भजन संहिता 83

दुश्मना केरे खलाफ प्राथनारू गीत

आसापेरू भजन

1 हे परमेशर च़ुपच़ाप न रा;

हे परमेशर च़ुप न रा, ते न शान्त भो!

2 हेर, तेरे दुश्मन दंगो लगोरेन केरन,

तेरे बैरी तेरे खलाफ खड़ो भेवरेन।

3 तैना च़लैकी सेइं तेरे लोकां केरे नुक्सानेरी योजना बनातन,

ते तेरे शरणी मां एवरे लोकां केरे खलाफ योजना कढतन।

4 तैनेईं तैन सेइं ज़ोवं, "एज्जा असां तैन मुकेईं छ़डम, ताके तैना राष्ट्रेरे रूपे मां न रान,

ते इस्राएलेरू नवं अग्रोवं जो याद न राए।"

5 तैनेईं अक मन भोइतां योजना बनाई,

ते तेरे खलाफ करार कियोरोए।

6 एना त एदोमेरे तेम्बु बाले

ते इश्माएली, ते मोआबी, ते हग्री।

7 गबाली, अम्मोनी, अमालेकी,

पलिश्ती ते सोर मुल्खेरे रानेबाले समेत पलिश्ती आन।

8 इन सेइं साथी अश्शूरी लोक भी शामल भेवरेन;

तैन सेइं भी लूतेरी औलादी सहारो मैल्होरोए। (सेला)

9 तैन सेइं एरहो सलूख केर ज़ेरो मिद्यानी लोकन सेइं,

कीशोन दरियाए पुड़ सीसरा ते याबीने सेइं कियोरो थियो।

10 तैना एनदोर नगरे मां नाश भोए,

ते उडारेरे लेई खाद बेनि जे।

11 तैन केरे हुकूमत केरनेबालन सेइं तीं ओरेब ते जेबेरे ज़ेरे,

तैन केरे सारे प्रधान्न जेबह ते सल्मुन्नारे ज़ेरे केर,*83:11 ओरेब ते जेबह दूई मिद्यानी हाकिम एप्रैमी लोकेईं मारे। न्याय. 7:24-25.

12 ज़ैनेईं ज़ोवरू थियूं,

"असां परमेशरेरे चरागां केरे अधिकारी एप्पु भोइ गामेले।"

13 हे मेरे परमेशर, तैन बवंडरेरी धूड़रे ज़ेरे,

या बाते सेइं उडारोरी धूड़ी सेइं भूंसेरे ज़ेरे बनेई दे।

14 तैस अग्गरे ज़ेरे ज़ै जंगले भस्म केरतीए,

ते तैस लौअरे ज़ेरे ज़ै पहाड़न फुक्‍की छ़डतीए,

15 एन्च़रे तू एन अपने ऐंधी सेइं तैन निशैनी छ़ड,

ते अपने तूफाने सेइं तैन डरेई छ़ड!

16 इन दुश्मना केरे तुत्तरे बड़े बेइज़्ज़त केर,

कि हे यहोवा इना तेरे नंव्वे तोप्पन।

17 इना सदारे लेई शरमिन्दा ते डरोरोरे रान,

इन केरां तुत्तरां कालां भोन, ते इन केरो नाश भोए,

18 ज़ैस सेइं इना ज़ानन कि सिर्फ तू ज़ेसेरू नवं यहोवा आहे,

सारे धेरती पुड़ परमप्रधान परमेशरे।