भजन संहिता 64

अनर्थ केरनेबालन करां बचाव

बज़ानेबालां केरे प्रधानेरे लेई दाऊदेरू भजन

1 हे परमेशर, ज़ैखन अवं तीं कां बिनती केरि, तैखन मेरी शुन;

मेरी ज़िन्दगी दुश्मना केरे डरे करां बच़ेइतां रख।

2 मीं कुकर्मी मैन्हु केरि साज़िशी करां,

ते अनर्थ केरनेबालां केरे हंगामे करां छ़ुपेइतां रख।

3 तैनेईं अपनि ज़बान तलवारारी ज़ेरि तेज़ कियोरीए,

ते अपनि सखत गल्‍लां केरे तीर च़ाढ़तन।

4 ताके छ़ेपतां बिशतां तैन बेकसूरन पुड़ च़लान;

तैना निडर भोइतां अचानक तैन मारतन भी।

5 तैना बुरां कम्मां केरनेरे लेई हिम्मत केरतन;

तैना एक्‍की होरि सेइं फंदे लानेरे लेई मुशोरो भी केरतन,

ते अपने आपे सेइं ज़ोतन, "असन कौन लाहेलो?"

6 तैना बुरी योजना कढतन;

ते एक्‍की होरि सेइं ज़ोतन, "असेईं पक्‍की योजना तोपतां कढी।"

किजोकि मैन्हेरो मन ते दिलेरे खियाल डुग्घे आन।

7 पन परमेशर तैन पुड़ तीर च़लालो;

ते अचानक तैना ज़खमी भोइ गानेन।

8 तैना एपनी गल्‍लन सेइं ठोकर खेइतां बिछ़ड़ी गाले;

ज़ेत्रे भी तैन तकेले, तैना सब मज़ाक बनानेरे लेई अपनि-अपनि क्रोड़ी हिलाले।

9 तैखन सब लोक डेरि गाले;

ते परमेशरेरे कम्मां केरे बारे मां बियान केरेले,

ते तैसेरे कम्मन रोड़ेच़ारे समझ़ेले।

10 धर्मी त यहोवारे वजाई सेइं खुशी भोइतां तैस कां शरण घिन्नेलो,

ते ज़ैना दिलेरे सच़्च़े आन, तैना सब घमण्ड केरेले।