बचावेरे लेई प्राथना
बज़ानेबालां केरे प्रधानेरे लेई तारीबाले बाज़े सेइं दाऊदेरू भजन
1 हे परमेशर, मेरी बिनती शुन,
मेरे प्राथनारे पासे ध्यान दे।
2 अवं दुनियारे आखरी कूने पुड़ेरां तीं पुकारेलो,
ज़ै चट्टान मेरे लेई उच्चीए, तैस पुड़ मीं ने;
3 किजोकि तूए मेरी छ़पनेरी ठारस,
ते दुश्मन करां बच़ानेरे लेई उच्चो क़िलोस।
4 अवं हमेशा तेरे तेम्बु मां बनोरो रेइलो।
अवं तेरे फंघन हैठ छ़ेपतां रेइलो।
5 किजोकि हे परमेशर, तीं मेरी मिन्नतां शुनी,
ज़ैना तेरे नंव्वे करां डरतन, तैन केरो हिस्सो तीं मीं दित्तोरोए।
6 राज़े तू लम्मी उमर बखशेलो;61:6 राज़े तू लम्मी उमर बखशेलो तैसेरे एजने बाले पीढ़रे लोक राज़गेद्दी पुड़ बिश्शेले।
तैसेरे साल पीढ़ी-पीढ़ी केरे बराबर भोल्हे।
7 तै हमेशा तगर परमेशरेरे हज़ूरी मां रालो;
तू अपनि दया ते सच़्च़ाई तैसेरी हिफाज़तरे लेई ठहरेइतां रख।
8 एन्च़रे सेइं अवं सदा तेरे नंव्वेरू भजन ज़ोइ-ज़ोइ
अपनि मिन्नतां रोज़ पूरी केरेलो।