1 यहोवारी तारीफ़ केरा,

यहोवारे नंव्वेरी तारीफ़ केरा,

हे यहोवारे सेवकव तैसेरी तारीफ़ केरा।

2 तुस ज़ैना यहोवारे घरे मां,

मतलब इश्शे परमेशरेरे भवनेरे अंगन मां खड़े भोतथ।

3 यहोवारी तारीफ़ केरा, किजोकि परमेशर भलोए;

तैसेरे नंव्वेरू भजन केरा, किजोकि तै असन पुड़ महरबाने।

4 यहोवा याकूब अपने लेई च़ुनोरोए,

मतलब तैनी इस्राएल अपने मलकीतरे लेई च़ुनोरोए।

5 अवं त ज़ानताईं कि यहोवा महाने,

इश्शो प्रभु सब देबतन करां उच्‍चोए।

6 यहोवा ज़ैन भी चाऊ,

तैन तैनी अम्बरे ते ज़मीनी ते समुन्दरे

ते सब डुग्घी ठैरन मां कियोरूए।

7 तै ज़मीनरे कूने पुड़ेरां भाप आनते,

ते झ़ेड़रे लेई बिजली बनाते,

ते हवा अपने भण्डारे मरां कढते।

8 मिस्रे मां तैनी कुन इन्सानां केरे कुन जानबरां

केरे सारे पेइले नर बच्‍चे मैरी दित्ते।

9 हे मिस्र, तैने तेरे दरमियाने मां फ़िरौन

ते तैसेरे सब बड्डां-बड्डां कम्मां केरे खलाफ निशान ते चमत्कार किये।

10 तैनी बेड़ी कौमां नाश की,

ते ताकतबर राज़े,

11 मतलब एमोरी राज़ां केरो राज़ो सीहोन,

ते बाशानेरो राज़ो ओग,

ते कनानेरे सब राज़े मारे;

12 ते तैन केरो मुल्ख बेंटतां,

अपने इस्राएलेरो हिस्सो भोनेरे लेई दित्तो।

13 हे यहोवा, तेरू नवं हमेशारूए,

हे यहोवा, ज़ैस नंव्वे सेइं तेरी याद भोतीए,

तैन पीढ़ी-पीढ़ी कायम रालू।

14 यहोवा अपने लोकां केरो न्याय केरेलो,

ते अपने दासां केरि बुरी हालत हेरतां तरस खालो।

15 गैर कौमां केरे मूरती सोन्नेरे ते चैंदरिन,

तैना मैन्हु केरे हथ्थेरी बेनोरिन।

16 तैन मूरती केरू आशी त भोते, पन तैना गल न केरि बटन,

तैन केरि एछ़्छ़ी त भोतिन पन तैना लेही न बटन।

17 तैन केरे कन त भोतन पन तैना शुनी न बटन,

तैन केरे ऐशी मां सांस न च़ले।

18 ज़ेन्च़रे तैना आन तेन्च़रे तैन केरे बनाने बालेन;

ज़ैना तैन पुड़ भरोसो केरतन तैना भी तैन केरे ज़ेरे भोइ गाले।

19 हे इस्राएलेरे घराना, यहोवारी तारीफ़ केरा,

हे हारूनेरे घराना* यहोवारी तारीफ़ केरा!

20 हे लेवी केरे घराना यहोवारी तारीफ़ केरा,

हे यहोवारो डर मन्ने बालाव यहोवारी तारीफ़ केरा।

21 यहोवा ज़ै यरूशलेमे मां बास केरते,

तैस जो सिय्योने मां धन ज़ोवं गाए!

यहोवारी तारीफ़ भोए!