1 हे मेरे यहोवा परमेशर, मेरो भरोसो तीं पुड़े,

सब पीछो केरनेबालन करां तू मीं बच़ा ते छुटकारो दे,

2 एरू न भोए कि तैना शेरेरे ज़ेरे,

मीं छ़िन्दतां टुक्ड़े-टुक्ड़े केरन;

ते कोई मीं छुटानेबालो न भोए।

3 हे मेरे परमेशर यहोवा, अगर मीं एन कियोरू भोए,

ते अगर मेरे हथ्थन सेइं बुराई भोवरी भोए।

4 अगर मीं अपने मेल रखनेबालन सेइं भलियाई केरनेरे बदले बुराई कियोरी भोए,

बल्के ज़ै बगैर वजा मेरो दुश्मने लुटोरो भोए।

5 त दुश्मन मेरी जानरो पीछो केरतां मीं ट्लाए,

ते मेरे प्राण मित्ती पुड़ ढ्लेन्च़े,

ते मीं बेइज़्ज़त केरतां मित्ती मां मिलाए। (सेला)

6 हे यहोवा अपने क्रोधे मां उठ;

क्रोधे सेइं भेरतां मेरे सताने बालां केरे खलाफ तू खड़ो भो;

ते मेरे लेई बींझ़! तीं न्यायेरो हुक्म दित्तोरोए।

7 च़ेवरे पासन मुल्खां-मुल्खां केरे लोक अकोट्ठे भोन;

तू फिरी तैन पुड़ उच्‍चे पुड़ेरां राज़ केर।

8 यहोवा कौमां-कौमां केरे लोकां केरो न्याय केरते;

हे यहोवा मेरी धार्मिकता ते सच़्च़ेरे मुताबिक मेरो न्याय केर।

9 कधे एरू भोए कि दुष्टां केरि बुरैइयरो खातमो भोए, पन धेर्मी तू बच़ेइतां रख;

किजोकि धर्मी परमेशर मन ते दिलेरो परखने बालोए।

10 मेरी ढाल परमेशरेरे हथ्थे मांए,

तै सच़्च़े मने बालन बच़ाते।

11 परमेशर धर्मी ते न्याय केरनेबालोए,

बल्के एरहो परमेशरे, ज़ै रोज़ क्रोध केरते।

12 अगर मैन्हु बाज़ न एज्जे त तै अपनि तलवार पलेइतां रखेलो;

ते जंगरे लेई अपनु धनुष तियार केरेलो।✝

13 ते तैस मैन्हेरे लेई मौतरे हथियार भी तियार केरतां रखोरेन:

तै अपने तीरन अग्गरे बनाते।

14 हेरा तैस दुष्टे बुरे कम्मेरी तकलीफ भोइ राहोरीए,

तैस बुरैइारू गर्भे, ते तैस करां झूठ पैदा भोवं।

15 तैनी होरि केरे लेई गत घेड़तां डुग्घू कियोरूए,

ते ज़ै खाई तैने बनेवरी थी तैस मां तै एप्पु बिछ़ड़ो।

16 तैसेरी बुराई उलटी तैसेरे दोग्गे पुड़ एज्जेली,

तैसेरो ज़ुलम तैस्सेरे कुपाए पुड़ पेलो।

17 अवं यहोवारे धार्मिकतारे मुताबिक तैसेरू शुक्र केरेलो,

ते परमप्रधान यहोवारे नंव्वेरू भजन ज़ोइलो।