बांदी भोती राली,
18 मतलब तैन पुड़ ज़ैना तैसेरे करारे मनतन
ते तैसेरे उपदेशन याद केरतां तैन पुड़ च़लतन।
19 यहोवा परमेशरे त अपनो तखत सुर्गे पुड़ कायम कियोरोए,
ते तैसेरू राज़ पूरी सृष्टि पुड़े।
20 हे यहोवारे दूतव, तुस ज़ैना शेक्ति बालेथ,
ते तैसेरे वचने मन्ते ते पूरे केरतथ।
तैस जो धन ज़ोथ
21 हे यहोवारी सेनाव103:21 सेनाव स्वर्गदूत, हे तैसेरे सेवकव,
तुस ज़ैना तैसेरी इच्छा पूरी केरतथ, तैस जो धन ज़ोथ!
22 हे यहोवारी सारी रच़ना,
तैसेरे राज़ केरनेरे सब ठारन मां तैस जो धन ज़ोथ।
हे मेरे मन, तू यहोवा जो धन ज़ो!