1 धने यहोवा, ज़ै मेरी चट्टाने,

तै जंगरे लेई मेरे हथ्थन

ते लड़नेरे लेई मेरी एंगलोयन तियार कराते।✝

2 तै मीं पुड़ दया केरनेबालो ते मेरो क़िलो,

ते उच्‍ची ठार ते मेरो छुटानेबालोए,

तै मेरी ढाल ते छ़पनेरी ठारे,

ज़ै कौमन मेरे कब्ज़े मां केरते।

3 हे यहोवा, इन्सान कौने कि तू तैसेरो खियाल रखतस,

मैन्हु कुने कि तू तैसेरी फिक्र केरस?

4 इन्सान त सांसेरो ज़ेरोए;

तैसेरे दिहाड़े त लूशी मुकने बैली छावरे ज़ेरेन।

5 हे यहोवा, अपने सुर्गे उन्ढू केरतां ओस!

पहाड़न सेइं हूर तैखन तैन मरां तूँ निसेलो।

6 बिजली कड़केइतां मेरे दुश्मन्न तितर बितर केरे,

अपने तीर च़लेइतां तैन घबरा!

7 अपनो हथ उन्ढो केरतां मीं बड्डे समुन्दरे मरां बेइर कढ,

मतलब कि परदेशी केरे हथ्थे मरां छुटा।

8 ज़ैन केरू आशी झूठ ज़ोते,

ते तैन केरे देइने हथ्थे सेइं धोखेरां कम्मां भोतन।

9 हे परमेशर, अवं तेरी तारीफ़रू नंव्वू गीत ज़ोइलो;

दश तारन बाली सैन्गी बज़ेइतां तेरू भजन ज़ोइलो।

10 तू राज़न मुक्ति देने बालोस,

ते अपने दास दाऊदे तलवारी करां बच़ातस।

11 मीं बच़ा ते परदेशी केरे हथ्थे करां छुटा,

ज़ैन केरू आशी झूठ ज़ोते,

ते ज़ैन केरे देइने हथ्थे सेइं धोखेरां कम्मां भोतन।

12 इश्शां मट्ठां जुवैनरे वक्ते पौदां केरां ज़ेरां बेडोतन,

त इश्शी कुइयां तैन कूनेरे खम्भां केरि ज़ेरिन, ज़ैना मेहलेरे लेई बनाए जे;

13 इश्शे गुदाम भरोरे राले, ते तैन मां किसमां-किसमां केरू अन्न रख्खू गाए,

ते इश्शी भैड्डां-छ़ेल्‍ली इश्शे मैइदाने मां हज़ारेईं बच्‍चे देंती रान।

14 इश्शे दांत खूब लद्दोरे भोन;

असन न कोई बिघन भोए ते असेईं कोन्च गानू पे,

ते न इश्शे चौकन मां लेरां केरि शौर भोए।

15 एस हालती मां ज़ै कौम भोए तै केत्री धन भोल्ही!

ज़ैन लोकां केरो परमेशर यहोवाए, तैना केत्रे धन आन!